မတ်ပဲဈေး တစ်တန်ကို ၃၆ သိန်းကျော်အထိ ရှိလာ

ဇူလိုင်လအတွင်း မတ်ပဲဈေးနှုန်း ဆက်တိုက်ဆိုသလို မြင့်တက်လာကာ တစ်တန်လျှင် ကျပ် ၃၆ သိန်းကျော်အထိ ရှိလာကြောင်း ဘုရင့်နောင်ကုန်စည်ဒိုင်မှ သိရသည်။

ပြည်တွင်းမတ်ပဲများကို အိန္ဒိယနိုင်ငံမှ အဓိကထား ဝယ်ယူနေပြီး အဆိုပါနိုင်ငံတွင် မတ်ပဲလက်ကျန် နည်းပါးနေခြင်းနှင့် ရာသီဥတုအခြေအနေကြောင့် မိုးမတ်ပဲစိုက်ပျိုးသည့် ဧကလျော့နည်းလာခြင်းတို့ကြောင့် ပြည်တွင်းမတ်ပဲများ အရောင်းအဝယ် သွက်ကာ ဈေးနှုန်းမြင့်တက်လာခြင်းဖြစ်ကြောင်း သုံးသပ်ထားကြသည်။

"အခုဆို အိန္ဒိယဆိပ်ကမ်းတွေမှာလည်း လက်ကျန်နည်းနေပြီး သူတို့ပြည်နယ်ထွက်ပဲတွေက စိုက်စရိတ်နဲ့ တခြားကုန်ကျစရိတ်တွေ မြင့်တော့ ပြည်ပကသွင်းတဲ့ မတ်ပဲဈေးထက် ဈေးပိုကြီးတယ်။ စားသုံးမှုကလည်း ရှိတော့ မလုံလောက်ဘူး။ ဒါကြောင့် ပြည်ပကပဲတွေ အမြဲတမ်း တင်သွင်းနေရတယ်။ မြန်မာနိုင်ငံက ပဲတွေကို အဓိက ဝယ်တာများတယ်။ ဒါကြောင့် မြန်မာနိုင်ငံက ပဲဈေးကွက်က အိန္ဒိယနိုင်ငံနဲ့ အများကြီး သက်ဆိုင်တယ်" ဟု ပဲကုန်သည်တစ်ဦးက ပြောကြားသည်။

ဇူလိုင်လ ၇ ရက်နေ့က မတ်ပဲ (FAQ) တစ်တန်လျှင် ကျပ် ၃၂ သိန်းကျော်သာ ရှိခဲ့ပြီး ဇူလိုင်လ ၁၅ ရက်နေ့တွင် မတ်ပဲ (FAQ) တစ်တန်လျှင် ကျပ် ၃,၆၀၄,၀၀၀ အထိ သိသိသာသာ မြင့်တက်လာခဲ့ကြောင်း ဘုရင့်နောင်ကုန်စည်ဒိုင်မှ သိရသည်။

"မတ်ပဲဈေး တက်လာပေမဲ့ တောင်သူတွေလက်ဝယ်မှာ ပဲက မရှိသလောက် ဖြစ်နေပါပြီ။ အခုဈေးတက်လည်း တောင်သူတွေအတွက်က မသက်ဆိုင်သလိုပါပဲ။ လာမယ့် ဆောင်းပဲပေါ်ချိန်ကျမှ ဈေးကောင်းမျှော်ဖို့ပဲ ရှိပါတော့တယ်" ဟု ပဲစိုက်တောင်သူတစ်ဦးက ပြောကြားသည်။

ယင်းကဲ့သို့ ပြည်တွင်းမတ်ပဲဈေးနှုန်းများ မြင့်တက်လာခြင်းကြောင့် ပဲစင်းငုံဈေးနှုန်းများမှာလည်း ဈေးကွက်လှုပ်ခတ်လာပြီး လိုက်လံမြင့်တက်လာကြောင်း ဈေးကွက်အရ သိရသည်။

လက်ရှိ ဘုရင့်နောင်ကုန်စည်ဒိုင်တွင် ပဲစင်းငုံဈေးနှုန်းမှာ တစ်တန်လျှင် ကျပ် ၃,၃၄၃,၀၀၀ အထိ ပေါက်ဈေးရှိကြောင်း သိရသည်။

မြန်မာနိုင်ငံအနေဖြင့် ပြည်တွင်းမှ ထွက်ရှိသည့် ပဲမျိုးစုံများအနက် မတ်ပဲနှင့် ပဲစင်းငုံများကို အိန္ဒိယနိုင်ငံသို့ အဓိကအများဆုံး တင်ပို့နေကြောင်း သိရသည်။

ပြည်ပပေါက်ဈေး FOB အနေဖြင့် မတ်ပဲတစ်တန်လျှင် ဒေါ်လာ ၈၅၅ မှ ၈၆၅ အထိရှိပြီး၊ ပဲစင်းငုံတစ်တန်လျှင် ဒေါ်လာ ၇၈၀ မှ ၇၉၀ ခန့်အထိ ရှိကြောင်း သိရသည်။

မြန်မာနိုင်ငံတွင် နှစ်စဉ် ပဲမျိုးစုံစိုက်ဧက ၁၁ သန်းကျော်ရှိပြီး မတ်ပဲနှင့် ပဲစင်းငုံစိုက်ပျိုးမှုမှာ ၃၅ ရာခိုင်နှုန်းကျော် ရှိကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။