ယခုတစ်ပတ်အတွင်း စျေးနှုန်းအပြောင်းအလဲဖြစ်ပေါ်ခဲ့သည့်သီးနှံများ

(၂၃.၄.၂၀၁၈ မွ ၂၇.၄.၂၀၁၈)ထိ
ဒီတစ်ပတ်မှာတော့ မတ်ပဲစျေးရော ပဲစင်းငုံစျေးရော စျေးကျဆင်းသွားပါတယ်။ ကြက်သွန်နီနဲ့ ကြက်သွန်ဖြူစျေးကလည်း ကျဆင်းသွားတာကို တွေ့ရပါတယ်။

စပါး
စပါးစျေးကတော့ သင်္ကြန်ကာလမတိုင်ခင်ကတည်းက စျေးက တက်နေပါတယ်။ သင်္ကြန်ကာလအမှီတင်ပို့နေမှုကြောင့်အပြင် လမ်းပန်းဆက်သွယ်ရေးအခြေအနေတွေကြောင့်လည်း စျေးကတက်လာခဲ့ပါတယ်။ လက်ရှိမှာတော့ ဆန်အဝင်က ပုံမှန်ရှိပြီး အရောင်းအဝယ်ကတော့ အေးနေပါတယ်။ သင်္ကြန်မတိုင်ခင် ဧရာဝတီပေါ်ဆန်းစပါးက တင်း ၁၀၀ ကို ၅ သောင်းကျော်စျေးက မြင့်တက်လာပြီး တင်း ၁၀၀ ကို ၁၀၇၀၀၀၀ အထိ ပေါက်စျေးရှိပါတယ်။ပေါ်ဆန်းရင်အမျိုးအစားကလည်း တင်း ၁၀၀ ကို ၃၀၀၀၀ ကျော်စျေးတက်လာပြီး ၉၄၆၀၀၀ ပေါက်စျေးရှိပါတယ်။ဖျာပုံပေါ်ဆန်းကလည်း တင်း ၁၀၀ ကို ၁၀၄၃၀၀၀ ကျော်ပေါက်စျေးရှိပြီး တင်း ၁၀၀ ကို ၃၀၀၀၀ ကျော်စျေးတက်လာပါတယ်။ ပထမတန်းစား စပါးတွေ စျေးမြင့်တက်ခဲ့ပေမယ့် ဒုတိယတန်းစာ စပါးတွေဖြစ်တဲ့ ရွှေသွယ်လေး၊ဧရာမင်း၊မနော် သုခ၊မီးကောက်၊နဲ့ သီးထပ်ရင်တို့ကတော့ တင်း ၁၀၀ ကို ၅၁၅၀၀၀ ကနေ ၆၉၀၀၀၀ အထိ အသီးသီးပေါက်စျေးရှိပြီး စျေးအပြောင်းအလဲ မရှိပါဘူး။

