ကမ္ဘောဒီးယားတွင် အမျိုးသားတစ်ဦး မိကျောင်းကန်တွင်း ပြုတ်ကျသေဆုံး

ကမ္ဘောဒီးယားမြောက်ပိုင်းမှာ မိကျောင်းမွေးမြူရေးသမားတစ်ဦး မိကျောင်းကန်တွင်းပြုတ်ကျခဲ့ပြီး မိကျောင်း တွေရဲ့ ကိုက်စားသတ်ဖြတ်ခြင်းခံခဲ့ရတယ်လို့ ဒေသတွင်းရဲတွေထံကသိရကြောင်း BBC သတင်းတစ်ပုဒ်မှာ ဖော်ပြထားပါတယ်။

လွမ်နမ်လို့ခေါ်တဲ့ အဲ့ဒီ ၇၂ နှစ်အရွယ်အမျိုးသားဟာ မိကျောင်းတစ်ကောင်ကို နေရာရွှေ့ဖို့လုပ်ဆောင်နေစဉ် အဲ့ဒီမိကျောင်းက သူ့ရဲ့ တုတ်တံကို ဆတ်ခနဲဆွဲယူချလိုက်တာဖြစ်တယ်လို့ သိရပါတယ်။

“ တခြားမိကျောင်းတွေကပါ သူ့ကို ဝိုင်းဝန်းတိုက်ခိုက်ကြတော့ သူသေသွားတယ်” လို့ ရဲချုပ် မေဆက်ဘရီက AFP သတင်းဌာနကို ပြောကြားခဲ့တယ်လို့ သိရပါတယ်။

ဒီအဖြစ်အပျက်ဟာ မြို့တော် ဆီရမ်ရိအနီးမှာ ပြီးခဲ့တဲ့သောကြာနေ့က ဖြစ်သွားခဲ့တာပါ။

“ မစ္စတာနမ်ရဲ့ခန္ဓာကိုယ်မှာ မိကျောင်းကိုက်ရာတွေနဲ့ပြည့်နေပြီး လက်တစ်ဖက်လည်းပျောက်သွားပါတယ်” လို့ ရဲချုပ် မေဆက်ဘရီက ဆိုပါတယ်။

မိကျောင်းကိုက်ခံလို့သေဆုံးသွားသူဟာ ဒေသတွင်းမိကျောင်းမွေးမြူရေးတောင်သူအဖွဲ့အစည်းရဲ့ ဥက္ကဋ္ဌလည်း ဖြစ်တယ်လို့ ဆိုပါတယ်။

၂၀၁၉ ခုနှစ်တုန်းကလည်း ကမ္ဘာ့နာမည်ကျော် အန်ကောဝပ်ဘုရားကျောင်းအနီး ဒီဒေသတွင်းက အလားတူ မိကျောင်းမွေးမြူရေးကန်တစ်ကန်မှာပဲ ၂ နှစ်အရွယ်မိန်းကလေးတစ်ယောက် မိကျောင်းတွေရဲ့သတ်ဖြတ်စားသောက်ခြင်းခံခဲ့ရဖူးတယ်လို့ သိရပါတယ်။

အရှေ့အာရှနိုင်ငံတွေမှာ မိကျောင်းတွေကို ဥတွေ၊ သားရေတွေနဲ့ အသားတွေအတွက် ရည်ရွယ်မွေးမြူကြတာ ဖြစ်ပါတယ်။

Ref: https://www.bbc.com/news/world-asia

ဆောင်းပါးများ/ သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။