ဟန်ဂေရီပြည်သူများက မျိုးရိုးဗီဇပြုပြင်ထားသော မျိုးစေ့များကိုသုံးသည့် နာမည်ကြီးမိုဆန်တိုစိုက်ပျိုးရေးကုမ္ပဏီ၏ ပြောင်းဖူးခင်းများကို ဖျက်ဆီးလိုက်ခြင်း

ဟန်ဂေရီပြည်သူတွေဟာ ဧကပေါင်း၁၀၀၀ရှိတဲ့ မျိုးရိုးဗီဇပြုပြင်ထားသော မျိုးစေ့များကို အသုံးပြုစိုက်ပျိုးထားသည့် ပြောင်းဖူးခင်းများစွာကို ဖျက်ဆီးလိုက်ကြခြင်းအားဖြင့် မျိုးရိုးဗီဇပြုပြင်ရေးနည်းပညာတွေကို အသုံးပြု စီးပွားဖြစ်ထွန်းနေသည့် မိုဆန်တိုစိုက်ပျိုးရေးကုမ္ပဏီနဲ့ မျိုးရိုးဗီဇပြုပြင်ခံမျိုးစေ့များ(GMO)ကို အသုံးမပြုဖို့အရေး ခိုင်ခိုင်မာမာရပ်တည်လိုက်ပြီဖြစ်ကြောင်း ဟန်ဂေရီနိုင်ငံ ကျေးလက်ဒေသဖွံ့ဖြိုးရေးဝန်ကြီးဌာနမှ အတွင်းရေးမှူး လာဂျော့စ်ဘိုဂနာက ပြောကြားခဲ့သည်။ 

ဟန်ဂေရီနိုင်ငံဟာ တခြားဥရောပသမ္မဂနိုင်ငံတွေနဲ့မတူဘဲ မျိုးရိုးဗီဇပြုပြင်ထားသည့် မျိုးစေ့များကို တားမြစ်ထားသော တစ်ခုတည်းသော ဥရောပသမ္မဂအဖွဲ့ဝင်နိုင်ငံဖြစ်သည်။ အလားတူပင် ပီရုးနိုင်ငံသည်လည်း မျိုးရိုးဗီဇပြုပြင်ထားသည့် မျိုးစေ့များကို တားမြစ်လာခဲ့သည်မှာ ၁၀နှစ်ကျော်သွားပြီဖြစ်သည်။  

“မျိုးရိုးဗီဇပြုပြင်ထားတဲ့ ပြောင်းဖူးစေ့တွေက မြေကြီးထဲမှာ ရောက်နှင့်နေပြီ။ ဒါပေမယ့် ဝတ်မှုန်တွေ မပျံ့နှံ့ခင်မှာပင် အကုန်လုံးကို ဖျက်ဆီးလိုက်နိုင်ခဲ့ကြတာပါ”ဟု ဘိုဂနာမှ ထပ်ပြောခဲ့သည်။ 

ဥရောပသမ္မဂနိုင်ငံတော်တော်များများမှာ မျိုးရိုးဗီဇပြုပြင်ထားတဲ့ မျိုးစေ့တွေကို စိုက်ပျိုးရောင်းချခွင့်ပေးထားသည့်အတွက် ဟန်ဂေရီကို ဆက်သွယ်ရောင်းချနေသော ဥရောပသမ္မဂအဖွဲ့ဝင်နိုင်ငံကုန်သည်များမှတဆင့် GMO(မျိုးရိုးဗီဇပြုပြင်ထားသည့် မျိုးစေ့များ) သယ်ဆောင်မလာနိုင်စေရန် စစ်ဆေးမှုများ တိုးမြှင့်လုပ်ဆောင်သွားမည်ဟု ၎င်းမှ ပြောသည်။ 

ရှေးယခင်စုံစမ်းစစ်ဆေးမှုများ ပြုလုပ်စဉ်အတွင်း ဟန်ဂေရီရှိ စိုက်ပျိုးရေးမျိုးစေ့များတွင် မိုဆန်တိုစိုက်ပျိုးရေးကုမ္ပဏီမှ ထုတ်လုပ်ထားသည့် မျိုးရိုးဗီဇပြုပြင်ထားသော မျိုးစေ့များရောက်ရှိနေကြောင်း သက်ဆိုင်ရာအာဏာပိုင်များက တွေ့ရှိခဲ့ကြခြင်းဖြစ်သည်။