ဆေးဖျန်းချိန် မိုးမလွတ်တဲ့ဒုက္ခတွေနဲ့ တစ်ပတ်အတွင်း စိတ်ဝင်စားစရာ အမေးအဖြေများ

စိတ်ဝင်စားစရာ အမေးအဖြေတွေကို လေ့လာရမယ့် စနေနေ့ကို ပြန်လည်လို့ရောက်ရှိလာခဲ့ပါပြီ။

ဒီတစ်ပတ်မှာလည်း ဦးကြီးတို့အတွက် လေ့လာမှတ်သားစရာကောင်းတဲ့ အမေးအဖြေလေးတွေကို စုစည်းပြီးဖော်ပြပေးလိုက်ပါတယ်နော်။

၁။ မေး (အမည်မသိ) - စပါးပေါင်းသတ်ဆေးပက်ပြီးတော့မှ မိုးရွာနေတာ။ အာနိသင်ထိခိုက်နိုင်လားဗျ။

ဖြေ (  ဒို့ဦးလေး) - ပေါင်းသတ်ဆေးဖျန်းပြီး မိုးဖွဲဖွဲရွာရင်ကိုပဲ ပေါင်းမသေပါဘူး။

၂။ မေး (Paing) စပါးခင်းထဲမှာ အစာကျွေးမလို့ ဒါပေမဲ့ရေက သူများစပါးခင်းတွေနဲ့တဆက်တည်း ကိုဖြစ်နေတာ အဲ့ဒါအစာကျွေးလို့ရှိရင် အလေအလွှင့်ရှိနိုင်မလား ကျေးဇူးပြုပြီးပြောပြပေးပါ။

ဖြေ (ဒို့ဦးလေး) - အစာကျွေးချိန် ၂ ပတ်လောက်ကတော့.. ကန်သင်း ပိတ်ထားမှဖြစ်မှာပါ။ နို့မို့ ..အစာတွေ ရေနဲ့အတူ အောက်ကိုပါသွားနိုင်ပါတယ်။

(ဦးမောင်မောင်ထွေး) - စပါးခင်းအစာကျွေးရင် ရေစပ်စပ်ထားပြီး ကျွေးရင် အလေအလွင့် နည်းပါတယ်။ ရေများနေရင်ရေထုတ်ပြီးမှအစာကျွေးပါ။

၃။ မေး (Ye Htet Kyaw) - စပါး ပိုး၊ မှို၊ အားဆေးဖျန်းတဲ့အခါ လယ်ကွက်ထဲက ရေကို ဘယ်နှစ်လက်မလောက်ထားရမလဲ။

ဖြေ (ဒို့ဦးလေး) - အပင်ပေါ်ဖျန်းချိန်မှာ.အောက်ကရေကို သတိထားစရာမလိုပါဘူးဗျ။ ပေါင်းသတ်ဆေးဖျန်းရင်တော့ ရေထုတ်ဖျန်းရပါတယ်၊ ၂ရက်ကြာမှ ရေပြန်သွင်းရပါတယ်။ 

(ဦးမောင်မောင်ထွေး) - အားဆေးဖျန်းရင် သွားလာရလွယ်ကူအောင်နှင့် အမြစ်ကိုပါထိရောက်နိုင်အောင် ရေစပ်စပ်ထားပြီးဖျန်းရန်အကြံပြုပါတယ်။

၄။ မေး (Soe Min Oo) - ပျားရည်ကို မူလအတိုင်းမပြုပြင်ဘဲ အမြစ်ထွက်ဟော်မုန်းအဖြစ် သုံးလို့ရပါသလားဆရာ။

(ဒို့ဦးလေး) - ရပါတယ်၊ သဘာဝပျားရည်စစ်စစ်မှာ အမြစ်ထွက်စေတဲ့ ဓာတ်နဲ့ မှို၊ဘက်တီးရီးယားတွေကိုကာကွယ်စေတဲ့ဓာတ်ပါတယ်လို့ ဆိုပါတယ်။ ရေ.မတ်ခွက် ၂ ခွက်စာကို ပျားရည် ၂ ဇွန်းနဲ့ မွှေပြီး အမြစ်ဖောက်မည့် အကိုင်းကိုစိမ် ပြီး ပြုလုပ်နိုင်ပါတယ်..(အစိမ်းရောင်လမ်း..မှ)

၅။ မေး (Aung Thu Hein) ဆရာခဗျ မိုးတွက်ချိန်ခါမှ စပါးဆေးဖြန်းရတာမိုးလွတ်ဖို့အလွန်ခက်ပါတယ်။ တချို့ပြောတာတော့ ကော်ရည်ထည့်ရင် အဆင်ပြေတယ်ပြောလို့ပါ။ ကော်ရည်ထည့်ဖြန်းရင်ကောအချိန်ဘယ်လောက်ကြာကြာမိုးလွတ်ရမလဲသိချင်ပါတယ်။ကျေးဇူးပါ။

(ဒို့ဦးလေး) - ရိုးရိုးကော်ရည်ထက် စိမ့်ဝင်/စွဲကပ်ကော်ရည်ဆိုရင်တော့ ဆေးဖျန်းပြီး.၁-၂နာရီ ကြာမှ မိုးရွာရင် ရတယ်လို့ဆိုပါတယ်။ (ပုံမှန်ကတော့ ၄-၆ နာရီ ကြာပါတယ်)

မေးခွန်းတွေအကုန်လုံးကလည်း အခုချိန်တောင်သူတိုင်းကြုံတွေ့နေရတဲ့ ပြဿနာတွေကြီးကို စုစည်းထားတာမို့ ဗဟုသုတရမယ်လို့ မျှော်လင့်ပါတယ်ရှင့်။

တခြားမိတ်ဆွေတောင်သူတွေလည်း ဒီလိုမျိုးအကြံဉာဏ်တွေရယူချင်တယ်ဆို အမေးအဖြေကဏ္ဍမှာ ပို့စ်တင်မေးလို့ရနေပါပြီနော်။ ဘယ်လိုတွေမေးရမှန်းမသိရင် ပုံလေးသာတင်ပြီး မေးလိုက်။ ဆရာတို့က သေချာကြည့်ပြီး ဖြေပေးနေပါပြီရှင့်။ အမေးအဖြေကဏ္ဍမှာ အားမနာတမ်း ပို့စ်တင်မေးနိုင်ပါကြောင်း သတင်းကောင်းပေးရင်း ဒီတစ်ပတ်တော့ ဒီလောက်နဲ့ပဲ အဆုံးသတ်လိုက်ပါဦးမယ်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်