COVID ဒုတိယလှိုင်းကာလအတွင်း ကြက်သားဈေး တစ်ပိဿာ ၁၇၀၀ အထိ ကျဆင်း

29/09/2020 21:00 PM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား

    COVID ဒုတိယလှိုင်းကာလအတွင်း အသားတိုးကြက်သား ခြံဖမ်းဈေး တစ်ပိဿာလျှင် ၁၇၀၀ ကျပ်အထိ ဈေးနှုန်းကျဆင်းသွားကြောင်း ကိုယ်တိုင်မွေးမြူထုတ်လုပ်နေသူများထံမှ သိရသည်။

ဝယ်လိုအားက အရင်ဈေးကွက်ထက် ၄၀ %လောက်ပဲ ရှိတော့တယ်။ ၆၀ % ကပြုတ်ကျသွားတယ်။ စားသောက်ဆိုင်တွေပိတ်တယ်။ ဟိုတယ်၊ မိုတယ်တွေ လူအဝင်အထွက်ပါးတဲ့အချိန်ဆိုတော့ ကြက်သားဝယ်လိုအားက ပြုတ်ကျသွားတာ။ ကြက်သားဈေးက ခြံဖမ်းဈေး အခုဆိုရင် တစ်ပိဿာကိုမှ ၁,၆၀၀၊ ၁,၇၀၀ လောက်ပဲ ရှိတယ်။ ဒီလပိုင်းမှာတော့ တောက်လျှောက် ဆက်ပြီးရှုံးသွားဦးမှာပါ။

ဟု မြန်မာနိုင်ငံ အသားတိုးကြက်မွေးမြူထုတ်လုပ်သူများအစုအဖွဲ့ ဥက္ကဌ ဒေါက်တာကျော်ဝင်းက ပြောသည်။

    ၂၀၂၀ ခုနှစ်၊ အောက်တိုဘာလကုန်မှ စတင်၍ ကြက်သားဈေးနှုန်းများ ပြန်လည်မြင့်တက်လာရန် မွေးမြူသူများ မျှော်လင့်ထားကြကြောင်း သိရသည်။

ဈေးကွက်အခုလိုဖြစ်နေတော့ ပြည်ပ (ထိုင်းနိုင်ငံ) ကနေ ကြက်ပေါက်တင်သွင်းနေတာကို အောက်တိုဘာလတစ်လ ရပ်ဆိုင်းထားမယ်လို့ မွေးမြူရေးနှင့်ကုသရေးဦးစီးဌာနက အတည်ပြုထားတယ်။ နောက်ပြီး အခုလတ်တလောမှာ ကြက်သားဈေးတအားကျနေတာကြောင့် မွေးမြူသူတွေဘက်ကလည်း ကြက်သားထုတ်လုပ်မှုကိုလည်း လျော့ချလာကြမှာရယ်ကြောင့် ကြက်ဈေးက ပြန်တက်လာဖို့ရှိတယ်။ ဒီအောက်တိုဘာလတော့ ပြန်မတက်လောက်သေးဘူး။ နိုဝင်ဘာလလောက်မှာ ပြန်တက်လောက်မယ်လို့ ခန့်မှန်းထားတယ်။

ဟု ဦးကျော်ဝင်းက ဆက်လက်ပြောသည်။

    ယခုကဲ့သို့ အသားတိုးကြက် ခြံဖမ်းဈေးများ ကျဆင်းသွားခြင်းကြောင့် ကြက်မွေးမြူထုတ်လုပ်သူများအနေဖြင့် ကြက်အကောင်ရေ (၁,၀၀၀) လျှင် ငွေ (၁၅) သိန်းဝန်းကျင်အထိ ဆုံးရှုံးနစ်နာမှုများ ကြုံတွေ့နေရကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။