Airplane Mode အကြောင်းသိကောင်းစရာ

“ခေတ်မီတောင်သူဖြစ်ဖို့ ဒစ်ဂျစ်တယ်နည်းပညာ လေ့လာစို့” အစီစဥ်လေးကနေ ပြန်လည်ကြိုဆိုလိုက်ပါတယ် ခင်ဗျ။

ယခုတစ်ပတ်မှာတော့ Airplane Mode (အဲပလိုင်းမုဒ်) အကြောင်းကို တောင်သူဦးလေး ဒေါ်လေးတို့အတွက် မျှဝေပေးသွားမှာ ဖြစ်ပါတယ်။

Airplane mode ဆိုတာက ဖုန်း, tablet (တက်ဘလက်) စတဲ့ နည်းပညာဆိုင်ရာပစ္စည်းတွေရဲ့ ဆက်သွယ်ရေးဆိုင်ရာလုပ်ဆောင်ချက်တွေကို ပိတ်ပစ်နိုင်တဲ့ setting (ဆက်တင်)ကိုပြောတာဖြစ်ပါတယ်။ Airplane mode ပြောင်းထားလိုက်ပြီဆိုတာနဲ့ ဖုန်းမျက်နှာပြင်ရဲ့အပေါ်ဘက်မှာ လေယာဥ်ပျံ icon လေးတစ်ခုကိုအလွယ်တကူမြင်တွေ့ရမှာ ဖြစ်ပါတယ်။ Airplane mode ဖွင့်လိုက်တဲ့အချိန်မှာ ဖုန်းရဲ့လုပ်ဆောင်ချက်အချို့ကို ဖြတ်တောက်လိုက်ပြီဖြစ်တာကြောင့် ဖုန်းခေါ်ဆိုတာမျိုး၊ အင်တာနက်၊ ဝိုင်ဖိုင်အသုံးပြုတာမျိုး လုပ်လို့ရတော့မှာ မဟုတ်ပါဘူး။ ဖုန်းအားသွင်းတဲ့အခါ Airplane mode ဖွင့်ပြီးသွင်းမယ်ဆိုရင်တော့ ၂၅ ရာခိုင်နှုန်းအားပြည့်မြန်တယ်ဆိုတာ ယခင်ကဆောင်းပါးတစ်ခုမှာ မျှဝေပေးခဲ့ပြီး ဖြစ်ပါတယ်။

Airplane mode ရဲ့ အဓိက မူလရည်ရွယ်ချက်ကတော့ လေယာဥ်စီးတဲ့အခါအသုံးပြုဖို့ တီထွင်ဖန်တီးထားတာဖြစ်ပါတယ်။ လေယာဥ်ပေါ်မှာဖုန်းခေါ်ဆိုတာတွေ၊ အင်တာနက်သုံးတာတွေဟာ လေယာဥ်ပျံသန်းမှုနဲ့ ဆက်သွယ်ရေးဆိုင်ရာလုပ်ဆောင်ချက်တွေ၊ စက်ကိရိယာထိန်းချုပ်ခြင်းဆိုင်ရာ လုပ်ဆောင်ချက်တွေအပေါ်မှာ အနှောက်အယှက်ဖြစ်စေနိုင်ပါတယ်။ ဖုန်းလိုင်းတွေရဲ့ နှောက်ယှက်မှုကြောင့် လေယာဥ်ထိန်းချုပ်ခြင်းစနစ်ဟာမြေပြင်က ဆက်သွယ်ရေးစနစ်နဲ့ ပြတ်တောက်သွားနိုင်ပြီး အန္တရာယ်ရှိတာကြောင့် Airplane mode ကို အသုံးပြုရတာဖြစ်ပါတယ် ခင်ဗျ။

တောင်သူ ဦးလေး ဒေါ်လေးတို့ရော လေယာဥ်ပုံစံ Airplane mode လုပ်ဆောင်ချက်ကို ဘယ်အချိန်မှာ အသုံးပြုကြလဲဆိုတာ ကွန်မန့်မှာ ဆွေးနွေးခဲ့လို့ရပါတယ် ခင်ဗျ။

ယခင်တစ်ပတ်က ဖော်ပြခဲ့တဲ့ ဆောင်းပါးလေး ပြန်လည်ဖတ်ရှုချင်ရင်တော့ ဖော်ပြပါ လင့်ကနေတစ်ဆင့် ဝင်ရောက်ဖတ်ရှုနိုင်ပါတယ် ခင်ဗျ။

အင်တာနက်ပေါ်ရှိ ဓာတ်ပုံများကို စိစစ်ခြင်း

http://www.lwinpyin.com/ မှကိုးကားရေးသားထားပါသည်။