ဘက်စုံအသုံးဝင်သည့် ဓနိပင်

    ဓနိပင်ကို အိမ်မိုးရန်အသုံးပြုကြသောအပင်ဟု လူသိများပါသည်။ ဓနိ၊ သက်ကယ်တို့နှင့် အမိုးအကာပြုလုပ်သော အလေ့အထသည် ရှေးယခင်ကပင်ရှိခဲ့ပြီး ယခုအချိန်ထိ သုံးစွဲနေကြဆဲ​ဖြစ်ပါသည်။ ဓနိပင်သည် ပင်လယ်ရေငန်ဝင်သော ကမ်းရိုးတန်းဒေသများနှင့် ကမ်းစပ်ချောင်းစပ်များတွင် ပေါက်ရောက်ပါသည်။ မြန်မာနိုင်ငံတွင်လည်း  ဧရာဝတီတိုင်းနှင့် ရခိုင်ပြည်နယ်တို့တွင် ဓနိတောများပေါက်ရောက်ပါသည်။ ထိုဒေသရှိ ဒေသခံများမှလွဲ၍ အများစုသည် ဓနိတစ်ပင်လုံး၏အသုံးဝင်ပုံကို မသိဘဲ ဓနိဖက်ကိုသာ အိမ်မိုးရန်သုံးရမည်တစ်ခုသာ အသိများကြပါသည်။

    ဘက်စုံအသုံးဝင်သော ဓနိပင်ကို အင်္ဂလိပ်အမည် Nipa palm ဟု ခေါ်ပါသည်။ သိပ္ပံအမည်မှာ Nypa fruticans ဖြစ်ပြီး မူရင်းဒေသမှာ သီရိလင်္ကာ၊ အိန္ဒိယ၊ ဘော်နီယိုကျွန်းဆွယ်နှင့် ဂျာဗားကျွန်းတို့မှတစ်ဆင့် မြန်မာ၊ ထိုင်း၊ ဗီယက်နမ်နိုင်ငံများသို့ ရောက်ရှိလာပါသည်။

    ဓနိပင်၏အရွက်ကို အိမ်အမိုးအကာများအတွက် အသုံးပြုကြသကဲ့သို့ အရိုးကို ခြံစည်းရိုးကာရန်အသုံးပြုပါသည်။ အရွက်နုသည် သင်းပျံ့သောရနံ့ရှိသဖြင့် မုန့်များ၊ ကောက်ညှင်းထုပ်များထုပ်ပိုးရာတွင် ဖက်အဖြစ်သုံးကြပါသည်။ ဓနိပင်မှရသော ဓနိရည်ကို အချိုရည်အဖြစ် သောက်သုံးနိုင်သကဲ့သို့ ဓနိသကြားချက်ရာတွင်လည်းကောင်း၊ ထားဝယ်ရိုးရာ ပအုန်းရည်ချက်ရာတွင်လည်းကောင်း သုံးကြပါသည်။ ပအုန်းရည်ဆိုသည်မှာ ထားဝယ်တိုင်းရင်းသား ရိုးရာအစားသောက်များချက်ရာတွင်ထည့်သော ရှာလကာရည်ဖြစ်ပါသည်။ ဓနိပင်မှရသော ဓနိသီးသည် ထန်းသီး၊ ပေသီးကဲ့သို့ပုံစံဆင်ကာ အဖြူရောင်ဖြစ်ပါသည်။ ထန်းသီးနှင့်ဆင်ကာ စားကောင်းသော ဓနိသီးကို အစိမ်းစားကြသကဲ့သို့ အချိုပွဲများ ဖျော်ရည်များနှင့် ရေခဲမုန့်များလုပ်ရာတွင်လည်း ထည့်သွင်းအသုံးပြုကြပါသည်။

    ယခုအခါ ဓနိဖူးခြောက်သည် များစွာခေတ်စားလာပြီး တနင်္သာရီတိုင်းနှင့် ဓနိပင်ပေါများရာမြန်မာနိုင်ငံရှိ ​အခြားဒေသများတွင် ဓနိဖူးခြောက်ကို ပြုလုပ်ရောင်းချကာ မြန်မာပြည်အနှံ့ပို့ဆောင်ပေးပါသည်။ ဓနိဖူးခြောက်တွင် polyphenol ဓာတ်ပါဝင်ပါသည်။ ထိုဓာတ်သည် လူ့ ကိုယ်တွင်းတွင် antioxidant များကို ထုတ်ပေးပါသည်။ Antioxidant ကြောင့် အရွယ်တင်ခြင်းကို ဖြစ်စေပါသည်။ ထို့ပြင် ဓနိဖူး​ခြောက်သည် ကင်ဆာရောဂါကိုကာကွယ်ပေးခြင်း၊ နှလုံးသွေးကြောဆိုင်ရာရောဂါများကို ဟန့်တားပေးခြင်း၊ အမောခံနိုင်ခြင်း၊ အာရုံကြောရောဂါများ သက်သာစေခြင်း၊ ယားနာနှင့် အရေပြားရောဂါတို့ကိုသက်သာစေခြင်း စသော အကျိုးကျေးဇူးများစွာ ရစေသောကြောင့် တစ်ခါတစ်ရံတွင် လက်ဖက်ခြောက်အစား သောက်နိုင်ပါသည်။ အရွက်ကိုမီးရှို့၍ရသော ပြာမှုန့်ကို ယားနာနှင့် သွားနာတွင်လည်း သုံးကြပါသည်။ ဓာတ်ခွဲချက်များအရ ဓနိဖူး​ခြောက်သည် ဂျင်ဆင်းထက်ပင် antioxidant ပိုကြွယ်ဝကြောင်းသိရပါသည်။

    ထို့ကြောင့် ဘက်စုံအသုံးဝင်သော ဓနိပင်ကို အမိုးအကာအဖြစ်သာမဟုတ်ဘဲ နည်းလမ်းပေါင်းစုံ ပြုလုပ်အသုံးချရင်း မြန်မာ့ကမ်းရိုးတန်းဒေသရှိ ဓနိတောများကိုလည်း မပျောက်ပျက်အောင်စနစ်တကျ ထိန်းသိမ်းသင့်ကြောင်း ရေးသားလိုက်ရပါသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။