ဂျပန်အီးအမ်အစစ် (Kyusei EM )နှင့် လက်ဖြစ်အီးအမ်ဘာတွေကွာသလဲ..

အီးအမ်နဲ့ပတ်သက်လို့ သိသင့်တာလေးတွေ နည်းနည်းပြောချင်ပါတယ်။

အီးအမ်ကို တောင်သူများ သိနေကြပြီဆိုပေမဲ့ အများစုက အရပ်လက်ဖြစ်အီးအမ်နည်းပညာကိုသာ သိနေကြတာများပါတယ်။

Kyusei EM ဆိုတာ အဆင့်မြင့်သိပ္ပံပညာတစ်ခုဖြစ်တဲ့ mixture technology ကို အခြေခံပြီး sterilization လုပ်ထားတဲ့ ဓာတ်ခွဲခန်းမှာအစပျိုးလုပ်ယူထားတာပါ။ လေဟာနယ်မှာ လုပ်နေတဲ့ လက်ဖြစ်အီးအမ်တွေနဲ့ နည်းပညာအဆင့်အတန်း နိုင်းယှဉ်လို့မရအောင်ကွာသလို အာနိသင်လည်း အဆပေါင်းများစွာ ကွာပါတယ်။

ဂျပန်အီးအမ်ဟာ လက်မှတ်ရကျွမ်းကျင် အလုပ်သမားများကို ခေါင်းဆောင်အဆင့်ဆင့်ဖြင့် စနစ် တကျ ဖွဲ့စည်းထားသော အင်အားကြီးသော အလုပ်သမားတပ်ဖွဲ့ကြီးကဲ့သို့ဖြစ်ပြီး လက်ဖြစ်အီးအမ်ကတော့ ဒေသတွင်းရှိ အလုပ်မရှိသော အလုပ်လိုချင်သော အလုပ်သမားများကို စုစည်းထားတဲ့ သေးငယ်သော အလုပ်သမား အစုအဝေးတစ်ခုနှင့် တူပါတယ်။

ဒါကြောင့် အာနိသင်ချင်း အဆမတန်ကွာခြားပါတယ်။ သူတို့လည်း အလုပ်လိုချင်သူများ ဖြစ်လို့ အနည်းအကျဉ်း အလုပ်လုပ်နိုင်ပေမဲ့ လက်မှတ်ရဂုဏ်သရေရှိ အလုပ်သမားများ မဟုတ်လို့ အလုပ်ရှင်ကို ပြန်လည်ရန်ပြုနိုင်သော အခွင့်အလမ်းများလည်းရှိပါတယ်။ ထို့ကဲ့သို့ပင် လက်ဖြစ်အီးအမ်များဟာ အနည်းအကျဉ်း အလုပ်ဖြစ်ပေမဲ့း ပြုလုပ်ရာမှာ သန့်ရှင်းမှု စနစ်ကျမှု အားနည်းလျှင်နည်းသလို သီးနှံပင်ကို ပြန်လည်ရန်ပြုမဲ့ရောဂါပိုးများ ပါဝင်လာပြီး ပွားများဒုက္ခပေးနိုင်ပါတယ်။

ကျွန်တော်ရေးတဲ့ အီးအမ်စာအုပ်ထဲက အီးအမ်သီအိုရီတွေ အယူအဆတွေက EMRO (EM Research Organization) ကထုတ်တဲ့ Kyusei EM နဲ့ပဲ ဆိုင်ပါတယ်။ တချို့က ပုံတူကူးချပြီး ဘာတွေပါမှန်းပင်မသိရသောလက်ဖြစ်အီးအမ်တွေနဲ့ ဒီသီအိုရီတွေကို ရောရေးနေကြပါတယ်။ မဖြစ်သင့်ပါဟု ပြောလိုပါတယ်။ တကယ်တော့ EM ဟာ Kyusei ရဲ့ trade mark ပါ။ တခြားသူတွေ ဒီနာမည်ကို trade mark အနေဖြင့် သုံးမရပါ။

လက်ဖြစ်အီးအမ်လုပ်နည်းများကို ကျွန်တော်တို့ကိုယ်တိုင်လည်း တောင်သူများကို သင်ပေးခဲ့ ပါတယ်။ ဒါပေမဲ့ Kyusei EM နဲ့ မတူကြောင်းတော့ သင်ပေးရပါတယ်။ ကျွန်တော်တို့ကတော့ အဲဒါတွေကို အီးအမ်လို့ မခေါ်ပါဘူး။ IM (Indigenous Microorganism )လို့ပဲ ခေါ်ပါတယ်။ ယခင်က Kyusei EM ဝယ်ရခက်ခဲလို့ ဝယ်မရသော အစွန်းအဖျားဒေသများအတွက် သင်ပေးခြင်းဖြစ်ပါတယ်။ ယခုအခါ စက်ရုံထုတ် အီးအမ်အစစ်ကို တင်သွင်းရောင်းချနေသူ အများအပြားရှိနေပြီဖြစ်ပါတယ်။

