မုန့်ဖုတ်ဆိုဒါကို ဖျက်ပိုးတွေနှိမ်နင်းဖို့ သုံးကြည့်ကြမယ်

19/10/2020 20:45 PM တွင် မဆုမြတ်ခင် မဆုမြတ်ခင် မှ ရေးသား ပြီး Greenovator Greenovator မှ ပေးပို့ထားပါသည်။

    မုန့်ဖုတ်ဆိုဒါ (Baking Soda) ဆိုတာ ဟင်းချက်တဲ့နေရာမှာ အဓိကသုံးတဲ့ ပစ္စည်းတစ်မျိုးလို့ အားလုံးသိထားကြမှာပါ။ အဲ့ဒီ မုန့်ဖုတ်ဆိုဒါဟာ အပင်တွေရဲ့ရန်သူ (pest) တွေကို နှိမ်နင်းရာမှာ ကောင်းကောင်းအသုံးချနိုင်တယ်ဆိုတာကို ဦးကြီးတို့ ယုံကြပါသလား။ ကဲ.....မယုံဘူးဆိုရင်လည်း ကိစ္စမရှိပါဘူး။ ဟုတ်မဟုတ်ကို ဒီဆောင်းပါးလေးဖတ်ပြီး လက်တွေ့စမ်းသပ်ကြည့်ကြရအောင်နော်။

(၁) မှိုရောဂါနှင့် ပိုးမွှားရောဂါများကို ကာကွယ်ကုသပေးနိုင်ခြင်း

    မုန့်ဖုတ်ဆိုဒါဟာ မှိုရောဂါတွေနဲ့ အင်းဆက်ဖျက်ပိုးအချို့ကို နှိမ်နင်းကာကွယ်နိုင်စွမ်း ရှိပါတယ်။ အထူးသဖြင့် ပျ၊ ပိုးစေးနဲ၊ မွှားပင့်ကူ၊ ယင်ဖြူ၊ လှေးပိုး၊ ရွက်ထွင်းပိုး၊ လိပ်ပြာဖလံအုပ်စုမှ သားလောင်းကောင်များ၊ မြေဆောင်မှိုရောဂါများနှင့် အပင်မှိုရောဂါများ ဥပမာ ဖားဥမှိုရောဂါ၊ နှင်းဆီရွက်ပြောက်ရောဂါ၊ သံချေးရောဂါ အစရှိသည်တို့ကို နှိမ်နင်းနိုင်ပါတယ်။ သူတို့တွေကို နှိမ်နင်းဖို့အတွက်ဆိုရင်တော့ ဇလုံတစ်ခုထဲကို ရေတစ်လီတာထည့်ပါ။ ပြီးရင် မုန့်ဖုတ်ဆိုဒါ လက်ဖက်ရည်ဇွန်း နှစ်ဇွန်း ထည့်ပါ။ ပိုးမွှားရောဂါ ပြင်းထန်နေပါက (၃) ဇွန်းအထိ ထည့်သွင်းအသုံးပြုနိုင်ပါတယ်။ ထို့နောက် တမာဆီ (၁) ဇွန်း ထည့်ပါ။ အကယ်၍ တမာဆီမရှိခဲ့ပါက သံလွင်ဆီကဲ့သို့သော ဟင်းသီးဟင်းရွက်ဆီ တစ်မျိုးမျိုးကို အစားထိုး ထည့်သွင်းအသုံးပြုနိုင်ပါတယ်။ ဒါပေမယ့် တမာဆီသုံးတာကတော့ အကောင်းဆုံးပါပဲ။ ပိုပြီးပြင်းချင်ရင်တော့ လေးညှင်းဆီ ဒါမှမဟုတ် ယူကလစ်ဆီ တစ်မျိုးမျိုးကို ထည့်သွင်းအသုံးပြုနိုင်ပါသေးတယ်။ ပြီးရင်တော့ ပန်းကန်ဆေးဆပ်ပြာဆီ (သို့) လက်ဆေးဆပ်ပြာဆီ တစ်မျိုးမျိုးကို (၁၀) စက်ခန့် ထည့်ပေးရမှာဖြစ်ပါတယ်။ အားလုံးထည့်ပြီးသွားရင် သေချာလေးရောမွှေပြီး ဖျန်းမယ့်စပရေးဗူးထဲ ထည့်ပေးရမှာဖြစ်ပါတယ်။ ဒီဆေးရည်ကို အသုံးပြုတော့မယ်ဆိုရင် သေချာလှုပ်ပြီးမှဖျန်းပေးဖို့ လိုအပ်ပါတယ်။ တစ်ခုသတိထားရမှာက ဆေးမဖျန်းခင်မှာ စမ်းသပ်တဲ့အနေနဲ့ အရွက်တစ်ရွက်ရွက်ကို နည်းနည်းဖျန်းကြည့်ပေးဖို့ လိုအပ်ပါတယ်။ ဖျန်းပြီးရင်တော့ (၁ -၂) နာရီလောက် စောင့်ကြည့်ပါ။ တကယ်လို့ အရွက်က ညှိုးသွားမယ်၊ ဆေးလောင်သလို ဖြစ်သွားမယ်ဆိုရင်တော့ အဲ့ဒီဆေးရည်ကို အားပျော့သွားအောင် ရေရောပေးဖို့လိုပါမယ်။ ဆေးရည်ပြင်းအားပျော့သွားပြီဆိုရင်တော့ မိမိအပင်တွေကို ဖျန်းနိုင်ပါပြီ။

(၂) Cabbage worm လို့ခေါ်တဲ့ ဂေါ်ဖီပိုးတစ်မျိုးကို ထိရောက်စွာ နှိမ်နင်းနိုင်ခြင်း

