မျိုးသန့်ရရှိမှု၊ စိုက်နည်းစနစ် မှန်ကန်မှုတို့ရှိမှသာ မိုးစပါးအထွက်နှုန်းပြည့်မီမည်

    မျိုးကောင်းမျိုးသန့် ရရှိမှုအပြင်၊ စိုက်နည်းပျိုးနည်း စနစ်ကျမှန်ကန်ပါမှသာ ပန်းတိုင်အထွက်နှုန်း ပြည့်မီရရှိမည်ဖြစ်ကြောင်း မိုးစပါး စီးပွားဖြစ်စိုက်ပျိုးထုတ်လုပ်သူများက ပြောသည်။

စိုက်ပျိုးချိန်မှာ မျိုးကောင်းမျိုးသန့် စပါးမျိုးရရှိဖို့ အရေးကြီးသလို၊ ဒေသ ရာသီဥတုနဲ့ကိုက်ညီတဲ့ စပါးမျိုးဖြစ်ဖို့၊ သန့်စင်တဲ့စပါးမျိုးဖြစ်ဖို့ လိုပါတယ်။ သန့်စင်မှုမရှိဘူးဆိုရင် ဆန်နီတို့ ဘာတို့ ရောပါလာတတ်ပြီး ဆန်ကောင်းကောင်း မထွက်နိုင်ပါဘူး။ နောက်တစ်ခုကတော့ စိုက်ပြီးပြီဆိုတာနဲ့ အပင်သက်တမ်းအလိုက် ပေါင်းမြက်တွေနှိမ်နင်းဖို့၊ သူ့အချိန်အလိုက်သူ အစာကျွေးမွေးဖို့လည်း အရေးကြီးတယ်။ ပေါင်းမြက်တွေကို အစောပိုင်းမှာကတည်းက မနှိမ်းနင်းထားရင် အပင်ပွားမရတော့ဘဲနဲ့ အထွက်နှုန်းကို တော်တော်လေး ထိခိုက်နိုင်လို့ပါ။

ဟု ပဲခူးတိုင်းဒေသကြီး၊ ဇေယျဝတီမြို့၊ ဖြူးမြို့နယ်မှ မိုးစပါးစိုက်ပျိုးသူ ကိုအောင်ခိုင်မင်းက ပြောသည်။  

    မိုးစပါးစိုက်ပျိုးကြရာတွင် ရှေးယခင်အခါက ရက်ပေါင်း (၁၆၀) ဝန်းကျင်သက်တမ်းရှိသည့် သက်ကြီးစပါးမျိုးများကို စိုက်ပျိုးမှုများခဲ့သော်လည်း ယခုနောက်ပိုင်းကာလများတွင် ရာသီဥတုအခြေအနေ ပြောင်းအလဲကြောင့် သက်လတ်စပါးများကို ပိုမိုစိုက်ပျိုးလာကြသည်။ 

စပါးမျိုးစေ့မကြဲပက်ခင် တစ်ဧကကို (၁၅) ပတ်လည် အိတ်ဝက်နဲ့ ပိုတက်အိတ်ဝက်ရောပြီး ထွန်စက်ထိုးရင်းနဲ့ မြေခံထည့်ပေးတယ်။ နောက် (၇) ရက်လောက်မှာ စပါးမျိုးကြဲတယ်။ စပါးမျိုး ကြဲပြီး (၁၅) ရက်သားမှာတော့ ပေါင်းသတ်ဆေးဖျန်းတယ်။ (၂၅) ရက်သားမှာ တစ်ဧကကို ပုလဲ အိတ်ဝက်နဲ့ (၁၅)ပတ်လည်အိတ်ဝက် တစ်ခါထပ်ကျွေးတယ်။ စပါးသက်တမ်း (၇၅) ရက် အကြာမှာ တစ်ဧကကို (၁၅)ပတ်လည် အိတ်ဝက်နဲ့ ပိုတက်အိတ်ဝက် တစ်ခါထပ်ကျွေးပေးတယ်။ စပါး အနှံစထွက်ချိန်မှာတော့ တစ်ဧကကို (၁၅) ပတ်လည် အိတ်ဝက်နှုန်း တစ်ခါထပ်ကျွေးပေးပါတယ်။ ပိုးသတ်ဆေးကတော့ သုံးရခဲပါတယ်။ မသုံးကြတာများတယ်။

ဟု ၎င်းက ဆက်လက်ပြောသည်။ 

    ဇွန်၊ ဇူလိုင်လ မိုးစပါးစိုက်ရာသီတွင် မိုးရေကို အဓိကအားပြုစိုက်ပျိုးကြသော်လည်း၊  မိုးခေါင်ရေရှားသည့် ဒေသများတွင်မူ ဆည်ရေနှင့် တွင်းရေများ သီးသန့်ပေးသွင်း၍ စိုက်ပျိုးလေ့ရှိကြသည်။