ဂျပန်အီးအမ်အစစ်တွင် လေမဲ့စနစ်ဖြင့်သာ မွေးမြူ၍ရတဲ့ pure anerobic Photosynthetic Bacteria များပါဝင်ပြီး ၎င်းတို့ဟာ ပျားဘုရင်မကဲ့သို့ အီးအမ် အဏုဇီဝအားလုံးကို ထိန်းချုပ်အလုပ်လုပ်ပေးပါတယ်။ ၎င်းတို့မပါလျှင် အီးအမ်အဏုဇီဝများ ကောင်းစွာအလုပ်မလုပ်နိုင်ပါ။ လေဟာပြင်ထဲတွင် အထိန်းအချုပ်မဲ့ လုပ်ရသော လက်ဖြစ်အီးအမ်အများစုမှာတော့ Photosynthetic Bacteria မပါ ပါ။ ပါလျှင်လည်း Facultative anaerobic (ရံဖန်ရံခါ လေမဲ့) အဆင့်လောက်သာ ပါမှာဖြစ်ပါတယ်။

တကယ်တော့ ဂျပန်အီးအမ်အစစ်ဟာ အဆင့်ဆင့် အဆများစွာပွားနိုင်သောကြောင့် လက်ဖြစ်အီးအမ် ထက်ပင် ဈေးသက်သာပါတယ်။ လက်ဖြစ်အီးအမ်များကတော့ ထိုသို့ မပွားနိုင်ပါ။ ပွားလျှင်လည်း ရေထဲမှ အခြားအဏုဇီဝများကိုယှဉ်ပြိုင်မပွားနိုင်သောကြောင့် မလိုအပ်သော အခြားအဏုဇီဝများ ပါလာတဲ့ အာနိသင်အလွန်နည်းသော မသန့်ရှင်းသောအီးအမ်သာရမှာဖြစ်ပါတယ်။ ဒါကြောင့် စာရေးသူအနေဖြင့် မြန်မာပြည်တွင် လုပ်နေသော လက်ဖြစ်အီးအမ်များအစား စက်ရုံထုတ် ဂျပန်အီးအမ် အစစ်ကိုသာ ဝယ်ယူသုံးစွဲသင့်တယ်လို့ အကြံပြုလိုပါတယ်။

ကျွန်တော့အနေဖြင့် Kyusei EM (ဂျပန်အီးအမ်အစစ်) အကြောင်း အတော်များများပြောဖူးပါတယ်။ ကျွန်တော်ရေးသားပြောဆိုနေသော အီးအမ်နှင့် ပတ်သက်သော အကြောင်းအရာများဟာ မြန်မာပြည် အနေအထား၊ မြန်မာတောင်သူများအတွက် အသင့်တော်ဆုံးပုံစံများကိုသာ ပြောဆိုနေခြင်းဖြစ်ပါတယ်။ ထိုအကြောင်းအရာများဟာလည်း ဂျပန်များ မြန်မာပြည်လာရောက်စဉ်က ကျွန်တော့ကို သင်ကြားပေးခဲ့သော အချက်အလက်များ အတိအကျပင်ဖြစ်ပါတယ်။ ကျွန်တော့သဘောနှင့် ပြုပြင်ထားခြင်းမရှိပါ။

အကယ်၍ မြန်မာလူမျိုးတစ်ယောက်ဟာ ဂျပန်ရောက်၍ဖြစ်စေ၊ ဂျပန်များပေးသောအီးအမ်သင်တန်းများကို နိုင်ငံခြားတွင် လေ့လာဆည်းပူးလျှင်ဖြစ်စေ ကျွန်တော့်ရဲ့ပြောဆိုဆွေးနွေးမှု နှင့် ကွာဟချက်အနည်းငယ်တွေ့ရပါမယ်။ ထိုသို့ဖြစ်ရခြင်းမှာ ဂျပန်များအနေဖြင့် မိမိတို့ရဲ့နည်းပညာဖြန့်ဝေမှု အောင်မြင်မှုလမ်းကြောင်းပေါ်ရောက်ရှိသွားပြီဖြစ်လို့ Scientific approach မှ Market approach သို့ ပြောင်းလဲလုပ်ကိုင်လာတာကြောင့် နည်းစနစ်အချို့ကို ပြုပြင်ထားလို့ဖြစ်ပါတယ်။

မည်သို့ပင်ဖြစ်စေ ကျွန်တော့်ရဲ့ပြောဆိုရေးသားမှုများဟာ မြန်မာနိုင်ငံနှင့် မြန်မာတောင်သူများအတွက် ပို၍ သင့်တော်ပါတယ်။ ငွေကြေးပြည့်စုံပြီး ကုန်ကျစရိတ်ကို ထည့်မတွက်သူများအနေဖြင့် ဂျပန်ပြည်မှနည်းလမ်းကိုမှ သုံးလိုလျှင်လည်း မိမိ ဆန္ဒအတိုင်းသာ ရွေးချယ်လုပ်ကိုင်နိုင်ပါတယ်။

(ဆရာကြီးဒေါက်တာမြင့်လွင်၏ခွင့်ပြုချက်အရ Facebook post ကို ကူးယူဖော်ပြခြင်းဖြစ်ပါသည်)

မူရင်းလင့်>>> https://www.facebook.com/myint.lwin.904/posts/pfbid0gWFKwqMcM7rhFSGFBECyJc4AB1Hm3xDSfZt3xeuCYmxbYFpPdzb999F8GJpGU8JPl

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...