တစ်ပတ်တာအတွင်း ဈေးကွက်သုံးသပ်ချက်

(၃၀.၁၁.၂၀၂၁) မှ (၃.၁၂.၂၀၂၁) ထိ အပြောင်းအလဲဖြစ်ပေါ်ခဲ့သည့် လယ်ယာထွက်ကုန်သီးနှံများ

ဆန်၊ စပါး

ဆန်အဟောင်းစပါးအဟောင်းတွေကတော့ လက်ကျန်မရှိသလောက်ဖြစ်နေပြီး ဈေးတွေကလည်း အပြောင်းအလဲ မရှိတော့ပါဘူး။ နယ်အချို့မှာ စပါးဆန် အသစ်တွေ ဆက်တိုက် ထွက်ရှိနေပါတယ်။ ဆန် အသစ်တွေကတော့ ဈေးလျော့နည်းပါတယ်။

ရန်ကုန်ဈေးကွက်မှာတော့ လက်တလော အဟောင်းတွေရော အသစ်တွေ ထွက်ရှိနေပြီး အသစ်တွေကတော့ ဈေးအနည်းငယ်အတက်အကျရှိပါတယ်။

ဝါးတန်းဈေးကွက်မှာ ဖျာပုံပေါ်ဆန်းနဲ့ ဒေးဒရဲပေါ်ဆန်းက တစ်အိတ်ကို ၄၅၀၀၀ ကနေ ၄၇၀၀၀ ပေါက်ဈေးရှိပြီးဈေးငြိမ်ပါတယ်။ မြောင်းမြပေါ်ဆန်းကတော့ ၄၆၀၀၀ ကနေ ၅၀၀၀၀ ပေါက်ဈေးရှိ ပြီး အပြောင်းအလဲ မရှိပါဘူး။ ပေါ်ဆန်းနယ်စုံကတော့ တစ်အိတ်ကို ၄၃၀၀၀ ကနေ ၄၅၀၀၀ ပေါက်ဈေးရှိပြီး ၅၀၀ ကျပ်ဈေးကျဆင်းသွားပါတယ်။ ဆန်ကြမ်းဖြစ်တဲ့ ငစိန်(အသစ်)က တစ်အိတ်ကို ၂၂၈၀၀ ကနေ ၂၃၅၀၀ ပေါက်ဈေးရှိပြီး ၅၀၀ ကျပ်ဈေးကျဆင်းပါတယ်။ ဧည့်မထ၂၅မှတ်တန်ကတော့ တစ်အိတ်ကို ၂၂၅၀၀ ကနေ ၂၃၀၀၀ ပေါက်ဈေးရှိပြီး ၅၀၀ ကျပ်ဈေးတက်လာပါတယ်။

ဧရာဝတီတိုင်းဈေးကွက်မှာလည်း အသစ်တွေ ပေါ်လာပြီဖြစ်ပါတယ်။ ပုသိမ်ပေါ်ဆန်းစပါး(သစ်)က တင်း ၁၀၀ ကို ၉၂၀၀၀၀ ပေါက်ဈေးရှိပြီး ဆန်ကတော့ တစ်အိတ် ကို ၃၈၀၀၀ ပေါက်ဈေးရှိပါတယ်။ ပုသိမ်ဧည့်မထစပါးမိုး(သစ်)ကတော့ တင်း ၁၀၀ ကို ၆၄၄၀၀၀ ပေါက်ဈေးရှိပြီး ဆန်ကတော့ တစ်အိတ်ကို ၂၃၀၀၀ ပေါက်ဈေးရှိပါတယ်။

မြောင်းမြပေါ်ဆန်းစပါး(သစ်)ကတော့ တင်း ၁၀၀ ကို ၉၃၇၅၀၀ ပေါက်ဈေးရှိပြီး ဆန်ကတော့ တစ်အိတ် ကို ၃၅၀၀၀ ပေါက်ဈေးရှိပါတယ်။ မြောင်းမြဧည့်မထစပါးမိုး(သစ်)ကတော့ တင်း ၁၀၀ ကို ၆၈၅၀၀၀ ပေါက်ဈေးရှိပြီး ဆန်ကတော့ တစ်အိတ်ကို ၂၅၀၀၀ ပေါက်ဈေးရှိပါတယ်။

မအူပင်ပေါ်ဆန်းစပါး(သစ်)ကတော့ တင်း ၁၀၀ ကို ၉၂၀၀၀၀ ပေါက်ဈေးရှိပြီး ဆန်ကတော့ တစ်အိတ်ကို ၃၆၀၀၀ ကျပ်ပေါက်ဈေးရှိပါတယ်။ မအူပင်ဧည့်မထစပါးမိုး(သစ်)ကတော့ တင်း ၁၀၀ ကို ၅၈၀၀၀၀ ပေါက်ဈေးရှိပြီး ဆန်ကတော့ တစ်အိတ်ကို ၂၁၅၀၀ ပေါက်ဈေးရှိပါတယ်။

