ရေငန်ပုစွန် သားပေါက်ထည့်သွင်းနည်းများနှင့် သားပေါက်အတွက် ကျွေးပေးရမည့်ဖော်စပ်စာ ပြုလုပ်နည်း

ပုစွန်မွေးမြူရာတွင် ရေချိုပုစွန်မွေးမြူခြင်းနှင့် ရေငန်ပုစွန်မွေးမြူခြင်းဟူ၍ နှစ်မျိုးရှိပါသည်။ ပုစွန်မွေးမြူရာတွင် သားပေါက်၊ သားပေါက်မှ တစ်ဆင့် စျေးကွက်ဝင်ပုစွန်တုပ်အဖြစ်ရောက်အောင် အဆင့်ဆင့်မွေးမြူကြရသည်။ ထိုကဲ့သို့ အဆင့်ဆင့်မွေးမြူရာတွင် နေရာဒေသ၊ရာသီဥတု၊ ထိန်းသိမ်းစောင့်ရှောက်ခြင်းအပြင် အကောင်ကြီးထွားနှုန်းကောင်းစေရန်အတွက်လည်း အစာသည် အဓိကနေရာက ပါဝင်နေသည်။

ထို့ကြောင့် ရေငန်ပုစွန်သားပေါက်အတွက် ကျွေးပေးရမည့် ဖော်စပ်စာကို လေ့လာတင်ပြသွားပါမည်။

ရေငန်ပုစွန် သားပေါက်ထည့်သွင်းနည်းများ

အများအားဖြင့် မည်သည့်မွေးမြူရေးလုပ်ငန်းမဆို အကောင်ပေါက်မှ အကောင်ကြီးအဖြစ်သို့ရောက်အောင် မွေးမြူကြရသည်။ မွေးမြူရာတွင်လည်း နည်းစနစ်အမျိုးမျိုးရှိပါသည်။ ရေငန်ပုစွန် မွေးမြူရာတွင် နေရာဒေသ၊ ရာသီဥတု၊ ရေမြေအခြေအနေအရ အနည်းငယ်ကွဲပြားမှုတော့ ရှိနိုင်ပါသည်။ သို့သော် အဓိကအားဖြင့် အခြေခံမွေးမြူနည်း၊ သို့မဟုတ် ကန်အတွင်း သားပေါက်ထည့်သွင်းနည်း ၃ နည်းရှိသည်ဟု သိရသည်။ ကန်ရွေးချယ်ရာတွင် ရေချို၊ ရေငန်နှင့် ရေငန်စပ်သောနေရာများကို မွေးမြူရေးကန်အဖြစ် ပြုလုပ်ကြသည်။ ကန်အတွင်းသားပေါက်ထည့်သွင်းရာတွင် အောက်ပါအတိုင်း ထည့်သွင်းနိုင်သည်။

1. ပထမတစ်နည်းမှာ ပုစွန်သားပေါက်ချိန်တွင်  ကန်အတွင်းသို့ ဒီရေနှင့်အတူ ရေသွင်းပေါက်မှ ပုစွန်သားပေါက်သွင်းပေးခြင်းဖြစ်သည်။ ထိုသို့ ပုစွန်သားပေါက်သွင်းရာတွင် အခြားငါးများ မပါအောင် ဆန်ခါ သို့မဟုတ် ယင်းဖြင့် ကာထားရမည်။ အဆိုပါနည်းသည် ကုန်ကျစရိတ် သက်သာသည်။ သို့သော် ပုစွန်ကန်အတွင်းသို့ အသားစားငါးများ မပါဖို့တော့ လိုပါသည်။
2. ဒုတိယနည်းမှာ ပုစွန်သားပေါက်များကို စနစ်တကျ ရှာဖွေဖမ်းဆီးပြီး ကန်အတွင်းသို့ ထည့်ပေးခြင်း ဖြစ်သည်။
3. တတိယနည်းမှာ ဥကပ်ပုစွန်များကို ရွေးချယ်၍ အခန်းတွင်းသားပေါက်ပြီး ပုစွန်သားပေါက်များကို ကန်အတွင်း ထည့်ပေးခြင်းမျိုးဖြစ်သည်။ပုစွန်မွေးမြူမည့် ကန်အတွင်းရှိရေသည် အနက် ၁ ပေခွဲမှ ၂ ပေ အထိ ရှိရပါမည်။ 

