တစ်ပတ်တာအတွင်း ဈေးကွက်သုံးသပ်ချက်

09/10/2021 10:30 AM တွင် AMIA AMIA မှ ရေးသား

(၄.၁၀.၂၀၂၁) မှ (၈.၁၀.၂၀၂၁) အထိ အပြောင်းအလဲဖြစ်ပေါ်ခဲ့သည့် လယ်ယာထွက်ကုန်သီးနှံများ

မတ်ပဲ

ဒီတစ်ပတ် ပြည်တွင်းငွေလဲလှယ်နှုန်းဈေးတွေ ကျဆင်းသွားတဲ့အတွက်ကြောင့် မတ်ပဲဈေးကလည်း တစ်တန်ကို ငွေကျပ် ၃ သိန်းနီးပါးဈေးကျဆင်းသွားခဲ့ပါတယ်။ အိန္ဒိယဈေးကျဆင်းမှုက အနည်းငယ်သာ ရှိပေမယ့် ပြည်တွင်းငွေလဲလှယ်နှုန်းဈေးကွာဟမှုကြောင့်လည်းဖြစ်ပါတယ်။

အိန္ဒိယမှာလည်း ပဲအသစ်တွေဝင်လာတဲ့အတွက် ပြည်ပပို့ကုန် မြန်မာ့မတ်ပဲဈေးက အနည်းငယ်ကျဆင်းသွားပေမယ့် မိုးစိုက်ပဲဧက လျော့နည်းမယ်လို့ အိန္ဒိယအစိုးရခန့်မှန်းထားတဲ့အတွက် မတ်ပဲဈေးက ဆက်ပြီး တက်နိုင်ခြေရှိနေပါသေးတယ်။

ထို့ပြင် မြန်မာ့မတ်ပဲလက်ကျန်ကလည်း တန်ချိန်တစ်သိန်းခွဲလောက်သာ ကျန်ရှိနေပြီး တင်ပို့မှုက ဒီဇင်ဘာလအထိရှိမှာဖြစ်လို့ မတ်ပဲဈေးကွက်က အလားလာ ကောင်းနိုင်သေးတယ်လို့ ခန့်မှန်းရပါတယ်။

ရန်ကုန်ဈေးကွက်မှာ မတ်ပဲက တစ်တန်ကို ငွေကျပ် ၁၅ သိန်းကျော်အထိ ဈေးကရောက်ရှိသွားပြီး ၃ သိန်းလောက် ဈေးကျဆင်းသွားပါတယ်။

မန္တလေးဈေးကွက်မှာလည်း တစ်အိတ်ကို ၁၆၅၀၀၀ ပေါက်ဈေးရှိပြီး တစ်အိတ်ကို ၃၀၀၀၀ လောက်ဈေးက ကျဆင်းသွားခဲ့ပါတယ်။

အောင်လံ၊ ပြည် နဲ့ အခြား ပြည်နယ်တွေမှာလည်း မတ်ပဲက တစ်တင်းကို အနိမ့်ဆုံး ၈၀၀၀ လောက်အထိ ဈေးကျဆင်းသွားခဲ့ပါတယ်။

ပဲစင်းငုံနီ

ပဲစင်းငုံနီက မတ်ပဲကလောက် ဈေးအတက်အကျ မကြမ်းပေမယ့် ငွေဈေးကြောင့် အနည်းငယ်တော့ဈေးက ကျဆင်းသွားခဲ့ပါတယ်။ အိန္ဒိယမှာလည်း အဝယ်အနည်းငယ်ရှိနေတဲ့အတွက် ဈေးကတက်နေခဲ့ပါတယ်။ အိန္ဒိယတင်ပို့မှုကလည်း ပုံမှန်ပဲရှိနေတာဖြစ်လို့ ပဲစင်းငုံနီက လာမယ့်တင်ပို့မှုကာလမကုန်ခင် ဒီဇင်ဘာလအထိ အတက်အကျ အနည်းငယ်နဲ့သာ အရောင်းအဝယ်ရှိနေဦးမယ်လို့ ခန့်မှန်းထားပါတယ်။

ရန်ကုန်ဈေးကွက်မှာ ပဲစင်းငုံနီက တစ်တန်ကို ၁၄ သိန်း သုံးသောင်း ပေါက်ဈေးရှိပြီး တစ်တန်ကို ၁ သိန်းခွဲလောက် ဈေးကျဆင်းသွားပါတယ်။

မန္တလေးဈေးကွက်မှာတော့ ဈေးမဖွင့်ပါဘူး။

အောင်လံမှာတော့ တစ်တင်းကို ၄၅၀၀၀ ပေါက်ဈေးရှိပြီး ၃၀၀၀ကျပ်ဈေးကျဆင်းသွားပါတယ်။ 

ပြည်ဈေးကွက်မှာတော့ တစ်တင်းကို ၄၅၀၀၀ မှ ၄၆၀၀၀ ပေါက်ဈေးရှိပြီး ၂၀၀၀ကျပ် ဈေးကျဆင်းသွားပါတယ်။

