စစ်ကိုင်းတိုင်း၊ ဝက်လက်မြို့နယ်ရှိ နှမ်းခင်းများ ပိုးကျ ပျက်စီးဆုံးရှုံး

    စစ်ကိုင်းတိုင်း၊ ဝက်လက်မြို့နယ်ရှိ နှမ်းခင်းများ ပိုးကျရောက်ကာ ပျက်စီးဆုံးရှုံးမှု ကြုံတွေ့နေရကြောင်း ဒေသခံ နှမ်းစိုက်တောင်သူများထံမှ သိရသည်။

မိုးနှမ်းတွေ ပိုးကျတာပါ။ အပင်တွေက အထွတ်ထွတ်တွေ ထတယ်။ အပင်တွေ လဲကျတယ်။ နှမ်းမရိတ်ရသေးခင် အသီးတန်းလန်းတွေနဲ့ အပင်တွေ သေကုန်တယ်။ ရေပေးရင်များ သက်သာမလားဆိုပြီး ရေပေးကြည့်တယ်။ ပိုတောင် ဆိုးသွားတယ်။ ဆေးဆိုင်ကပြောတဲ့ဆေးပက်တာလည်း မသက်သာဘူး။ ဒါမျိုး တစ်ခါမှကို မဖြစ်ဖူးသေးပါဘူး။ ဒီတစ်ခါ ပထမဆုံးကြုံရတာပါ။

ဟု စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်မှ နှမ်းစိုက်တောင်သူ ဦးဝင်းကို က ပြောသည်။

    စစ်ကိုင်းတိုင်း၊ ဝက်လက်မြို့နယ်၊ ထိန်ကံရွာ၊ ကံသာရွာ၊ ရွှေကျင်ရွာ၊ ရေထွက်ရွာ အစရှိသည့် နှမ်းအဓိက စိုက်ပျိုးထုတ်လုပ်သည့် ရွာများ၌ ပျက်စီးဆုံးရှုံးမှုများ ကြုံတွေ့နေရခြင်း ဖြစ်သည်။

ကျွန်တော်စိုက်တာ ဆယ်ဧကမှာ သုံးဧကလောက် အပင်တွေအားလုံး ဆုံးရှုံးသွားပါပြီ။ နှမ်းနက်ရော၊ ရိုးရိုးနှမ်းတွေရော အကုန်လုံးဖြစ်တာပါ။ တခြားနှမ်းသမားတွေလည်း ဆုံးရှုံးမှု များနေပါတယ်။ ဆေးဖိုးတွေရော၊ မြေဆီဖိုးတွေရော အကုန်ကုန်သွားတာပေါ့။ ဖေဖော်ဝါရီလလောက်က စစိုက်တဲ့သူတွေကတော့ သက်သာသွားတယ်။ ဧပြီလကုန်မှ စစိုက်တဲ့ မိုးနှမ်းသမားတွေတော့ အကုန်လုံး ထိခိုက်ကုန်ပါတယ်။

ဟု ဦးဝင်းကို က ဆက်လက်ပြောသည်။

    ယခုကဲ့သို့ ဆုံးရှုံးမှုကြုံတွေ့ရသည့် နှမ်းပင်များမှာ ဧပြီလကုန်တွင် စတင်စိုက်ပျိုးထား၍၊ စိုက်ပျိုးပြီး (၇၅) ရက်အကြာတွင် ရိတ်သိမ်းရမည့် နှမ်းပင်များဖြစ်ကြောင်း သိရသည်။

(ဆောင်းပါးများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)