တောင်တရုတ်ပင်လယ်မှာ လေဖိအားနည်းရပ်ဝန်း/မုန်တိုင်းငယ်ဖြစ်လာနိုင်လို့ မိုးရွာနိုင်မည့်အခြေအနေများပိုလာနိုင်

ဇွန်လ ၁၉ ရက် - မွန်းလွဲ ၁ နာရီ ၄၅ မိနစ် အချိန်တွင် ရရှိသည့်မိုးလေဝသဒေတာများအရ လေဖိအားနည်းရပ်ဝန်းဖြစ်နိုင်သည့်အခြေအနေများမှာ

🔸 ဇွန်လ ၂၄ ရက် နံနက်ပိုင်း၊ တောင်တရုတ်ပင်လယ်၊ ဟိုင်နန်ကျွန်းတောင်ဘက်မှာ လေဖိအားနည်းရပ်ဝန်းတစ်ခုဖြစ်လာနိုင်ပြီး မုန်တိုင်းငယ်အဆင့်အထိ အားကောင်းလာနိုင်ကာ အနောက်မြောက်ဘက်သို့ဆက်လက်ရွေ့လျားနိုင်ကြောင်း၊ ဗီယက်နမ်နိုင်ငံအရှေ့ဘက် "တုံကင်ပင်လယ်ကွေ့"အထိရောက်လာနိုင်ကြောင်း ECMWF နဲ့ GFS Model ခန့်မှန်းချက်တွေမှာ တွေ့ရပါတယ်။

မြန်မာနိုင်ငံမှာဖြစ်ပေါ်နိုင်မည့် မိုးလေဝသအခြေအနေများ

🔸 ကပ္ပလီပင်လယ်နဲ့ ဘင်္ဂလားပင်လယ်အော်မှာ အနောက်တောင်မုတ်သုံလေ အားပိုကောင်းလာနိုင်ပြီး မြန်မာ့ကမ်းရိုးတန်းတလျှောက်(ရခိုင်ကမ်းရိုးတန်း၊ ဧရာဝတီမြစ်ဝကျွန်းပေါ်ကမ်းရိုးတန်းနဲ့ မွန်တနင်္သာရီကမ်းရိုးတန်းတလျှောကက်မှာ ဇွန်လ ၂၃ ရက်မှ ၂၇ ရက်အထိ မိုးသက်လေပြင်းများကျပြီး လှိုင်းကြီးနိုင်တဲ့ အခြေအနေများဖြစ်ပေါ်နိုင်ပါမယ်။ မိုးသက်လေပြင်းများကျစဉ် အနောက်-အနောက်တောင်ဘက်မှ လေပြင်း တစ်နာရီ ၂၅ မိုင်မှ ၃၅ မိုင်အထိ တိုက်ခတ်နိုင်ပြီး၊ လှိုင်းအမြင့် ၈ ပေမှ ၁၀ ပေခန့်အထိ ရှိနိုင်ပါတယ်။

မိုးရွာသွန်းနိုင်မဲ့အခြေအနေခန့်မှန်း -

🔸 ဇွန် ၂၃ ရက်နောက်ပိုင်းမှာ တစ်နိုင်ငံလုံး နေရာအနှံ့အပြားမိုးရွာနိုင်ပြီး  အလယ်ပိုင်းမိုးနည်းရှားဒေသအချို့မှအပ ကျန်ပြည်နယ်တိုင်းဒေသအားလုံးမှာ နေရာကွက်ပြီး မိုးများနိုင်ပါတယ်။

🔸 အထူးသဖြင့် ကမ်းရိုးတန်းဒေသများအပါအဝင် တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ ရခိုင်ပြည်နယ်၊ ချင်းပြည်နယ်၊ ကယားပြည်နယ်၊ စစ်ကိုင်းတိုင်းအထက်ပိုင်း၊ ရှမ်းပြည်နယ်မြောက်ပိုင်းနဲ့ ကချင်ပြည်နယ်ဒေသတွေမှာ နောက်လာမဲ့ ၃ ရက်မှ ၅ ရက်အတွင်း မိုးသည်းထန်နိုင်/မိုးအလွန်များနိုင်ကြောင်းတွေ့ရပါတယ်။

