ဈေးကွက်ထဲ အာလူး အဝင်များ၍ ဈေးကျဆင်းနေ

ဈေးကွက်သို့ အာလူးအဝင်များပြီး ဝယ်လိုအား လျော့ကျနေခြင်းကြောင့် ဈေးကျဆင်းနေကြောင်း ဈေးကွက်အတွင်းမှ သိရသည်။

လက်ရှိ ဈေးကွက်သို့ တရုတ်အာလူးများ အဝင်နည်းနေသော်လည်း ပြည်တွင်းထွက် အာလူးများ ဝင်ရောက်မှု များနေပြီး မိုးအာလူးမှာ အရည်အသွေး မလှသဖြင့် ဝယ်ယူမှု နည်းနေကြောင်းလည်း သိရသည်။

"အရင်နှစ်တွေက တရုတ်အာလူးတွေ အဝင်များလို့ ဈေးကွက် အပြိုင်လုနေရလို့ ဈေးကျတတ်တယ်ဆိုပေမဲ့ ဒီနှစ်က တရုတ်အာလူးလည်း အဝင်နည်းခဲ့တယ်။ ဒါပေမဲ့ ပြီးခဲ့တဲ့နှစ်က အရောင်းအဝယ်ဖြစ်ခဲ့တော့ ဒီနှစ်မှာ တောင်သူတွေက လိမ့်စိုက်နေတော့ အာလူးအဝင်က အခုထက်ထိ များနေတယ်။ တရုတ်အာလူးတွေ ဝင်လာခဲ့လို့ကတော့ ဒီထက်တောင် ပိုဒုက္ခရောက်နိုင်တယ်" ဟု ရှမ်းပြည်နယ်၊ အောင်ပန်းမြို့မှ ကုန်စိမ်း ရောင်းဝယ် လုပ်ကိုင်သူ တစ်ဦးက ပြောသည်။

လက်ရှိ ရှမ်းပြည်နယ်၊ အောင်ပန်းမြို့တွင် အောက်တိုဘာလ ၁၃ ရက်နေ့က ရှမ်းပြည်နယ် S-2/S-3 တစ်ပိဿာလျှင် ကျပ် ၄,၀၀၀၊ S-2/S-1 တစ်ပိဿာလျှင် ကျပ် ၃,၈၀၀၊ S1 OK အာလူး တစ်ပိဿာလျှင် ကျပ် ၃,၅၀၀ ပေါက်ဈေးရှိကြောင်း သိရသည်။

ယင်းအပြင် ဘုရင့်နောင် ကုန်စည်ဒိုင်တွင်လည်း အောက်တိုဘာ ၁၄ ရက်နေ့၌ A1 အာလူး တစ်ပိဿာလျှင် ကျပ် ၁,၅၀၀၊ S-1 တစ်ပိဿာလျှင် ကျပ် ၃,၀၀၀၊ S-2 တစ်ပိဿာလျှင် ကျပ် ၃,၃၀၀ နှင့် OK အာလူး တစ်ပိဿာလျှင် ကျပ် ၂,၃၀၀ သို့ ပေါက်ဈေးသာ ရှိပြီး လအစနှင့် ယှဉ်ပါက တစ်ပိဿာလျှင် အမျိုးအစားပေါ် လိုက်၍ ကျပ် ၃၀၀ မှ ၇၀၀ အထိ ကျဆင်းသွားကြောင်း တွေ့ရသည်။

မိုးတွင်းတစ်လျှောက်မှာ ဈေးအဆိုးရွားဆုံး ကာလဖြစ်လေ့ရှိပြီး မိုးတွင်းအာလူးမှာ အနာအဆာ များသောကြောင့် လူကြိုက်နည်းလေ့ရှိကြောင်း သိရသည်။

ယင်းအပြင် စားအုန်းဆီ အကျပ်အတည်းများကြောင့် အာလူးကြော်ဖိုများ အာလူးဝယ်ယူမှု ရပ်နားထားကြသည့်အတွက်ကြောင့်လည်း အရောင်းအဝယ် အေးကာ ဈေးကျနေခြင်းမှာလည်း တစ်စိတ်တစ်ပိုင်း ပါကြောင်း ဈေးကွက်နားလည်သူများက သုံးသပ်ကြသည်။

လက်ရှိ ဒေသစိုက်ပျိုးမှု အာလူးများအနေဖြင့် နည်းပညာ အားနည်းပြီး အနာအဆာ လွန်စွာ များပြားနေခြင်း၊ စားသုံးသူနှင့် ကုန်သည်များ၏ ဝယ်လိုအားထက် စိုက်ပျိုးမှုက များပြားလွန်းခဲ့ခြင်းတို့ကြောင့် ဈေးမရခြင်းဖြစ်ကြောင်းလည်း ဈေးကွက်နားလည်သူများက သုံးသပ်ပြောဆိုကြသည်။

နောက်နှစ်များတွင် မိုးအာလူးကို ရာခိုင်နှုန်း လျှော့စိုက်ပြီး ဆောင်းအာလူး ပေါ်မည့်အချိန်ကို ပိုမိုစိုက်ပျိုးသင့်ကြောင်း တောင်သူများကို အကြံပေးထားခြင်းများလည်း ရှိသည်။

အာလူးမျိုးများကို ဘင်္ဂလားဒေ့ရှ်နိုင်ငံ၊ နယ်သာလန်၊ အိန္ဒိယနှင့် တရုတ်နိုင်ငံတို့မှ ဝယ်ယူစိုက်ပျိုးကြရပြီး မျိုးအာမခံချက်နှင့် လမ်းခရီး အခက်အခဲများကိုလည်း ကြုံတွေ့နေရကြောင်း သိရသည်။

လက်ရှိတွင် ရှမ်းပြည်နယ်၊ ဟဲဟိုးမြို့၌ ဟဲဟိုးအာလူး အစုအဖွဲ့၏ တန် ၂,၀၀၀ ဆံ့ မျိုးအာလူး အအေးခန်းသိုလှောင်ရုံ ဖွင့်လှစ်နိုင်ခဲ့ကြောင်း သိရပြီး ဒေသအတွင်း အာလူးစိုက် တောင်သူများ၏ မျိုးအာလူး လိုအပ်ချက်ကို ဖြည့်ဆည်းပေးနိုင်မည်ဖြစ်ကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။