ရေငန်ပုစွန်သားပေါက်အတွက် ဖော်စပ်စာများ

ယခုဖော်ပြမည့် ဖော်စပ်စာသည် ရေငန်ပုစွန်သားပေါက်အတွက် သာမက သားလောင်းများနှင့် သက်နုအဆင့်အထိ အသုံးပြုနိုင်သည်။ ရေငန်ပုစွန်သားပေါက်အတွက် ဖော်စပ်စာနှုန်းမှာ အောက်ပါအတိုင်းဖြစ်ပါသည်။

စပ်စာ-၁

ငါးမှုန့်                 -  ၃၀၀

ပုစွန်ခြောက်မှုန့်  -  ၁၅၀

ပဲပိစပ်မှုန့်         -   ၁၅၀

ဘောစကိုင်းရွက်မှုန့် -    -

ဖွဲနု                 -    ၁၅၀

ဂျုံမှုန့်             -    ၁၅၀

သာကူမှုန့်       -      ၅၀

မြေပဲဆီ         -      ၂၀

ငါးကြီးဆီ       -      ၂၀

ဗီတာမင်စီ     -      သုည ဒသမ ၅

ရေ              -       ၂၀၀

စပ်စာ-၂

ငါးမှုန့်             -    ၁၇၅

ပုစွန်ခြောက်မှုန့်-   ၂၂၅

ပဲပိစပ်မှုန့်       -   ၂၀၀

ဘောစကိုင်းရွက်မှုန့် -  ၁၀၀

ဖွဲနု               -    ၈၀

ဂျုံမှုန့်           -   ၁၀၀

သာကူမှုန့်     -    ၅၀

မြေပဲဆီ     -    ၃၀

ငါးကြီးဆီ  -     ၃၀

ဗီတာမင်စီ -    သုည ဒသမ ၅

ရေ          -     ၂၀၀

စပ်စာ-၃

ငါးမှုန့်        -      ၂၇၅

ပုစွန်ခြောက်မှုန့် - ၂၇၅

ပဲပိစပ်မှုန့်    -       -

ဘောစကိုင်းရွက်မှုန့် -  -

ဖွဲနု            -     ၂၀၀

ဂျုံမှုန့်        -    ၁၅၀

သာကူမှုန့်  -     ၅၀

မြေပဲဆီ     -     ၂၀

ငါးကြီးဆီ  -      ၂၀

ဗီတာမင်စီ  -     သုည ဒသမ ၅

ရေ           -       ၂၀၀ တို့ ဖြစ်သည်။ 

အထက်ဖော်ပြပါ အချိုးအစားများ၏ အလေးချိန်သည် ဂရမ်အလေးချိန်များသာ ဖြစ်သည်။ အထက်ပါ ဖော်စပ်စာပြုလုပ်နည်းများအနက် မိမိနှစ်သက်ရာဖော်စပ်စာကို ပြုလုပ်ကျွေးနိုင်ပါသည်။

နိဂုံးချုပ်အနေဖြင့်ဆိုရလျှင် ရေငန်ပုစွန်သားပေါက်ထည့်သွင်းနည်း ၃ နည်းရှိသည့်အနက် ပထမနည်းသည် အကုန်အကျအသက်သာဆုံး ဖြစ်သည်။ ထို့ကြောင့် ရေငန်ပုစွန်မွေးမြူလိုသူများအတွက် အထောက်အကူဖြစ်စေရန် လေ့လာတင်ပြခြင်းဖြစ်ပါသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။