စီပီပြောင်း

စီပီပြောင်းကလည်း ဒီတစ်ပတ်မှာ ဈေးကျဆင်းသွားပါတယ်။ ပြီးခဲ့တဲ့အပတ်ကအထိ တရုတ်တင်ပို့မှု အပြင် ထိုင်းကိုပါ တင်ပို့နေရပြီး ငွေကြေးဈေးတက်တဲ့အတွက်ကြောင့် ဈေးတွေက ဆက်တိုက် မြင့်တက်နေခဲ့ပါတယ်။ 

ဒီတစ်ပတ်မှာတော့ ငွေဈေးကျဆင်းတဲ့အပြင် တရုတ်နယ်စပ်ကုန်သွယ်ရေးပါပိတ်လိုက်တဲ့အတွက်ကြောင့် ပြောင်းဈေးက ကျဆင်းသွားပါတယ်။ ထိုင်းတင်ပို့မှု ရှိပေမယ့် ကားခဈေးတက်တာတွေကြောင့် ဈေးရရှိမှုကတော့ သိပ်မရှိဘူးလို့လည်း တောင်သူတွေထံကနေ သိရပါတယ်။ 

ထို့ပြင် ပြောင်းအသစ်တွေကလည်း ဈေးကွက်အတွင်း အများအပြားဝင်ရောက်နေတာဖြစ်လို့ ပြောင်းဈေးတွေက ထပ်ပြီး ကျဆင်းနိုင်တယ်လို့ ကုန်သည်တွေက ခန့်မှန်းထားပါတယ်။

လက်ရှိမန္တလေးဈေးကွက်မှာတော့ စီပီပြောင်းက တစ်အိတ်ကို ၃၄၀၀၀ ကနေ ၃၅၀၀၀ ပေါက်ဈေးရှိပြီး တစ်အိတ်ကို ၅၀၀၀ ကျပ်လောက်ဈေးကျဆင်းသွားပါတယ်။

ဆင်ဖြူကျွန်းမှာတော့ တစ်တင်းကို ၁၀၀၀၀ ပေါက်ဈေးရှိနေပါတယ်။

ငရုတ်

ငရုတ်တွေကတော့ ဒီတစ်ပတ်မှာ ဈေးအတက်အကျ အပြောင်းအလဲ တွေရှိခဲ့ပါတယ်။ ဝင်ရောက်မှုများတဲ့ ငရုတ်တွေက ဈေးအနည်းငယ်ကျဆင်းသွားပြီး အချို့ ငရုတ်တွေကတော့ ဝယ်ယူမှုများတဲ့အတွက်ဈေးတွေက တက်လာပါတယ်။

ငရုတ်(မြစ်ဝကျွန်းပေါ်ပု)က တစ်ပိဿာကို ၈၀၀၀ ကို ၈၂၀၀ ထိ တစ်ပတ်အတွင်း တစ်ပိဿာကို ၂၀၀၀ လောက်ဈေးတက်လာပါတယ်။

ငရုတ်(ဆင်ဖြူကျွန်း)ကတော့ တစ်ပိဿာကို ၅၀၀၀ ကနေ ၅၅၀၀ ပေါက်ဈေးရှိပြီး တစ်ပိဿာကို ၁၀၀ ကျပ်ဈေးကျဆင်းသွားပါတယ်။

ပန်းတနော်(AC)ကတော့ တစ်ပိဿာကို ၄၀၀၀ ကနေ ၄၂၀၀ ပေါက်ဈေးရှိပြီး တစ်ပိဿာကို ၂၀၀ ကျပ်ဈေးတက်လာပါတယ်။

ငရုတ်(မိုးထောင်)ဟင်္သာတကတော့ တစ်ပိဿာကို ၃၂၀၀ ကနေ ၃၃၀၀ ပေါက်ဈေးရှိပြီး တစ်ပိဿာကို ၄၀၀ ကျပ်ဈေးတက်လာပါတယ်။

မော်လမြိုင်ဈေးကွက်မှာလည်း ငရုတ်(ရှမ်းကျွန်း)က တစ်ပိဿာကို ၄၆၅၀ ပေါက်ဈေးရှိပြီး တစ်ပိဿာကို ၂၀၀ လောက်ဈေးတက်လာပါတယ်။

မန်ကျည်းသီး

မန်ကျည်းသီးကလည်း လတ်တလောဈေးတွေတက်နေပါတယ်။ အဟောင်းလက်ကျန်က မရှိတော့ပဲ အသစ်တွေက အဝယ်သွက်နေတဲ့အတွက် ဈေးတွေတက်နေတယ်လို့သိရပါသည်။

ရန်ကုန်ဈေးကွက်မှာ မန်ကျည်းသီး(ကျောက်ပန်းတောင်း)က တစ်ပိဿာကို ၂၅၀၀ ကနေ ၂၈၀၀ ပေါက်ဈေးရှိပြီး တစ်ပိဿာကို ၃၀၀ ကျပ်ဈေးတက်လာပါတယ်။ ပွင့်ကပ်ကတော့ တစ်ပိဿာကို ၁၄၀၀ ကနေ ၁၅၀၀ ပေါက်ဈေးရှိပြီး ဈေးငြိမ်နေပါတယ်။

ပုသိမ်ဈေးကွက်မှာတော့ မန်ကျည်းသီးက တစ်ပိဿာကို ၁၉၀၀ ကနေ ၃၂၀၀ ကြားပေါက်ဈေးရှိနေပြီး ဈေးငြိမ်နေပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။