အချို့မြို့နယ်တွေမှာတော့ အသစ်တွေမထွက်သေးပဲ အဟောင်းဈေးတွေကတော့ ငြိမ်နေပါတယ်။

မတ်ပဲ

မတ်ပဲကတော့ လက်တလောမှာ ဈေးတက်လာတယ်လို့ပြောလို့ရပေမယ့် တစ်ပတ်အတွင်းမှာတော့ အတက်အကျက မငြိမ်ပါဘူး။ ပြီးခဲ့တဲ့ နိုဝင်ဘာတစ်လလုံး အကျဈေးနဲ့ ရှိနေခဲ့ပြီး နိုဝင်ဘာ နောက်ဆုံးအပတ်မှာ တစ်တန်ကို ၁၄ သိန်း ၃ သောင်းထိ ပေါက်ဈေးရှိခဲ့ပြီး တစ်တန်ကို ၄ သောင်းနီးပါးလောက်ဈေးတက်လာခဲ့ပါတယ်။

စက်တင်ဘာလလောက်မှာ တစ်တန်ကို ငွေကျပ် သိန်း ၂၀ ကျော်အထိ ငွေကြေးပြောင်းလဲမှုနဲ့အတူ ဈေးတွေတက်ခဲ့ချိန်နဲ့ နှိုင်းယှဉ်ရင်တော့ လက်ရှိပေါက်ဈေးက ကျတယ်လို့ ဆိုလို့ရပါတယ်။ အဓိက ဒေါ်လာ ပေါက်ဈေးလျော့နည်းသွားလို့လည်းဖြစ်ပါတယ်။

အိန္ဒိယနိုင်ငံမှာလည်း ဈေးအနည်းငယ်ပြန်တက်လာလို့ ပြည်တွင်းပေါက်ဈေး အနည်းငယ်တက်လာပေမယ့် ပဲကုန်သည်တွေ ထိန်းဝယ်ယူနေလို့ အတက်အကျကတော့ အများကြီး မရှိပါဘူး။

လက်ရှိ ရန်ကုန်ဈေးကွက်မှာတော့ မတ်ပဲက တစ်တန်ကို ၁၄၁၅၀၀၀ ပေါက်ဈေးရှိပြီး ဈေးအနည်းငယ်သာကျဆင်းပါတယ်။

မန္တလေးဈေးကွက်မှာတော့ တစ်အိတ်ကို ၁၃၅၀၀၀ ကနေ ၁၃၇၀၀၀ကြား ပေါက်ဈေးရှိပြီး ဈေးအပြောင်းအလဲ အများကြီးမရှိပါဘူး။

အောင်လံဈေးကွက်မှာလည်း တစ်တင်းကို ၄၄၅၀၀ ပေါက်ဈေးရှိပြီး ဈေးငြိမ်ပါတယ်။

ပြည်ဈေးကွက်မှာတော့ တစ်တင်းကို ၄၅၅၀၀ ကနေ ၄၆၀၀၀ ပေါက်ဈေးရှိပြီး ၅၀၀ ကျပ်ဈေးကျဆင်းသွားပါတယ်။

ပဲစင်းငုံနီ

ပဲစင်းငုံနီကတော့ ပြီးခဲ့တဲ့အပတ်က ဈေးတက်လာပေမယ့် ဒီတစ်ပတ်မှာတော့ ဈေးကပြန်ကျဆင်းသွားပါတယ်။

အိန္ဒိယမှာ ဈေးတွေတက်လို့ ပဲဈေးက တက်လာခဲ့ပေမယ့် အိန္ဒိယမှာ ပဲအသစ်တွေပေါ်နေပြီဖြစ်တဲ့အတွက် ဝယ်ယူမှုလျော့နည်းသွားလို့ စက်တင်ဘာလနဲ့နှိုင်းယှဉ်ရင်တော်တော် ဈေးက ကျဆင်းသွားခဲ့ပါတယ်။ ဒါပေမမယ့် မိုးအဆမတန်ရွာသွန်းမှုတွေကြောင့် ပဲအထွက်နှုန်းကလည်း လျော့နည်းနိုင်တယ်လို့ ကြေညာထားတဲ့အတွက် ပဲစင်းငုံနီဈေးကတော့ လက်တလောမှာ မှန်းဆရခက်နေပါတယ်။

