မိုးကုန်သလောက်ဖြစ်သွားပြီဖြစ်ပြီး ဒေသအချို့တွင်သာ မိုးပါးပါး ရွာနိုင်တော့မည်

လက်ရှိမိုးလေဝသအခြေအနေတွေ၊ လေစီးကြောင်းအခြေအနေတွေအရ မိုးရာသီကုန်သလောက် ရှိသွားပြီဖြစ်ပြီး ဒေသအချို့မှာ မိုးပါးပါးရွာနိုင်ချေသာရှိတော့တယ်လို့ နိုင်ငံတကာမိုးလေဝသ ထုတ်ပြန်ချက်တွေကို ကိုးကားခန့်မှန်းပေးနေသူ ဦးဝင်းနိုင်က ပြောပါတယ်။

ဒီအချိန်ဟာ မိုးစပါးအများစုရိတ်သိမ်းချိန်လည်းဖြစ်နေလို့ တောင်သူလယ်သမားတွေအနေနဲ့ ရာသီဥတု အဖျက်အဆီး ကင်းကင်းနဲ့ စပါးရိတ်သိမ်းမှုတွေ ပြုလုပ်နိုင်တော့မှာဖြစ်ပါတယ်။

လက်ရှိမိုးလေဝသအခြေအနေတွေ၊ မိုးပါးပါးရွာနိုင်ချေရှိသေးတဲ့ဒေသတွေ၊ ဆောင်းဝင်လာတော့မှာလား ဆိုတာတွေအပေါ် ဦးဝင်းနိုင်ထံ Green Way က ဆက်သွယ်မေးမြန်းထားတာတွေကို ဖော်ပြပေးလိုက်ပါတယ်။

လက်ရှိ မိုးလေဝသအခြေအနေတွေ ဘယ်လိုရှိနေလဲ?

“အရှေ့မြောက်လေစီးကြောင်းက အားကောင်းနေတယ်။ ပြီးတော့ မုတ်သုံလေမျဉ်းက အခု စင်ကာပူပေါ်နားလောက်ထိတောင် ရောက်တော့မယ်။ ပြီးတော့ အရှေ့ဘက်ကဝင်လာတဲ့ တိမ်တွေကလည်း ကျွန်တော်တို့ဆီကို မရောက်နိုင်တော့ဘူး။ ဘင်္ဂလားပင်လယ်အော်မှာ လေဖိအားနည်းရပ်ဝန်း ဒါမှမဟုတ် မုန်တိုင်းတစ်ခုခုသာ မဖြစ်တော့ရင် ကျွန်တော်တို့ဆီမှာ မိုး အများကြီးရွာနိုင်တဲ့ အနေ အထားတော့ မရှိတော့ဘူး။ မိုးကုန်သွားတဲ့သဘောပေါ့”

မိုးရွာနိုင်သေးတဲ့ အခြေအနေတွေ မရှိနိုင်တော့ဘူးလား?

“ ရွာနိုင်ချေကတော့ ရှိနိုင်သေးတယ်။ ဒါပေမဲ့ ပါးပါးလေးတွေပဲ။ ဥပမာဆိုရရင် ဧရာဝတီတိုင်းလိုမျိုး တောင် နောက်လာမယ့် ၁၀ ရက်အတွင်း မိုးရေချိန်ဆို လက်မဝက်လောက်ပဲ ရှိနိုင်တော့တယ်။ ဆိုတော့ တစ်ရက်ချင်းစီနဲ့ပြောမယ်ဆို ဘယ်လောက်မှမရှိနိုင်တော့ဘူး။ တော်တော်ကိုနည်းသွားပြီ”  

လာမယ့် ၃ ရက်အတွင်း မိုးရွာနိုင်တဲ့ဒေသတွေဆိုရင် ဘယ်ဒေသတွေဖြစ်မလဲ?

