ခရမ်းချဉ်သီးစျေး အဆမတန်ကျဆင်းနေသဖြင့် နွားစာအဖြစ် ကျွေးမွေးနေရ

ခရမ်းချဉ်သီးစျေးနှုန်းများ အဆမတန်ကျဆင်းနေသဖြင့် နွားစာအဖြစ် ကျွေးမွေးနေရကြောင်း ခရမ်းချဉ်သီး စီးပွားဖြစ်စိုက်ပျိုးသည့် တောင်သူများက ပြောသည်။

မနေ့ကအထိကို ခရမ်းချဉ်သီးစျေးက တစ်ပိဿာကို ၅၀ ကျပ်ပဲ ရပါတယ်။ တစ်ပိဿာကို ၅၀ ကျပ်ဆိုမှတော့ နွားကျွေးရုံပေါ့။ အခြောက်ထားလည်း စျေးကွက်မရှိ၊ ယိုထိုးလည်း တွက်ချေမကိုက်ဘူး။ တင်ပို့ရောင်းချဖို့ ကျတော့လည်း လမ်းစရိတ်နဲ့ မကာမိဘူးလေ။

ဟု မန္တလေးတိုင်း၊ ပြင်ဦးလွင်ခရိုင်၊ မတ္တရာမြို့နယ်၊ မြောင်းသစ်ကျေးရွာမှ ခရမ်းချဉ်စိုက်တောင်သူ ကိုလှိုင်မိုးက ပြောသည်။

တစ်နိုင်ငံလုံးအတိုင်းအတာဖြင့် စျေးနှုန်းကျဆင်းနေခြင်းဖြစ်ပြီး မန္တလေးမြို့နှင့် အောင်ပန်းမြို့ရှိ ပွဲရုံများ၌ ခရမ်းချဉ်သီးတစ်ပိဿာလျှင် ကျပ်(၅၀)မှ ကျပ်(၂၀၀)အတွင်း စျေးနှုန်းဖြင့် ရောင်းချနေကြောင်း ပွဲရုံများမှ သိရသည်။

ကုန်စိမ်းစျေးတွေ အကုန်လုံးနီးပါး ကျဆင်းနေတယ်။ တရုတ်ပြည်ဘက်မှာ (COVID-19 ဗိုင်းရပ်စ်ကြောင့်) ပေါက်ဖော်ကြီး နေမကောင်းတာနဲ့၊ ထွက်သမျှ ကုန်စိမ်းတွေ ပြည်တွင်းမှာပဲ ပြုံနေလို့ထင်တယ်။

ဟု ခရမ်းချဉ် ကုန်သည်တစ်ဦးက ပြောသည်။

မြန်မာနိုင်ငံတွင် ခရမ်းချဉ်သီးကို မန္တလေးတိုင်း၊ ပဲခူးတိုင်း၊ မကွေးတိုင်း၊ ကချင်ပြည်နယ်၊ ရှမ်းပြည်နယ် စသည့် နေရာအနှံ့အပြား၌ စိုက်ပျိုးထုတ်လုပ်နေသည်။

နန်းထက်ထက်ချစ်(ABM)

(ယခုဆောင်းပါးက ဦးကြီးတို့အတွက် အကျိုးတစ်စုံတရာဖြစ်ထွန်းမှု ရှိ /မရှိ ပေါ်မူတည်ပြီး အောက်မှာဖော်ပြပေးထားတဲ့ "အသုံးဝင်ပါတယ်"  "အသုံးမဝင်ပါ" ဆိုတဲ့ စာတန်းလေးကို ရွေးချယ်နှိပ်ပေးဖို့ တောင်းဆိုပါရစေ)