ပြွတ်နေအောင် သီးတဲ့ ဒူးရင်းပင်အကြောင်းနဲ့ တစ်ပတ်အတွင်း စိတ်ဝင်စားစရာ အမေးအဖြေများ

မင်္ဂလာပါရှင့်

စိတ်ဝင်စားဖို့ကောင်းတဲ့ မေးခွန်းတွေကို လေ့လာရမဲ့ စနေနေ့လေးကို ပြန်လည်ရောက်ရှိလာပါပြီ။

ဒီတစ်ပတ်မေးခွန်းတွေကတော့ ဆရာဒို့ဦးလေးရဲ့ အာဟာရဓာတ်တွေအကြောင်းကို မှတ်ရလွယ်အောင် ဥပမာပေးပြောသွားတာလေးနဲ့ စပြီးဖော်ပြပေးလိုက်ပါတယ်။

၁။ မေး ( ဦးစိုးလွင်ဦး) - NPK အာဟာရဓာတ်သုံးမျိုးမှာ တစ်ခုစီဟာ အပင်ရဲ့ ဘယ်အစိတ်အပိုင်းတွေကို အကျိုးသက်ရောက်လဲ သိချင်လို့ပါ။

ဖြေ ( ဒို့ဦးလေး) - NPKကို လူတွေနဲ့ဥပမာပေးရရင် ခေါင်းရယ်၊ လက်ရယ်၊ ခြေထောက်ရယ်နဲ့ တူတယ်လို့ ပညာရှင်အချိူ့က ဥပမာပေးကြပါတယ်။ N က အပင်ရဲ့ ဆဲလ်အသစ်တွေကြီးထွားအောင်၊ အရွက်သစ်၊ အညွှန့်သစ်တွေ ကြီးထွားအောင်နဲ့ အစိမ်းရောင်ကလိုရိုဖီး လုပ်ဆောင်ရာမှာ အဓိကကျပါတယ်။ (ဒါကြောင့် N ချို့တဲ့ရင် အရောင် မစိမ်းတော့တာပါ)။ Pအနေနဲ့ အပွင့်တွေ များများပွင့်ပြီး အသီးအောင်စေဖို့နဲ့ အမြစ်တွေ ရှင်သန်ကြီးထွားဖို့ လုပ်ဆောင်ပါတယ်။ K ကတော့ အပင်တစ်ပင်လုံးအတွက် အစာကြော၊ ရေကြောတလျှောက် ပို့ဆောင်ဆက်သွယ်ရေးထောက်ပို့လုပ်ငန်းလုပ်ပါတယ်။ ရာသီဥတု/ပိုး/ရောဂါဒဏ်ခံနိုင်အောင် ကာကွယ်လုပ်ဆောင်ပေးပါတယ်။ ဒါဟာ အကြမ်းဖျဥ်းသဘောမျှသာဖြစ်ပါတယ်။ တကယ်က ဒါထက် အများကြီး နက်နဲတဲ့ အပင်ဇီဝကမ္မလုပ်ငန်းတွေကို ၊ အာဟာရဓာတ်တွေအားလုံး သူ့တာဝန်နဲ့သူ ပုံမှန်လုပ်ဆောင်ကြရပါတယ်။

နံပါတ် (၂) မေးခွန်းလေးကတော့ ဒူးရင်းသီးတွေသီးနေတာများ အားရစရာကောင်းချက်ပဲ..ဒါမဲ့မတတ်နိုင်ဘူးရှင်။ ခြွေပစ်ရမှာပဲ။ နှမြောနေလို့မရဘူးနော် ဦးကြီးတို့။ ဘာလို့အသီးမတင်တာလဲဆိုတာတော့ ဆရာတို့ဖြေပေးထားတာလေး လေ့လာကြည့်ရအောင်ပါ။

၂။ မေး (ကျော်စိုးဦး) - ဒူးရင်းသီးပင်ကအသီးတွေပြွတ်နေအောင်သီးပြီး မတင်ဘူးဗျ ၃နှစ်ရှိပြီ။ ဒီအတိုင်းပဲ ဘာလိုပြုပြင်ရမလဲဗျ။ အပင်သက်က၈နှစ်ရှိပြီ။

ဖြေ (ဦးသက်လွင်) - ၁။ ကိုင်းခြောက်များနှင့် ညှပ်နေသော ကိုင်းများအား ရှင်းလင်းပေးပါ။ ၂။ ပွင့်သီးချိန်တွင် မြေအစိုဓာတ် ကောင်းစွာရရှိနိူင်ရန် ပန်းပွင့်ချိန် မတိုင်မီ တစ်လခန့်မစ၍ ရေပေးသွင်းခြင်း ပုံမှန်ဆောင်ရွက်ပေးပါ။ ၃။ အရည်အသွေးကောင်းမွန်သော ကွန်ပေါင်းမြေဩဇာ 15R, 16R,18R စသည်ဖြင့် အပင်ပွင့်သီးချိန် မတိုင်မီ တစ်လခန့်မှ စ၍ တစ်ပင်လျှင် နို့ဆီဘူး (၄-၈) ဘူးခန့်အား အပင်ခြေမှ ၅ ပေခန့်ခွာပြီး ပတ်မြောင်း တူး၍ ထည့်ပေးပါ။ ၄။ အပင်ပွင့်သီးချိန် တလျှောက် မြေအစိုဓာတ်နှင့် အာဟာရလုံလောက်စွာ ထည့်သွင်း ပေးသွားရန် လိုအပ်ပါတယ်။

