အသား၊ ငါးဈေးများ ဆက်တိုက်မြင့်တက်ခြင်းကြောင့် ရောင်းအား သိသိသာသာ လျော့ကျနေ

ပြည်တွင်းတွင် အသား၊ ငါး ဈေးနှုန်းများ တဖြည်းဖြည်း မြင့်တက်လာသည့်အတွက် အသား၊ ငါး စားသုံးမှု လျော့ကျလာကြောင်း သားငါး ရောင်းချသူများထံမှ သိရသည်။

လက်ရှိ အသား၊ ငါး ဈေးကွက်တွင် အသား၊ ငါး၊ ပုစွန် တစ်ဆယ်သားလျှင် ကျပ် ၂,၀၀၀ အထက်မှ စတင်ရှိပြီး အမြင့်ဆုံး ကျပ် ၁၀,၀၀၀ ကျော်အထိ ဈေးပေါက်နေကြောင်း သိရသည်။

ထို့ကြောင့် စားသုံးသူ ပြည်သူများအနေဖြင့် အသား၊ ငါးကို နေ့စဉ် စားသုံးခြင်းထက် ရက်ခြား၍သာ ဝယ်ယူစားသုံးကြခြင်း၊ နေ့စဉ် စားသုံးသည့် ပမာဏကို လျှော့ချ စားသုံးလာကြခြင်းများ ရှိလာကြောင်း သိရသည်။

"ဈေးတွေက အကုန်တက်နေပြီး ဝင်ငွေက မကောင်းတော့ အရင်လို ဘယ်စားနိုင်တော့မလဲ။ အခုက မိသားစု သုံးယောက်အိမ်ဆိုရင် ဟင်း တစ်ဆယ်သားပဲ အများစု ချက်ကြတယ်။ ငွေကြေး ပြည့်စုံသူလောက်သာ နည်းနည်း ပိုစားကြတယ်" ဟု ကျေးရွာများတွင် အသား၊ ငါး ရောင်းချသူ တစ်ဦးက ပြောသည်။

အသား၊ ငါး အပါအဝင် စားသောက်ကုန်ပစ္စည်းများ၏ ကုန်ဈေးနှုန်း မြင့်တက်လာသော်လည်း စားသုံးသူ ပြည်သူများ၏ နေ့စဉ် ရရှိသည့် လုပ်ခလစာ ဝင်ငွေ နည်းခြင်း၊ အလုပ်အကိုင် အခွင့်အလမ်း နည်းပါးခြင်းများကြောင့် ဝင်ငွေနှင့် ထွက်ငွေ မမျှတသဖြင့် အသား၊ ငါး စားသုံးမှု လျော့ကျလာခြင်း ဖြစ်သည်။

အသား၊ ငါး စားသုံးမှု လျော့ကျခြင်းကြောင့် အသား၊ ငါး ရောင်းချသူများအနေဖြင့်လည်း နေ့စဉ် ရောင်းအား သိသိသာသာ လျော့ကျသွားကြောင်း သိရသည်။

လက်ရှိတွင် ကြက်သား ရင်ပုံ (အရိုးနှင့် အသား အရော) တစ်ဆယ်သားလျှင် ကျပ် ၂,၅၀၀၊ ကြက်ပေါင်လုံး တစ်ဆယ်သားလျှင် ကျပ် ၂,၀၀၀ ရှိပြီး အမဲသားမှာ တစ်ဆယ်သားလျှင် ကျပ် ၃,၃၀၀ နှင့် အမဲ ကလီစာ အစုံဈေးမှာ တစ်ဆယ်သားလျှင် ကျပ် ၃,၈၀၀ ရှိကြောင်း သိရသည်။

ငါးကြင်းဈေးမှာ တစ်ဆယ်သားလျှင် ကျပ် ၂,၈၀၀၊ ငါးဖယ်ခြစ် တစ်ဆယ်သားလျှင် ကျပ် ၅,၅၀၀၊ ဝက်သုံးထပ်သားမှာ တစ်ဆယ်သားလျှင် ကျပ် ၃,၂၀၀၊ ဆိတ်သားမှာ တစ်ဆယ်သားလျှင် ကျပ် ၁၀,၀၀၀ ကျော် ဈေးပေါက်ကြောင်း သိရသည်။

ပုစွန်ဆိတ် တစ်ဆယ်သားလျှင် ကျပ် ၂,၂၀၀၊ ပုစွန်ထုတ် တစ်ဆယ်သားလျှင် ကျပ် ၅,၀၀၀ မှ ၈,၀၀၀၊ ငါးရံ့ တစ်ဆယ်သားလျှင် (ရွာဈေး) ကျပ် ၁,၅၀၀၊ ငါးရှဉ့် တစ်ဆယ်သားလျှင် ကျပ် ၂,၀၀၀ ဈေးရှိကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။