ဆန်
စပါးစျေးတက်လာတာနဲ့အမျှ ဆန်စျေးကလည်း အနောက်ကနေ လိုက်တက်လာပါတယ်။ နှစ်ကူးချိန် စားသုံးသူတွေအများအပြား ဝယ်ယူနေမှုကလည်း အရောင်းအဝယ်သွက်နေသလို စျေးကလည်း တက်နေတာလည်း ဖြစ်ပါတယ်။ သင်္ကြန်ကာလပြီးတဲ့အချိန်မှာလည်း နိုင်ငံတော်သမ္မတရဲ့ အစိုးရဝန်ထမ်းလစာ တိုးမယ်ဆိုတဲ့ သတင်းတွေကြောင့် ပြည်တွင်းဆန်စျေးနှုန်းတွေကလည်း တက်လာတာလို့လည်း ကုန်သည်အချို့က သုံးသပ်ထားပါသေးတယ်။ ဧရာဝတီတိုင်းမှာတော့ ပထမတန်းစာဆန်ဖြစ်တဲ့ ဧရာဝတီပေါ်ဆန်းအမျိုးအစားက တစ်အိတ်ကို ၄၁၀၀၀ ရှိပြီး ၂၀၀၀၊ ပေါ်ဆန်းရင်က တစ်အိတ်ကို ၃၉၅၀၀ ရှိပြီး ၁၅၀၀ ကျပ်၊ ဖျာပုံပေါ်ဆန်းကတော့ တစ်အိတ်ကို ၃၉၀၀၀ ရှိပြီး ၁၀၀၀ ကျပ် အသီးသီး စျေးတက်လာပါတယ်။ ဆန်ကြမ်းဖြစ်တဲ့ ရွှေသွယ်လေးကတော့ တစ်အိတ်ကို ၂၈၀၀၀ကျပ်၊ ဧရာမင်းက ၂၈၀၀၀ ကျပ်၊ မနောသုခက တစ်အိတ်ကို ၂၃၀၀၀ ကျပ်၊ မီးကောက်က တစ်အိတ်ကို ၂၄၀၀၀ ကျပ်နဲ့ သီးထပ်ရင်တို့ကတော့ တစ်အိတ်ကို ၂၁၀၀၀ နဲ့စျေးငြိမ်နေပါတယ်။ ရန်ကုန်ဝါးတန်းကုန်စည်ဒိုင်မှာတော့ ဖျာပုံပေါ်ဆန်းမွှေးက တစ်အိတ်ကို ၃၄၀၀၀ ကနေ ၃၈၀၀၀ ရှိပြီး တစ်အိတ်ကို ၂၀၀၀ ကျပ်၊ ဒေးဒရဲပေါ်ဆန်းမွှေးက တစ်အိတ်ကို ၃၄၀၀၀ ကနေ ၃၈၀၀၀ ရှိပြီး ၂၀၀၀ကျပ်၊ ပေါ်ဆန်းနယ်စုံက တစ်အိတ်ကို ၃၂၀၀၀ ကနေ ၃၆၀၀၀ ရှိပြီး ၁၀၀၀ကျပ်၊မြောင်းမြပေါ်ဆန်းက ၃၅၀၀၀ ကနေ ၃၈၀၀၀ ရှိပြီး ၃၀၀၀ကျပ်၊ ဆန်ကြမ်းဖြစ်တဲ့ မြီးဒုံဆန်က တစ်အိတ်ကို ၂၈၀၀၀ ကနေ ၃၀၀၀၀ကျပ်ရှိပြီး ၁၀၀၀ကျပ် စသဖြင့် အသီးသီးစျေးတက်သွားပါတယ်။ ရန်ကုန်ဝါးတန်းကုန်စည်ဒိုင်မှာကတော့ ဆန်ချောတွေထက် ဆန်ကြမ်းစျေးတွေက တက်လာတာကိုလည်း တွေ့ရပါတယ်။

မတ္ပဲ (FAQ/RC)
မတ်ပဲကတော့ သင်္ကြန်ကာလမတိုင်ခင်က စျေးအနည်းငယ်ပြန်တက်ခဲ့ပေမယ့် သင်္ကြန်ကာလအတွင်း အရောင်းအဝယ်ပိတ်ထားတာအပြင် ပြည်တွင်းပြည်ပ အဝယ်နည်းတဲ့အတွက်ကြောင့် သင်္ကြန်ကာလပြီးတဲ့ အချိန်မှာ အကျစျေးနဲ့ စျေးပြန်ဖွင့်ခဲ့ပါတယ်။ လက်ရှိမှာ အိန္ဒိယနိုင်ငံကလည်း ပြည်ပတင်ပို့မှုကို အရှိန်မြင့်နေတဲ့အတွက် မြန်မာပဲတွေက ထင်သလောက် စျေးမရတဲ့အပြင် အဝယ်ပါနည်းနေတဲ့အခြေအနေဖြစ်ပါတယ်။မြန်မာဘက်ကို တင်ပို့မှု ကန့်သတ်ခဲ့တဲ့ မတ်ပဲ၊ ပဲစင်းငုံတို့ကို ရောင်းချဖို့နဲ့ပတ်သတ်ပြီး မြန်မာအစိုးရက တောင်းဆိုထားပေမယ့် လက်ရှိအချိန်ထိ တိကျတဲ့အကြောင်းပြန်မှု မရှိသေးဘူးလို့လည်း သိရပါတယ်။ သင်္ကြန်ကာလအပြီးမှာ ပြည်ကုန်စည်ဒိုင်မှာတော့ မတ်ပဲက တစ်တင်းကို ၁၄၀၀၀ ပေါက်စျေးရှိခဲ့ပြီး ၁၀၀၀ ကျော်လောက်စျေးက ကျဆင်းသွားပါတယ်။ နေပြည်တော်ကုန်စည်ဒိုင်မှာလည်း တစ်တင်းကို ၁၃၅၀၀ ရှိပြီး တစ်တင်းကို ၅၀၀ ကျပ်လောက်ကျဆင်းသွားပါတယ်။ မုံရွာကုန်စည်ဒိုင်မှာတော့ တစ်တင်းကို ၁၅၀၀၀ နဲ့ စျေးတက်သွားတာကိုလည်း တွေ့ရပါတယ်။ သင်္ကြန်မရောက်ခင် မတ်ပဲက တစ်တန်ကို ၄၇၀၀၀၀ အထိ စျေးမြင့်တက်ခဲ့ပေမယ့် သင်္ကြန်ပြီးတဲ့အချိန်မှာတော့ တစ်ဖြေးဖြေးစျေးကျဆင်းသွားခဲ့ပြီး လက်ရှိပေါက်စျေးက ၄၀၀၀၀ ကျော်ထိ စျေးက ရောက်ရှိသွားပါတယ်။ မတ်ပဲက ၃ လအတွင်း ပြည်ပ တင်ပို့မှုပေါင်း တန်ချိန် ၅၂၅၀၀ ရှိခဲ့ပါတယ်။