(ဒို့ဦးလေး) - အသီးတွေချွေပေးရပါတယ်။ တစ်ခိုင်မှာ ၂၊ ၃လုံး စသဖြင့်သာ ထားရပါတယ်။

ဒီမေးခွန်းလေးကတော့ ကြိုတင်ကာကွယ်တယ်ဆိုတာ ရောဂါဖြစ်မှ၊ သိသွားမှကုတာထက် ပိုကောင်းတယ်ဆိုတာ သိသွားတဲ့ ဦးကြီးတို့အတွက်ပါနော်။

၃။ မေး (ကိုကံကြီးမောင်) - နွေစပါး တွေမှာဆိုမှိုတွေအစုံကျတယ်ဆရာ မကျခင်ကာကွယ်ချင်ပါတယ် ဘယ်လိုကာကွယ်ရမလဲ ဘယ်အချိန်ကာကွယ်ရမလဲဆရာ။

ဖြေ (ဒို့ဦးလေး) - စနစ်တကျကာကွယ်မယ်ဆိုရင်.. ရိုးပြတ်တွေ ရှင်းလင်းခြင်း။ နွေထယ်ရေးခံခြင်း။ မျိုးကောင်း/သန့်အသုံးပြုခြင်း။ မျိုးစေ့လူးဆေး အသုံးပြုခြင်း။ တစ်လသားမှစပြီး တစ်လတစ်ကြိမ်ခန့် မှိုဆေး(မန်ကိုဇက်/ကော့ပါး...)အလှည့်ကျဖျန်းပေးခြင်း။ ရေသွင်း/ရေထုတ် ပုံမှန်ပြုလုပ်ခြင်း စသော ဘက်စုံကာကွယ်နည်းစနစ်တွေ အသုံးပြုရပါတယ်။

နံပါတ် (၄) မေးခွန်းကတော့ သေသေချာချာ မြေဩဇာတွေကျွေးထားပါရက်နဲ့ ပင်ပွားနည်းနေတာ ဒါတွေထဲက ဘယ်အချက်နဲ့များညိနေသလဲဆိုတာ လေ့လာလို့ရအောင် ဖော်ပြပေးလိုက်ပါတယ်ရှင့်။

၄။ မေး (မျိုးသူ) - ဆရာခဗျ စပါးပင် ပင်ပွားနည်းခြင်းအကြောင်းရင်းများသိချင်ပါတယ်။

ဖြေ (ဒို့ဦးလေး)- အပင်ပွားချိန် ရေများလွန်းခြင်း၊ အပင်ထူခြင်း၊ ရေငတ်ခြင်း၊ ဆန့်ထွက်ဟိုမုန်း(GA-3)အသုံးပြုခြင်း တွေဟာ ပင်ပွားနည်းစေပါသတဲ့။

နောက်ဆုံးမေးခွန်းလေးကတော့ အခုရက်ပိုင်းစပါးနှံတွေမှာ အစွန်းတွေဖြစ်လို့... ဘာကြောင့်လဲ... ဘာကြောင့်လဲဆိုပြီး တက်တက်လာတဲ့ မေးခွန်းလေးပါ။ အဲ့တာကတော့ နှစုပ်ဂျပိုးကျနေတာကို သတိမထားမိပဲ အနှံထွက်ချိန်ရောက်မှ လက္ခဏာပြတော့ အချိန်တွေလွန်ကုန်ပြီဆိုတာ သင်ခန်းစာယူရင်း နောက်နှစ်တွေမဖြစ်ရအောင်နဲ့ မဖြစ်သေးတဲ့ဦးကြီးတွေရော နှံစုပ်ဂျပိုးကို နို့ရည်တည်ချိန်မှာ သတိမူစေဖို့အတွက်ပါ။

၅။ မေး (ပိုင်ဖြိုးကျော်) - မှည့်စွန်း တွေဖြစ်ပြီး စပါး တစ်ဧက ကို၅ဝ သီးလောက်ပဲထွက်လို့ ဘာဆေးသုံးလို့ရလဲ ဘာကြောင့်မှည့်စွန်း ဖြစ်တာလဲဆရာ။

ဖြေ (ဒို့ဦးလေး) - နှံစုပ်ဂျပိုး ကြိုတင်မကာကွယ်နိုင်လို့ပါ။ ဖုံးလုံးချိန်ကတည်းက ပင်လုံးပြန့်ဆေးနဲ့ကာကွယ်ပါ။ နို့ရည်တည်ချိန် ပိုးကျတတ်ပါတယ်။

အသိပညာတွေတစ်ခုခုရသွားမယ်မျှော်လင့်ပါတယ်နော်..။

စိုက်ပျိုးရေးဆိုတာ လေ့လာလေ မကုန်လေဖြစ်တဲ့ ပညာရပ်တစ်ခုဆိုတော့ မရှင်းတာမျိုး သိချင်တာမျိုးဆို အမေးအဖြေကဏ္ဍမှာ ဝင်ရောက်ဆွေးနွေးလို့ရပါတယ်လို့ သတင်းကောင်းပါးရင်း ဒီတစ်ပတ်တော့ ဒီလောက်နဲ့ပဲ နိဂုံးချုပ်လိုက်ပါရစေရှင့်

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...