တိရိစ္ဆာန်အစာအဖြစ်ကျွေးမွေးနိုင်သည့် နေဗီယာမြက်ကို မွေးမြူရေးလုပ်ငန်းများမှ စိတ်ပါဝင်စား ဝယ်ယူစိုက်ပျိုးလာ

    ကျွဲ၊ နွား၊ ဆိတ်၊ သိုး၊ ဝက်၊ ကြက်၊ ငါးအစရှိသည့် တိရိစ္ဆာန်များအတွက် အစာအဖြစ်ကျွေးမွေးနိုင်သည့် နေဗီယာမြက်ပင်ကို မွေးမြူရေးလုပ်ငန်းများမှ စိတ်ပါဝင်စား ဝယ်ယူစိုက်ပျိုးလာကြကြောင်း သိရသည်။

နေဗီယာမြက်ဆိုတာက ကြံပင်လိုလို ပြောင်းပင်လိုလို အပင်ကြီးမျိုးဖြစ်ပြီး တိရိစ္ဆာန်တွေကိုကျွေးရင် သာမန်မြက်ထက် ၂ ဆ ၃ ဆကြီးထွားနှုန်းမြန်တဲ့ မြက်မျိုးဖြစ်ပါတယ်။ ရိုးရိုးမြက်တွေမှာ အသားဓာတ် ၅ ရာခိုင်နှုန်းပဲပါဝင်ပြီး နေဗီယာမြက်မှာတော့ အသားဓာတ် ၁၅ ကနေ ၁၉ ရာခိုင်နှုန်းအထိ ပါဝင်ပါတယ်။

ဟု စစ်ကိုင်းတိုင်း(မင်းကွန်း)ရှိ နေဗီယာမြက်ကြီးပင် အရောင်းဌာနမှ ကိုမျိုးမြင့်ကိုက ပြောသည်။

    နေဗီယာမြက်ပင်စိုက်ပျိုးရန် မြေကို ထယ်ထိုးထွန်မွှေပြီးပါက ပင်ကြား×တန်းကြား အကွာအဝေး ၃×၃ ပေ ထား၍စိုက်ပျိုးလေ့ရှိသည်။ မိုးရာသီတွင်စိုက်ပျိုးပါက အဆစ်(၂)ဆစ်ပါသော ပင်ပိုင်းများမှ အဆစ် (၁) ဆစ်ကိုမြုပ်၍ ကျန် (၁) ဆစ်ကိုမြေမျက်နှာပြင်နှင့်ထိအောင်ထားပြီး စိုက်ပျိုးရကြောင်း သိရသည်။

ထူးခြားတာက ဒီမြက်မျိုးက တစ်ခါစိုက်ရင် အနည်းဆုံး ၇ နှစ်လောက် ရိတ်သိမ်းကျွေးမွေးနိုင်တဲ့အတွက် အစာဖိုးကုန်ကျစရိတ်သက်သာစေတဲ့ မြက်မျိုးဖြစ်ပါတယ်။ တစ်ဧကစိုက်ပျိုးထားရင် တစ်နှစ်ပတ်လုံး နွားဆို အကောင် ၂၀၊ ဆိတ်ဆို ၆၅ ကောင် အထိ အစာကျွေးမွေးနိုင်ပါတယ်။

ဟု ၎င်းက ဆက်လက်ပြောသည်။

    နေဗီယာမြက်မျိုး အဆစ် (၂) ဆစ်ပါ တစ်ချောင်းလျှင် (၅၀) ကျပ်ဖြင့် မန္တလေးမြို့ရှိ ကားဂိတ်များမှတဆင့် မြန်မာနိုင်ငံနေရာအနှံ့အပြားသို့ တင်ပို့ရောင်းချနေကြာင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။