အိန္ဒိယတောင်သူ သိန်းပေါင်းများစွာ ၈ နှစ်အတွင်း ဝင်ငွေနှစ်ဆတိုးလာ

အိန္ဒိယအစိုးရ၊ ပညာရှင်တွေနဲ့ လယ်ယာအဖွဲ့အစည်းတွေရဲ့ အားစိုက်ကူညီမှုနဲ့အတူ အိန္ဒိယရဲ့ စိုက်မွေးတောင်သူ သိန်းပေါင်းများစွာဟာ ၈ နှစ်အတွင်း ဝင်ငွေနှစ်ဆတိုးလာတယ်လို့ အိန္ဒိယစိုက်ပျိုးမွေးမြူရေးဝန်ကြီး နာရင်ဒရာဆင်းတိုမာက ပြောလိုက်တာပါ။

လွန်ခဲ့တဲ့ ၈ နှစ်အတွင်း ဝင်ငွေ ၂ ဆ (သို့) ၂ ဆကျော်တိုးလာတဲ့ တောင်သူ ၇ သိန်းခွဲရဲ့အောင်မြင်မှုတွေကို စာရင်းပြုစုထားတဲ့ အိန္ဒိယစိုက်ပျိုးရေးသုတေသနကောင်စီရဲ့ ထုတ်ပြန်ချက်ကိုကိုးကားပြီး တိုမာက ပြောတာပါ။ 

ဒီကောင်စီက စာရင်းပြုစုထားတဲ့ လယ်သမားတွေထဲမှာ ဝင်ငွေ ၁၂၅.၄၄ ရာခိုင်နှုန်းကနေ ၂၇၁.၆၉ ရာခိုင်နှုန်းထိ တိုးလာသူတွေပါနေပါတယ်။ အထူးသဖြင့်တော့ ပြည်နယ်အများစုက ဥယျာဉ်ခြံသီးနှံနဲ့ လယ်ယာသီးနှံစိုက်ပျိုးနေသူတွေ ပါဝင်နေတာပါ။

‘ ၂၀၂၂ ခုနှစ်ကျရင် လယ်သမားတွေ ဝင်ငွေနှစ်ဆ တိုးစေရမယ်’ ဆိုတဲ့ ရည်မှန်းချက်ကို အိန္ဒိယအစိုးရက ၂၀၁၆ ခုနှစ်မှာ စတင်ချမှတ်ဆောင်ရွက်ခဲ့တာပါ။

“ ပြီးခဲ့တဲ့ ၈ နှစ်အတွင်းမှာ စိုက်ပျိုးမွေးမြူရေးကဏ္ဍကြီး အားကောင်းလာဖို့အတွက် အဖက်ဖက်က အားစိုက်မြှင့်တင်မှုတွေလုပ်ခဲ့ပါတယ်။ သိန်းပေါင်းများစွာသော တောင်သူတွေဟာ ဝင်ငွေ ၂ ဆ ဖြစ်လာရုံတင်မကဘူး၊ ဝင်ငွေ ၂ ဆကျော်တဲ့လယ်သမားတွေလည်း အများကြီးရှိခဲ့ပါတယ်” လို့ ဝန်ကြီး နာရင်ဒရာဆင်းတိုမာက ဆိုပါတယ်။

အိန္ဒိယစိုက်ပျိုးရေးသုတေသနကောင်စီအနေနဲ့ လယ်ယာသီးနှံ၊ ဥယျာဉ်ခြံသီးနှံ စိုက်ပျိုးသူတွေ၊ မွေးမြူရေးနဲ့ရေလုပ်ငန်းလုပ်ကိုင်သူတွေထဲက အောင်မြင်နေတဲ့ တောင်သူတွေရဲ့အကြောင်း အကျဉ်းချုပ်ကို စာရင်းပြုစု မျှဝေခဲ့တာပါ။ 

ဥယျာဉ်ခြံသီးနှံစိုက်ပျိုးရေးကရတဲ့ဝင်ငွေဟာ ပြည်နယ် ၁၄ ခုမှာ အဓိကအကျဆုံးဝင်ငွေဖြစ် နေတယ်လို့ ကောင်စီဘက်က ဆိုပါတယ်။

နောက်ထပ် ပြည်နယ် ၁၁ ခုမှာတော့ ၂၀၁၆-၁၇ ကနေ ၂၀၂၀-၂၁ အတွင်း လယ်ယာသီးနှံက ရတဲ့ဝင်ငွေ လျော့ကျသွားပေမယ့် အဓိကဝင်ငွေအဖြစ်တော့ ဆက်လက်လွှမ်းမိုးမှုရှိနေဆဲဖြစ်ပါတယ်။ 

မဏိပူရ်နဲ့ နာဂလန်းအပါအဝင် နောက်ထပ်ပြည်နယ် ၄ ခုမှာတော့ မွေးမြူရေးက အဓိကဝင်ငွေ အဖြစ် လွှမ်းမိုးမှုရှိနေတယ်လို့ ဆိုပါတယ်။

‘ လယ်သမားတွေရဲ့ဝင်ငွေနှစ်ဆဖြစ်လာတာက စိုက်ပျိုးမွေးမြူရေးကဏ္ဍတစ်ခုလုံး၊ နိုင်ငံတစ်ခုလုံး၊ မြေယာအတန်းအစားတစ်ခုလုံးမှာ ဖြစ်နိုင်ပါတယ်။ သိပ္ပံနဲ့နည်းပညာရဲ့ကိုင်တွယ်မောင်းနှင်မှုနဲ့အတူ ဒီလိုဝင်ငွေတွေဖြစ်လာတာက အစစ်အမှန်ပါပဲ။ ဒါဟာ နိုင်ငံအနှံ့က အုပ်ချုပ်ရေးပိုင်းနဲ့ မူဝါဒပိုင်းဆိုင်ရာ ကျောထောက်နောက်ခံ ထောက်ပံ့ကူညီမှုတွေကို ဆွဲဆောင်နိုင်ဖို့လည်း ဖြစ်နိုင်ပါတယ်’ လို့လည်း အိန္ဒိယစိုက်ပျိုးရေးသုတေသနကောင်စီက ဆိုထားပါတယ်။

Ref; https://bit.ly/3PyPihK

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။