ပဲစင်းငုံနီ
ပဲစင်းငုံနီကလည်း သင်္ကြန်မရောက်ခင် ဧပြီလဆန်းပိုင်းကတည်းက ပြည်ပဝယ်ယူမှုများပြားတဲ့အတွက်ကြောင့် စျေးက ၄ သိန်းအထက်အထိ စျေးတက်ခဲ့ပေမယ့် သင်္ကြန်ပြီးတဲ့ အချိန်မှာတော့ မထင်မှတ်လောက်အောင် စျေးက ကျဆင်းသွားခဲ့ပါတယ်။ ပဲစင်းငုံနီဟာ သင်္ကြန်ပြိးတဲ့အချိန်မှာ အရောင်းအဝယ်က အနည်းငယ်ရပ်ခဲ့ပါတယ်။ အိန္ဒိယနိုင်ငံက မတ်ပဲအထွက်တိုးလို့ မတ်ပဲက စျေးကောင်းမရပေမယ့် ပဲစင်းငုံနီကတော့ တခြားနိုင်ငံတွေနဲ့ နှိုင်းယှဉ်လိုက်ရင် စျေးကသက်သာတဲ့အတွက်ကြောင့်လည်း အဝယ်ကမတ်ပဲနဲ့ယှဉ်ရင် အနည်းငယ်စျေးပိုရနေပါတယ်။ ရန်ကုန်ကုန်စည်ဒိုင်မှာ ပဲစင်းငုံနီက စျေးတက်ခဲ့ပေမယ့် နယ်ကုန်စည်ဒိုင်ဖြစ်တဲ့ မုံရွာကုန်စည်ဒိုင်မှာတော့ တစ်တင်းကို ၁၀၃၀၀ ကျပ်၊ပြည်ကုန်စည်ဒိုင်မှာတော့ တစ်တင်းကို ၁၀၀၀၀ ကျပ်နဲ့ တစ်တင်းကို ၁၀၀၀ ကျပ်နီးပါးစျေးက ကျဆင်းသွားခဲ့ပါတယ်။ သင်္ကြန်ကာလမတိုင်ခင် ပဲစင်းငုံ တစ်တန်ကို ၄၂၀၀၀၀ အထိ စျေးတက်ခဲ့ပေမယ့် လက်ရှိမှာတော့ တစ်တန်ကို ၃၅၀၀၀၀ အထိ စျေးက ပြန်ကျဆင်းသွားခဲ့ပါတယ်။ ပဲစင်းငုံနီက ဘုရင့်နောင်ကုန်စည်ဒိုင်မှာလည်း တစ်ပတ်ကို ၃ ရက်သာ အရောင်းအဝယ်ရှိခဲ့ပါတယ်။ ပဲစင်းငုံနီကတော့ ၃ လအတွင်း ပြည်ပတင်ပို့မှုပေါင်း တန်ချိန် ၃၆၃၀၀ ကျော်အထိ ရှိခဲ့ပါတယ်။

