လာမည့်စက်တင်ဘာလအတွင်း ရော်ဘာဈေးနှုန်းများ ဆက်လက်မြင့်တက်လာနိုင်ခြေရှိ

20/08/2020 10:30 AM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား ပြီး Greenovator Greenovator မှ ပေးပို့ထားပါသည်။

     ၂၀၂၀ ခုနှစ် စက်တင်ဘာလအတွင်း ရော်ဘာဈေးနှုန်းများ ဆက်လက်မြင့်တက်လာနိုင်ခြေရှိကြောင်း ရော်ဘာဈေးကွက် ကျွမ်းကျင်သူများက သုံးသပ်သည်။

ရော်ဘာဈေးက အတက်ဘက်ကို ဦးတည်နေပါတယ်။ တရုတ်ဘက်က မဝယ်သေးဘူး။ ဝယ်တဲ့အချိန်ကျရင် ဈေးကောင်းမယ့်အချိန်ပါ။ ဘာဖြစ်လို့ဆိုရင် အဲ့ဒိအချိန်ကာလမှာ အခွန်မကောက်တဲ့ ကာလဆိုတော့ ဝယ်လက်က ဈေးကောင်းကောင်း ပေးလို့ရတာပေါ့။ စက်တင်ဘာလဆို သူတို့ဘက်က အစေး လိုအပ်တဲ့အချိန်၊ ဒီအချိန်ဆို မြန်မာဘက်က အစေးကို ဝယ်တယ်။

ဟု ပဲခူးတိုင်း၊ ရွှေကျင်မြို့နယ် ရော်ဘာစိုက်ပျိုးထုတ်လုပ်သူများအသင်း အတွင်းရေးမှူး/ရွှေကျင်ရွှေပင်စံ ကုမ္ပဏီ၏ ဒါရိုက်တာဦးခင်မောင်သက်က ပြောသည်။

     ၂၀၂၀ ခုနှစ် သြဂုတ်လ (၁၃) ရက်က မုဒုံရော်ဘာပေါက်စျေး မှိုင်းno (3) တစ်ပေါင်လျှင် (၇၁၀) ကျပ် ပေါက်ဈေး ရှိခဲ့ပြီး၊ သြဂုတ်လ (၁၈) ရက်တွင်မူ မုဒုံရော်ဘာပေါက်စျေး မှိုင်းno (3) တစ်ပေါင်လျှင် ကျပ် (၇၃၀) မှ (၇၃၅) ကျပ် အတွင်း ဈေးနှုန်းများဖြင့် ရောင်းဝယ်နေကြောင်း သိရသည်။

ဈေးက တဖြည်းဖြည်းနဲ့ကို တက်လာတာ။ ပြီးခဲ့တဲ့နှစ် နိုဝင်ဘာလလောက်က တော်တော်ကို ဈေးကျသွားပြီး အခု ပြန်တက်လာတယ်။ ကိုဗစ်ကာလဆိုပေမယ့်လည်း ဈေးကမဆိုးပါဘူး။ ဆက်တက်တော့ ဈေးအတက်ဘက်ကိုပဲ ဆက်လက်ဦးတည်နေဦးမှာပါ။

ဟု ဦးခင်မောင်သက်က ဆက်လက်ပြောသည်။

     မြန်မာ့ရော်ဘာစိုက်ပျိုးထုတ်လုပ်မှုမှာ တစ်နိုင်ငံလုံးအတိုင်းအတာအနေဖြင့် ဧက ၁၄ သိန်း ဝန်းကျင် စိုက်ပျိုးထုတ်လုပ်နေပြီး ကမ္ဘာ့ရော်ဘာအသုံးပြုမှုမှာ ၂၀၂၀ ခုနှစ်၌ သန်းပေါင်း ၂၈ တန်ဝန်းကျင်အထိ ရှိလာမည်ဟု စျေးကွက်ပိုင်း ကျွမ်းကျင်သူတွေက သုံးသပ်ထားပါတယ်။

နန်းထက်ထက်ချစ်

ဆောင်းပါးများ/ သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။