🔸 တောင်တရုတ်ပင်လယ်က လေဖိအားနည်းရပ်ဝန်းအားကောင်းလာချိန်(ဇွန် ၂၆-၂၇ ရက်ခန့်)မှာ ဘင်္ဂလားပင်လယ်အော်အနောက်အလယ်ပိုင်းနဲ့ အနောက်မြောက်ပိုင်းမှာလဲ အိန္ဒိယနိုင်ငံကမ်းခြေနားကပ်လျက် လေဖိအားနည်းရပ်ဝန်းတစ်ခု ဖြစ်လာနိုင်ကြောင်း ကြိုတင်ခန့်မှန်းချက်များမှာတွေ့ရတာကြောင့် ဆက်လက်စောင့်ကြည့်တင်ပြပေးသွားပါမယ်။

တောင်တရုတ်ပင်လယ်အတွင်းလေဖိအားနည်းရပ်ဝန်း/မုန်တိုင်းဖြစ်နိုင်ချေများနဲ့အတူ တစ်ဆက်ထဲထွက်ရှိလာတာကတော့ -

ကမ္ဘာလုံးဆိုင်ရာ အီကွေတာအပူပိုင်းဒေသများအတွင်းဖြစ်ပေါ်လာနိုင်သည့် သဘာဝဘေးအန္တရာယ်ဖြစ်နိုင်ချေများကိုစောင့်ကြည့်တင်ပြနေတဲ့ Global Tropics Hazards OUTLOOK(GTH outlook)မှ ထုတ်ပြန်ချက် UPDATE ဖြစ်ပါတယ်။

🔸 ဇွန်လ ၂၆ ရက်မှ ဇူလိုင်လ ၂ ရက်အတွင်း ဘင်္ဂလားပင်လယ်အော်နဲ့ တောင်တရုတ်ပင်လယ်တွေမှာ ဆိုင်ကလုန်းမုန်တိုင်းဖြစ်ပေါ်နိုင်ချေ ၂၀% မှ ၄၀% ရှိနေကြောင်း၊

🔸 ဇူလိုင် ၃ ရက်မှ ဇူလိုင် ၉ ရက်အတွင်း တောင်တရုတ်ပင်လယ်မှာ ဆိုင်ကလုန်းမုန်တိုင်းဖြစ်နိုငချေ ၄၀% မှ ၆၀% ရှိနေကြောင်း ခန့်မှန်းထားတာတွေ့ရပါတယ်။

🔸 ဇွန်လ ၂၆ ရက်မှ ဇူလိုင်လ ၉ ရက်နေ့အတွင်း မြန်မာနိုင်ငံတောင်ပိုင်းဒေသများမှာ ရွာသွန်းမြဲအထက် ၅၀% မှ ၆၅% အထက်အထိ မိုးပိုမိုရွာသွန်းနိုင်မည့်အခြေအနေဖြစ်ပေါ်နိုင်ကြောင်း ကြိုတင်ခန့်မှန်းထားတာလဲတွေ့ရပါတယ်။ ပုံမှာ အစိမ်းရောင်အဖျော့နှင့် အစိမ်းရောင်အရင့် ဖုံးလွှမ်းနေသည့်ဒေသများဖြစ်ပါတယ်။ အရောင်ဖုံးလွမ်းမှုမရှိတဲ့ဒေသတွေမှာတော့ ပုံမှန်ရွာသွန်းမြဲအတိုင်းရွာသွန်းနိုင်ကြောင်း ခန့်မှန်းထားပါတယ်။

ဒီအခြေအနေအရ ဇူလိုင်လ ပထမပတ်အတွင်း -

🔸 ရခိုင်ပြည်နယ်၊ မကွေးတိုင်းတောင်ပိုင်း၊ နေပြည်တော်၊ ရှမ်းပြည်နယ်တောင်ပိုင်း၊ ကယားပြည်နယ်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ မွန်ပြည်နယ်၊ ကရင်ပြည်နယ်နဲ့ တနင်္သာရီတိုင်းတွေမှာ မိုးရွာသွန်းမြဲအထက်ရွာသွန်းနိုင်ချေ ၅၀% မှ ၆၅% အထိရှိနေကြောင်းနဲ့ ကျန်ပြည်နယ်တိုင်းများမှာတော့ ရွာသွန်းမြဲခန့်သာရှိနိုင်မှာဖြစ်ကြောင်း သုံးသပ်တင်ပြလိုက်ပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။