ပဲတီစိမ်း
ပဲတီစိမ်းကတော့ တစ်ခြားပဲတွေလောက် စျေးအတက်အကျအများကြီးပြောင်းလဲမှုမရှိပဲ ဒီတစ်ပတ်မှာဆိုရင် စျေးကတက်သွားတာကိုလည်း တွေ့ရပါတယ်။ အိန္ဒိယနိုင်ငံကိုတင်ပို့နေပေမယ့် တရုတ်နိုင်ငံနဲ့ယိုးဒယားနိုင်ငံတို့ကလည်း အဓိက ဝယ်ယူနေတဲ့အတွက် မတ်ပဲ နဲ့ ပဲစင်းငုံတို့နဲ့နှိုင်းယှဉ်ရင် စျေးကောင်းရနေတဲ့ ပဲလည်းဖြစ်ပါတယ်။ လက်ရှိ ရန်ကုန်ကုန်စည်ဒိုင်မှာ ပဲတီစိမ်းက တစ်ပိဿာကို ၁၁၀၀ ကနေ ၁၈၀၀ အထိ ပေါက်စျေးရှိပြီး စျေးအပြောင်းအလဲ အနည်းငယ်သာ ရှိပါတယ်။ နယ်ကုန်စည်ဒိုင်တွေဖြစ်တဲ့ မုံရွာကုန်စည်ဒိုင်မှာ ပဲတီစိမ်းက တစ်တင်းကို ၁၉၀၀၀ ကနေ ၃၅၀၀၀ အထိ တစ်တင်းကို ၁၀၀၀၀ နီးပါးစျေးက တက်သွားခဲ့ပါတယ်။ နေပြည်တော်ကုန်စည်ဒိုင်မှာလည်း တစ်တင်းကို ၂၂၅၀၀ အထိ စျေးရရှိပြီး ၃၀၀၀ နီးပါးစျေးတက်သွားခဲ့ပါတယ်။ အဝင်များလို့ စျေးအနည်းငယ်ကျသွားခဲ့ပေမယ့် အရောင်းအဝယ်ကတော့ သွက်နေတဲ့အခြေအနေမှာ လည်း ရှိနေပါတယ်။ပြည်ပတင်ပို့မှုက ၃ လအတွင်း တန်ချိန် ၂၁၅၀၀ အထိ ရှိခဲ့ပါတယ်။

ကြက်သွန်နီ
ကြက်သွန်နီကတော့ သင်္ကြန်မရောက်ခင်ကတည်းက စျေးကွက်ထဲကို အများအပြားဝင်ရောက်လာတဲ့ အတွက် စျေးက တစ်ဖြေးဖြေးကျဆင်းသွားခဲ့ပါတယ်။ သင်္ကြန်နှစ်ကူးပြန်လည်ဖွင့်ချိန်မှာလည်း ပိတ်ရက်အတွင်း လှောင်ကြက်သွန်တွေကြောင့်အပြင် ကြက်သွန်အသစ်တွေကလည်း စျေးကွက်အတွင်း အများပြားပြန်လည်ဝင်ရောက်လာတဲ့အတွက် စျေးကထပ်ပြီး ကျဆင်းသွားခဲ့ပါတယ်။ သင်္ကြန်ကာလဖြစ်တဲ့အတွက်ကြောင့် နယ်စပ်ကနေတဆင့် ပြည်ပ တင်ပို့မှုကလည်း ပိတ်ထားတဲ့ အတွက် စျေးကျတာကို ပိုဖြစ်စေပါတယ်။ တစ်ပိဿာကို ၁၀၀ ကျော်ကျဆင်းသွားခဲ့ပြီး လက်ရှိပေါက်စျေးက တစ်ပိဿာကို အနိမ့်ဆုံးစျေး ၄၀၀ ကနေ အမြင့်ဆုံးစျေး ၁၂၀၀ သာရရှိနေပါတယ်။

ကြက်သွန်ဖြူ
ကြက်သွန်ဖြူကလည်း စျေးကွက်ထဲကို အဝင်များပြီး အဝယ်နည်းလာတဲ့အတွက် တရုတ်ကြက်သွန်ရော ရှမ်းကြက်သွန်ရော စျေးကကျဆင်းသွားခဲ့ပါတယ်။ တောင်သူတွေက စျေးအတက်ကို စောင့်နေပြီး ထုတ်မရောင်းသေးပေမယ့် စျေးကတက်မလာတဲ့အပြင် ကျဆင်းသွားခဲ့တဲ့အတွက်ကြောင့် သင်္ကြန်ပြီးကာလမှာ အပြိုင်အဆိုင်ထုတ်ရောင်းလာခဲ့ပါတယ်။ ထိုပြင် သင်္ကြန်မတိုင်ခင် နေရာအနှံမိုးရွာသွန်းတာတွေကြောင့် အချို့ နွေကြက်သွန်ခင်းတစ်ချို့ ပျက်စီးခဲ့ပြီးအရည်အသွေးမကောင်းတဲ့အတွက် စျေးက အနည်းငယ်သာရရှိခဲ့ပါတယ်။ တရုတ်ကြက်သွန်ဖြစ်တဲ့ ကြူကုတ်အမျိုးအစားကတော့ တစ်ပိဿာကို ၁၁၀၀ နီးပါး ပေါက်စျေးရှိပြီး ရှမ်းကြက်သွန်တွေကတော့ တစ်ပိဿာကို ၈၀၀ ကနေ ၁၄၀၀ အထိ တစ်လအတွင်း တစ်ပိဿာကို ၃၀၀ လောက်စျေးကျဆင်းသွားခဲ့ပါတယ်။

၀တ်ရည်မွန်

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်