မြန်မာပြည်တွင်းမှာတော့ လက်ကျန်မရှိတဲ့အတွက် နေရာအများစုမှာ ဈေးအဖွင့်မရှိတော့ပဲ တင်ပို့မှုပဲ ရှိနေတာဖြစ်တယ်လို့ ကုန်သည်တွေထံကနေသိရပါတယ်။

ရန်ကုန်ဈေးကွက်မှာ တစ်တန်ကို ၁၁ သိန်း ၅သောင်း ကျော် ပေါက်ဈေးရှိနေပြီး ပြီးခဲ့တဲ့အပတ်နဲ့ယှဉ်ရင် တစ်တန် ကို ၃ သောင်းနီးပါးဈေးပြန်ကျဆင်းသွားပါတယ်။

မန္တလေးမှာတော့လက်ရှိအချိန်ထိ ဈေးဖွင့်ခြင်းမရှိသေးပါဘူး။

အောင်လံဈေးကွက်မှာတော့ တစ်တင်းကို ၃၅၀၀၀ ပေါက်ဈေးရှိပြီး ဈေးအပြောင်းအလဲ မရှိပါဘူး။

စားတော်ပဲ

စားတော်ပဲကတော့ လက်ရှိမှာ အမြင့်ဆုံးရောက်ရှိနေပါတယ်။ ပြည်ပကနေ ပဲအဝင်မရှိတဲ့အတွက် ပြည်တွင်းစားသုံးမှုအများဆုံးဖြစ်တဲ့ စားတော်ပဲက အပတ်စဉ်ဈေးတက်နေခဲ့တာဖြစ်ပါတယ်။

ရန်ကုန်ဈေးကွက်မှာ စားတော်ပဲက တစ်ပိဿာကို ၄၀၈၀ ကနေ ၄၆၇၀ ပေါက်ဈေးရှိပြီး တစ်ပိဿာကို ၃၃၅ ကျပ်ဈေးတက်လာပါတယ်။

မန္တလေးဈေးကွက်မှာတော့ သုံးတင်းဝင်တစ်အိတ်ကို ၁၄၀၀၀၀ ကနေ ၂၂၀၀၀၀ ပေါက်ဈေးရှိပြီး ဈေးငြိမ်ပါတယ်။ ပဲလက်ကျန်မရှိတဲ့အတွက်အတက်ဈေးနဲ့ ဈေးငြိမ်နေခဲ့ပါတယ်။

ဆင်ဖြူကျွန်းမှာတော့ တစ်တင်းကို ၈၅၀၀၀ ပေါက်ဈေးရှိပြီး တစ်တင်းကို ၅၀၀၀ ကျပ်ဈေး တက်လာပါတယ်။ ဈေးဖွင့်ပေမယ့် လက်ကျန်မရှိလို့ အရောင်းအဝယ်မရှိဘူးလို့သိရပါတယ်။

ပြည်ဈေးကွက်မှာလည်း တစ်တင်းကို ၈၀၀၀၀ ပေါက်ဈေးရှိပြီး တစ်တင်းကို ၅၀၀၀ ကျပ်ဈေးတက်လာပါတယ်။

စားတော်ပဲက တစ်လအတွင်း တစ်ပိဿာကို ၁၀၀၀ နီးပါးဈေးတက်လာခဲ့တာဖြစ်ပြီးတော့ လက်ရှိ ပဲမျိုးစုံထဲမှာ အမြင့်ဆုံး ဈေးရရှိနေတဲ့ ပဲလည်း ဖြစ်ပါတယ်။

နှမ်းဖြူ

ပြီးခဲ့တဲ့အပတ်က ဈေးတက်ခဲ့တဲ့ နှမ်းဖြူဈေးက ဒီတစ်ပတ်မှာတော့ဈေးပြန်ကျဆင်းပါတယ်။ အဝယ်လျော့ နည်းလို့ဈေးကျဆင်းတယ်လို့သိရပါတယ်။

မန္တလေးဈေးကွက်မှာ နှမ်းဖြူက တစ်အိတ်ကို ၁၄၅၀၀၀ ကနေ ၁၅၀၀၀၀ ပေါက်ဈေးရှိပြီး တစ်အိတ်ကို ၁၃၀၀၀ ကျပ်ဈေးကျဆင်းသွားပါတယ်။

အောင်လံဈေးကွက်မှာတော့ တစ်အိတ်ကို ၁၃၀၀၀၀ ကျပ်ရှိပြီး ဈေးငြိမ်နေပါတယ်။

ဆင်ဖြူကျွန်းမှာလည်း တစ်တင်းကို ၄၅၀၀၀ ပေါက်ဈေးရှိဈေးငြိမ်ပါတယ်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...