အိတ်စပို့ ပဲမျိုးစုံ ဈေးတက်၊ ကြက်သွန်နီလည်း ဈေးပြန်တက်လာ

ဒီတပတ်မှာတော့ ပြည်ပပို့ကုန်ပဲတွေဖြစ်တဲ့ မတ်ပဲ၊ ပဲတီစိမ်း၊ ပဲစင်းငုံဈေးတွေ အားလုံး ပြန်တက်လာတယ်လို့ စိုက်ပျိုးရေးဈေးကွက်သတင်းအေဂျင်စီ(AMIA) က ပေးပို့လာတဲ့ သီးနှံဈေးနှုန်းဖော်ပြချက်တွေအရ သိရပါတယ်။

ရန်ကုန် ဘုရင့်နောင်ဈေးကွက်မှာ ပြီးခဲ့တဲ့နှစ်ပတ်လောက်ကစလို့ အကျဘက်ကို ဆက်တိုက်ဆင်းသွားတဲ့ မတ်ပဲဈေးတွေဟာ တစ်တန်ကို ကျပ် ၄၅၀၀၀ ကနေ ၅၀၀၀၀ ထိ ပြန်တက်လာတာပါ။

ဒီနေ့ဘုရင့်နောင်ဈေးကွက်ဈေးတွေကတော့ မတ်ပဲ(FAQ/RC - 2022) က တစ်တန်ကို ၁၅၈၂၅၀၀ ကျပ်၊ မတ်ပဲ(SQ/RC - 2021) က တစ်တန်ကို ၁၈၁၂၅၀၀၀ ကျပ် အသီးသီးရှိနေတာ ဖြစ်ပါတယ်။

အိန္ဒိယနိုင်ငံမှာ မတ်ပဲဈေးတက်တာ၊ ပြည်တွင်းငွေလဲလှယ်နှုန်းတွေ မြင့်တက်တာတွေကြောင့် ဈေးက ပြန်မြင့်လာတာဖြစ်တယ်လို့ AMIA က သုံးသပ်ထားပါတယ်။

ပြီးခဲ့တဲ့အပတ်က အနည်းငယ်ကျရိပ်ပြန်ပြလာတဲ့ ပဲစင်းငုံနီ (RC - 2021) ဈေးဟာလည်း တစ်တန်ကို ၃၇၅၀၀ ဈေးပြန်တက်လာပြီး ဒီနေ့ဈေးနှုန်း တစ်တန်ကို ၁၄၆၂၅၀၀ ကျပ် ပေါက်ဈေး ရှိပါတယ်။ 

တရုတ်နိုင်ငံဘက်ကို အဓိကတင်ပို့နေတဲ့ ပဲတီစိမ်းဈေးကွက်ဟာလည်း မန္တလေးဈေး ကွက်မှာ ပိဿာ(၆၀) တစ်အိတ်ကို ကျပ် ၅၀၀၀ ကနေ ကျပ် ၁၀၀၀၀ ကြား တက်လာပြီး ၁၂၅၀၀၀ - ၁၄၀၀၀၀ ကြား ပေါက်ဈေးရှိနေတာပါ။

ကြက်သွန်နီဈေးတွေလည်း ဒီတစ်ပတ်အဖွင့်မှာတော့ ဈေးပြန်တက်လာပါတယ်။ ရန်ကုန် ဘုရင့်နောင်ဈေးကွက်မှာတော့ အမျိုးအစားကိုလိုက်လို့ တစ်ပိဿာကို ကျပ် ၁၀၀ ကနေ ၁၅၀ ခန့်အထိ ဈေးတွေ ပြန်တက်လာတာဖြစ်ပါတယ်။

တစ်ပိဿာအလိုက်ဈေးနှုန်းတွေကတော့..

ကြက်သွန်နီ (ဆိပ်ဖြူရှယ်(သစ်)) - ၁၇၅၀ ကျပ်

ကြက်သွန်နီ (ဆိပ်ဖြူလတ်ကြီး) - ၁၆၅၀ ကျပ်

ကြက်သွန်နီ (ဆိပ်ဖြူလတ်သန့်) - ၁၅၅၀ ကျပ်

ကြက်သွန်နီ (ဆိပ်ဖြူလတ်ချော) - ၁၂၅၀ ကျပ် တွေ ဖြစ်ပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။