မိုးလွန်ကာလရောက်ရှိနေပြီဖြစ်ပြီး ဒေသအချို့တွင် မိုးပါးပါးသာ ရွာနိုင်တော့မည်

လက်ရှိမိုးလေဝသအခြေအနေတွေ၊ လေစီးကြောင်းအခြေအနေတွေအရ မိုးရာသီကုန်သလောက် ရှိသွားပြီဖြစ်ပြီး ဒေသအချို့မှာ မိုးပါးပါးရွာနိုင်ချေသာရှိတော့တယ်လို့ နိုင်ငံတကာမိုးလေဝသ ထုတ်ပြန်ချက်တွေကို ကိုးကားခန့်မှန်းပေးနေသူ ဆရာဦးဝင်းနိုင်က ပြောပါတယ်။

ဒီအချိန်ဟာ မိုးစပါးအများစုရိတ်သိမ်းချိန်လည်းဖြစ်နေလို့ တောင်သူလယ်သမားတွေအနေနဲ့ ရာသီဥတု အဖျက်အဆီး ကင်းကင်းနဲ့ စပါးရိတ်သိမ်းမှုတွေ ပြုလုပ်နိုင်တော့မှာဖြစ်ပါတယ်။

လက်ရှိမိုးလေဝသအခြေအနေတွေ၊ မိုးပါးပါးရွာနိုင်ချေရှိသေးတာက ဘယ်ဒေသတွေလဲလို့ ဆရာဦးဝင်းနိုင်ထံ Green Way က ဆက်သွယ်မေးမြန်းကြည့်ရာမှာတော့

“ မိုးရာသီကုန်သွားပြီးတော့ မိုးလွန်ရာသီထဲကို ရောက်လာပြီလို့ ပြောရပါမယ်ဗျ။ မိုးလွန်ရာသီ(မိုးလွန်ကာလ)က အောက်တိုဘာ ၁၁ - နိုဝင်ဘာလ ၃၀ ရက်နေ့အထိဖြစ်ပါတယ်လို့ ဆရာကြီးဦးထွန်းလွင်က သတ်မှတ်ထားပါတယ်။

အနောက်တောင်မုတ်သုံလေဟာ အိန္ဒိယမှာ ပုံမှန်ထက် ၄ ရက် နောက်ကျပြီးမှ ဆုတ်ခွာတယ်လို့လည်း အိန္ဒိယမိုးလေဝသဌာနက ကြေညာထားပါတယ်။

ဒါကြောင့် မြန်မာနိုင်ငံမှာလည်း မုတ်သုံဆုတ်ခွာရက်က ပုံမှန်ထက် ၄ ရက် နောက်ကျပြီး ဆုတ်ခွာခဲ့ပြီး အောက်တိုဘာလ ၁၉ ရက်နေ့မှာ အပြီးဆုတ်ခွာသွားပြီလို့ သတ်မှတ်လို့ ရပါတယ်။

ဆိုတော့ အခုချိန်ဟာ မိုးလွန်ကာလပါ။ ဒီအချိန်မှာ ဖြစ်တတ်တဲ့ အရှေ့ဘက်ကဝင်လာမဲ့ မုန်တိုင်းအကြွင်းအကျန်တွေကြောင့် ဖျက်မိုးတွေ ရွာနိုင်မလား/ မရွာဘူးလားဆိုတာပဲ စောင့်ကြည့်ရပါမယ်”လို့ ပြောပါတယ်။ မိုးရွာနိုင်တဲ့အခြေအနေရှိမှုအပေါ် ဆက်လက်မေးမြန်းရာမှာတော့ ဆရာက “နောက်လာမယ့် ၃ ရက်မှာ ကချင်ပြည်နယ်နဲ့ စစ်ကိုင်းတိုင်းတွေကလွဲလို့ ကျန်တိုင်းနဲ့ ပြည်နယ်တွေမှာ မိုးအနည်းငယ်ရွာနိုင်ချေတော့ ရှိပါသေးတယ်။ ၃ ရက်ပေါင်းမှ မိုးရေချိန်အများဆုံး ၁ လက်မခန့်ပါပဲ။ မိုးက အတော်ကိုနည်းသွားပါပြီ။ နောက် ၅ ရက်မှ ၁၀ ရက်အတွင်းမှာတော့ ဖျက်မိုး/အခါလွန်မိုးအန္တရာယ် မရှိပါဘူး။ ပင်လယ်ပြင်မှာလည်း ထူးခြားတဲ့အခြေအနေမရှိပါဘူး” ဆိုပြီး ပြောပြပေးသွားခဲ့ပါတယ်။

Photo - ဦးဝင်းနိုင်

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။