    ဒီပိုးကို နှိမ်နင်းဖို့ဆိုရင်တော့ မုန့်ဖုတ်ဆိုဒါ (၁) ဆနဲ့ ဂျုံမှုန့် (သို့) ဆန်မှုန့် (၁) ဆ တို့ကို (၁:၁) နှုန်းအတိုင်းရောပါ။ ပြီးရင်တော့ သေသေချာချာ နှံ့စပ်အောင် မွှေပေးပါ။ အဲ့ဒီရလာတဲ့ အမှုန့် အရောကို ဂေါ်ဖီထုပ်၊ ဘရိုကိုလီ (ပန်းပွင့်စိမ်း) အစရှိတဲ့ ဂေါ်ဖီမျိုးနွယ်ဝင်အပင်တွေပေါ်ကို ဖြူးပေးပါ။ အဲ့လိုလုပ်ပေးခြင်းအားဖြင့် ဂေါ်ဖီထုပ်တွေထဲ ဝင်အောင်းနေတဲ့ Cabage worm တွေဟာ (၁) ရက် (၂) ရက် အတွင်းမှာတင် သေသွားမှာ ဖြစ်ပါတယ်။

(၃) အပင်တွေရဲ့ ရန်သူဖြစ်တဲ့ ခရု၊ ပက်ကျိများကို ဖယ်ရှားနိုင်စွမ်း ရှိခြင်း

    အပင်တွေမှာ ကပ်ပြီးစားသောက်ဖျက်ဆီးနေတဲ့ ခရုတွေ ပက်ကျိတွေဟာ အပင်စိုက်ပျိုးတဲ့သူတွေအတွက်တော့ စိတ်အနှောက်အယှက် ဖြစ်စရာတစ်ခုပါပဲ။ ဒါပေမယ့် မုန့်ဖုတ်ဆိုဒါနဲ့သာဆိုရင် သူတို့တွေကို အလွယ်တကူ နှိမ်နင်းနိုင်ပါတယ်။ သူတို့ကို ကာကွယ်နှိမ်နင်းဖို့ နည်းလမ်း(၂) ခု ရှိပါတယ်။ ပထမတစ်နည်းကတော့ နှိမ်နင်းတဲ့ နည်းလမ်းပါ။ မုန့်ဖုတ်ဆိုဒါအမှုန့်ကို ခရုတွေ ပက်ကျိတွေပေါ် တိုက်ရိုက်ဖြူးပေးပါ။ အဲ့လိုလုပ်ပေးခြင်းအားဖြင့် သူတို့တွေကို သေစေနိုင်မှာ ဖြစ်ပါတယ်။ ဒုတိယတစ်နည်းကတော့ ကာကွယ်တဲ့နည်းလမ်းပဲ ဖြစ်ပါတယ်။ မုန့်ဖုတ်ဆိုဒါအမှုန့်တွေကို ကိုယ်စိုက်ထားတဲ့ အပင်တွေ၊ ပန်းအိုးတွေ ပတ်ပတ်လည်လည်မှာ စည်းဝိုင်းသလို ဝိုင်းထားလိုက်ပါ။ အဲ့လိုဝိုင်းပြီးဖြူးထားပေးခြင်းက ခရုတွေ၊ ပက်ကျိတွေရန်ကနေ အပင်တွေကို ကာကွယ်ပြီးသားဖြစ်နေမှာ ဖြစ်ပါတယ်။

(၄) ပေါင်းမြက်များကို နှိမ်နင်းနိုင်စွမ်းရှိခြင်း

    ပေါင်းမြက်တွေပေါ်ကို မုန့်ဖုတ်ဆိုဒါအမှုန့်ချည်း သီးသန့်ဖြူးပေးမယ်ဆိုရင်တော့ ရက်အနည်းငယ်အတွင်းမှာတင် အဲ့ဒီပေါင်းမြက်တွေကို တဖြည်းဖြည်းလောင်ပြီး သေစေနိုင်မှာ ဖြစ်ပါတယ်။ မုန့်ဖုတ်ဆိုဒါဖြူးပေးခြင်းက ပေါင်းမြက်တွေကို သေစေရုံသာမကပဲ ပေါင်းမြက်တွေ ထပ်ပေါက်လာခြင်းရန်မှလည်း အချိန်အတော်အတန်ကြာ ကာကွယ်ပေးနိုင်ပါတယ်။ ဒါပေမယ့် တစ်ခုသတိထားရမှာက ကိုယ်စိုက်ထားတဲ့အပင်တွေအပေါ်ကို မှားမဖြူး မိစေဖို့တော့ လိုပါတယ်နော်။ တကယ်လို့ သွားဖြူးမိရင်တော့ မိမိအပင်လေးတွေ လောင်ပြီး သေသွားမှာပါ။

    ကဲ...ဦးကြီးတို့ရေ အခုလောက်ဆိုရင်တော့ အိမ်မှာအလွယ်တကူရှိနိုင်တဲ့ မုန့်ဖုတ်ဆိုဒါလေးကို ကောင်းကောင်းအသုံးချနိုင်လိမ့်မယ်လို့ မျှော်လင့်ပါတယ်နော်။ အဲ့ဒါကြောင့် အခုဆောင်းပါးလေးကို ဒီနေရာမှာပဲ ရပ်လိုက်ပါရစေရှင့်။ ။

Reference

https://youtu.be/Ih6w1P7×3AY

ဆောင်းပါးများ/သတင်းများ ပြန်လည်ကူးယူဖော်ပြပါက "အစိမ်းရောင်လမ်းမှ ပြန်လည်ကူးယူဖော်ပြပါသည်" ဟု ထည့်ပေးပါရန် မေတ္တာရပ်ခံအပ်ပါသည်။