“ ၃ ရက်အတွင်းဆိုရင် ရခိုင်ကမ်းရိုးတန်းဘက်ပေါ့။ ကျောက်ဖြူရဲ့တောင်ပိုင်း ကမ်းရိုးတန်းဘက် ပါတယ်။ ဧရာဝတီကမ်းရိုးတန်းလည်းပါမယ်။ အဲ့ဒီနေရာတွေလောက်ပဲ။ အဲ့ဒီတွေလည်း အများကြီး မဟုတ်ဘူး။ ဒသမ ၃၊ ၅ လောက်ပဲ။ ကရင်ပြည်နယ်ဘက်ဆိုရင်လည်း ဒသမ ၅၊ ၇ အဲ့ဒီလောက်ပဲ ရှိတော့မယ်” 

“ ရှမ်းပြည်နယ်လည်း နည်းနည်းပါးပါးပါမယ်။ သူလည်း နှင်းမိုးရွာသလောက်ပဲ။ ပါးပါးလေးပဲ ဖြစ်တော့မယ်။ စစ်ကိုင်းတိုင်းတို့၊ ကချင်ပြည်နယ်တို့ဆို Zero inch (သုညလက်မ) ဖြစ်သွားပြီ။ တနင်္သာရီတိုင်းဆိုရင်တော့ ကော့သောင်းလောက်ပဲ။ ဒါတောင် ပါးပါးလေးပဲ။ အဲ့ဒါကြောင့် မိုးက ကုန်သ လောက်ဖြစ်သွားပြီလို့ ပြောတာ။ တစ်ခုပဲ။ ခုနပြောသလို ခြွင်းချက်အနေနဲ့ ဘင်္ဂလားပင်လယ်အော်မှာ လေဖိအားနည်းရပ်ဝန်း ဒါမှမဟုတ် မုန်တိုင်းတို့ တစ်ခုခုဖြစ်လာမှပဲ။ ဒါကလည်း ‘ဖြစ်ခဲ့သည်ရှိသော်’ ဆိုတာမျိုးလောက်ကိုပဲ ပြောတာပါ” 

ဆိုတော့ မိုးကုန်သွားပြီဆိုတော့ ဆောင်းဝင်လာတော့မှာလား..?

“ ဆောင်းအအေးဓာတ်ကတော့ အပေါ်ကနေ ဝင်လာပြီ။ ဥပမာပြောရင် မနက် ၅ နာရီလောက် အချိန် တွေကို စံထားကြည့်မယ်ဆိုရင် ချင်းပြည်နယ်ဆိုရင် ၁၂ ဒီဂရီလောက်ထိ ကျမယ်။ ရှမ်းပြည်နယ် မြောက်ပိုင်းဆိုရင် ၁၁ လောက်ပဲ ရှိတော့မယ်။ ကချင်ပြည်နယ် မေခ မလိခ မြစ်ဆုံရဲ့ အထက် လောက်တွေဆိုရင်လည်း ၅ ဒီဂရီလောက်ထိ ကျသွားမယ်။ အောက်ပိုင်းဆိုရင် ရှမ်းပြည်နယ် အနောက်ပိုင်းတစ်ခြမ်းလုံးက ၁၅ လောက်ထိ ကျမယ်။ ကယားပြည်နယ်နဲ့ ပဲခူးတိုင်းအစပ်နေရာဆိုရင် ၁၈ ဒီဂရီလောက်ထိ ကျတယ်။ အဲ့ဒီဟာက အဝေးဆုံးပြောရရင် ၉ ရက်နေ့လောက်အထိကို အဲ့ဒီ လောက်ပဲ။ အပူချိန်တွေ ကျနေမယ်။ တဖြည်းဖြည်းနဲ့ဆိုရင် ပိုပြီးတော့ ကျလာတော့မယ်” 

“ကချင်ပြည်နယ်မြောက်ဖျား ခါကာဘိုရာဇီတောင်ရှိတဲ့ တဟွန်းဒမ်းလို မေခမြစ် မြစ်ဖျားခံတဲ့ နေရာမျိုး ဆိုရင် အပူချိန်က အနုတ် ၅ ဒီဂရီလောက်ကနေ အနုတ် ၁၄ လောက်ထိ ဆင်းသွားမယ်”  

ရန်ကုန်တို့၊ တခြားနေရာတွေမှာကော ဆောင်းဝင်တော့မှာလား?

“ဆက်ဝင်လာမှာပဲ။ မြောက်ဘက်က လေစီးကြောင်းတိုက်လာတဲ့အခြေအနေကိုပဲ စောင့်ကြည့်ရမယ်။ အခုလောလောဆယ်ကိုပဲ မြောက်ဘက်က လေစီးကြောင်းက စပြီးတော့ တိုက်နေပြီပေါ့နော်” 

#(ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

Photos Crd_ U Win Naing

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။