ဒက်ထရွိုက်လေဆိပ်မှာ အဖမ်းခံလိုက်ရတဲ့ အာဖရိကခရုကြီးများ

ခရုဆိုတာမျိုးက နှေးကွေးစွာ ရွေ့လျားသွားလာတဲ့အမျိုးဆိုပေမဲ့ ဒီခရုတွေကတော့ အတ္တလန်တိတ်သမုဒ္ဒရာကြီးကို တစ်နာရီကို မိုင်ရာနဲ့ချီတဲ့အရှိန်မျိုးနဲ့ ဖြတ်ကျော်လာကြတာ ဖြစ်ပါတယ်။ (လေယာဉ်စီးလာကြတာမို့လို့ပါ)

အမေရိကန်နိုင်ငံ၊ ဒက်ထရွိုက်မြို့တော် လေဆိပ်မှာရှိတဲ့ အကောက်ခွန်အရာရှိတွေဟာ ဂါနာနိုင်ငံကနေ စီးနင်း လိုက်ပါလာတဲ့ ခရီးသွားတစ်ဦးရဲ့ ခရီးဆောင်အိတ်အတွင်းကနေ အသက်ရှင်နေဆဲ ဒီခရုခြောက်ကောင်ကို တွေ့ရှိခဲ့တာပါ။

အညိုရင့်ရောင် အစင်းကြောင်းကြီးတွေနဲ့ အဆိုပါသက်ရှိတွေဟာ အမေရိကန်အနေနဲ့ နှစ်ပေါင်း ၅၀ ကျော်တောင် အချိန်ယူဖယ်ရှားရှင်းလင်းပစ်ခဲ့ရပြီး ကျူးကျော်ဝင်ရောက်မှုထပ်ရှိမလာဖို့ တားမြစ်ပိတ်ပင်ထားတဲ့ အာဖရိကဧရာမခရုကြီးတွေဖြစ်ကြောင်း စိုက်ပျိုးရေးပညာရှင်တွေက အတည်ပြုပါတယ်။ 

အရွယ်ရောက်ပြီးသူတစ်ဦးရဲ့ လက်သီးဆုပ်အရွယ်ခန့်ရှိတဲ့ ဒီခရုကြီးတွေဟာ ကြည့်လိုက်ရင်တော့ ဘာအန္တရာယ်မှ မရှိသလိုမျိုးတွေပေမဲ့ တကယ်တော့ မြေပဲ၊ ပဲပင်နဲ့ သခွားသီးအပါအဝင် အပင်အမျိုးအစားပေါင်း ၅၀၀ ကျော်အထိ စားသောက်ဖျက်ဆီးတတ်တဲ့ အစားကျူးအဖျက်ပိုးတွေပါ။ အဲ့ဒီသီးနှံတွေ မရရှိနိုင်တဲ့အခါမျိုးဆို ရင် သူတို့ဟာ ပန်းပင်တွေ၊ သစ်ခေါက်တွေကို စားပစ်ကြပါတယ်။ နောက်ဆုံး ဘာမှမကျန်ဘူးဆိုရင် နေအိမ်မှာရှိတဲ့ သုတ်ဆေးနဲ့ အင်္ဂတေနု (ပလာစတာ)တွေကိုပါ စားပစ်တယ်လို့ ဆိုပါတယ်။

ဒါ့အပြင် ဒီအာဖရိကခရုကြီးတွေဟာ လူသားတွေမှာ ဦးနှောက်အမြှေးရောင်ရောဂါနဲ့ အခြားရောဂါတွေကို ဖြစ်စေနိုင်တဲ့ ကပ်ပါးပိုးတွေကို သယ်ဆောင်နိုင်တယ်ဆိုပြီးလည်း လူသိများပါတယ်။ ၎င်းတို့ဟာ တစ်နှစ် အတွင်းမှာ ဥပေါင်း ၁,၂၀၀ အထိ ဥချနိုင်ပြီး လျင်မြန်စွာလည်း မျိုးပွားနိုင်ကြပါတယ်။

ဖလော်ရီဒါပြည်နယ်တောင်ပိုင်းမှာ ၁၉၆၀ ပြည့်လွန်နှစ်များအတွင်းက ဒီတောရိုင်းခရုတွေကို တွေ့ရှိခဲ့ရဖူးပြီး ၎င်းတို့ကို ဖယ်ရှားနိုင်ရေးအတွက် ဒေါ်လာ ၁ သန်းကျော် ကုန်ကျခံကာ အချိန် ၁၀ နှစ်ကျော်ယူ ရှင်းလင်းခဲ့ရ ပါတယ်။ ၂၀၁၁ ခုနှစ်မှာ ပြည်နယ်အတွင်းကို ထပ်မံကျူးကျော်လာကြောင်း တွေ့ရှိခဲ့ရလို့ နောက်ထပ်ဆယ်စု နှစ်ကြာ ဖယ်ရှားရှင်းလင်းရေး ထပ်လုပ်ရပြန်ပါတယ်။

ဒါပေမဲ့ နှစ်တွေ အတော်ကြာလာပြီးတဲ့နောက်မှာတော့ အနောက်အာဖရိကမှာဆို ဒေသတွင်း စားကောင်းသောက်ဖွယ်တစ်မျိုးဖြစ်နေတဲ့ ဒီသက်ရှိတွေ အမေရိကန်မှာ အကြောတင်းတင်းနဲ့ ပြန်ပေါ်လာပြန်တာပါပဲ။  ကောင်းကောင်းချက်ပြုတ်တတ်ရင် သူက သရေစာလိုမျိုးတောင် စားသုံးနိုင်တယ်လို့ Miami အခြေစိုက် WLRN ရေဒီယို အသံလွှင့်ဌာနကနေ ၂၀၁၃ ခုနှစ်မှာ ဖော်ပြခဲ့ပါတယ်။ တချို့တွေကတော့ သူတို့ကို အိမ်မွေးတိရစ္ဆာန်အနေနဲ့လည်း မွေးကြသေးတယ်လို့ အမေရိကန်စိုက်ပျိုးရေးဦးစီးဌာန (USDA) က ပြောပါတယ်။

ယနေ့အချိန်မှာတော့ ဖလော်ရီဒါ၊ ဟာဝိုင်ရီနဲ့ ကာရေဘီယံဒေသတွေမှာ ဒီအာဖရိကခရုကြီးတွေဟာ တောရိုင်းသတ္တဝါတွေလိုမျိုး ရှိနေနိုင်တယ်လို့ ယုံကြည်ရကြောင်းလည်း (USDA) က ဆိုပါတယ်။

တကယ်လို့ အဆိုပါခရုတွေကို တွေ့ရှိမိတယ်ဆိုရင်  ဒေသဆိုင်ရာ ပြည်နယ်စိုက်ပျိုးရေးဌာန (သို့မဟုတ်) USDA တိရစ္ဆာန်နဲ့ အပင်ကျန်းမာရေး စစ်ဆေးရေးဝန်ဆောင်မှု ဒေသဆိုင်ရာဌာနခွဲတွေကို ဆက်သွယ်ပေးကြဖို့ ဗဟိုအစိုးရအာဏာပိုင်တွေက အကြံပြုထားပါတယ်။ 

ဇင်ထူးနိုင် 

Ref: https://n.pr/3ZZ2yBg

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်