တစ်ပတ်အတွင်း ကမ္ဘာ့ရော်ဘာဈေးကွက်သုံးသပ်ချက်

လတစ်လရဲ့ ၂၅ ရက်နေ့ဝန်းကျင်မှာ TOCOM လို့ အတိုကောက်ခေါ်တဲ့ Tokyo Commodity Exchange မှာ ကန်ထရိုက်လအသစ် ပြောင်းလေ့ရှိပါတယ်။ ဒီလမှ နောက် ၆ လ မြောက်လကို စံအဖြစ်ထားပါတယ်။ ဇူလိုင်ရောက် တော့မယ်ဆိုတော့ ဇူလိုင်လမှစ၍ နောင် ၆ လမြောက်ဖြစ်တဲ့ ဒီဇင်ဘာကို ပြောင်းပါတယ်။ အခုလတ်တလော ရောင်းဝယ် နေကြတာက ကန်ထရိုက်စာချုပ်ကို ရောင်းဝယ်တာသာဖြစ်ပြီး ရော်ဘာကိုတော့ ဒီဇင်ဘာလမှ ပေးအပ်ရမှာဖြစ်ပါတယ်။ ဒါကြောင့် ဒီလိုဈေးကွက်ကို Future ဈေးကွက်လို့ခေါ်ကြတယ်။

တိုကျိုရဲ့ စံဖြစ်တဲ့ ကန်ထရိုက်လအသစ်အစ ရော်ဘာဈေးဟာ အင်္ဂါနေ့မှာ အတက်နဲ့ပိတ်သွားတယ်။ တနင်္လာနေ့တုန်းက ရော်ဘာဈေးက ၂၀၁၆ အောက်တိုဘာလကစတွက်ရင် အနိမ့်ဆုံးကိုရောက်သွားတော့ ရင်းနှီးမြှုပ်နှံ့သူတွေက ဈေးအနိမ့်နဲ့ ဝယ်ကြတယ်လေ။ အဝယ်လိုက်တော့ ဈေးတက်ပြီပေါ့။ ဒါပေမယ့် အထွက်ကောင်းတဲ့အချိန်မို့ ရော်ဘာရောင်းလိုအား များနေခြင်းက စိုးရိမ်စရာဖြစ်နေတော့ ဈေးကသိပ်မရနိုင်ဖြစ်နေတယ်။

တိုကျိုရဲ့ TOCOM မှာ ဒီနေ့ ကန်ထရိုက်လဟာ ဒီဇင်ဘာကို စပြောင်းတယ်။ ဈေးအပိတ်မှာ အဖွင့်ဈေး ၁၇၁.၆ ယန်း ထက် ဝ.၉ ယန်းတက်ပြီး ၁၇၂.၅ ယန်း($၁.၅၇)/ကီလိုဂရမ်ဈေးကို ရောက်သွားတယ်။

အရှေ့တောင်အာရှရဲ့ ရော်ဘာဈေးကို ထင်ဟပ်တဲ့ TOCOM ရော်ဘာဈေးဟာ မနေ့ တနင်္လာနေ့က ၂၀၁၆ ခု အောက်တို ဘာလ ၇ ရက်နေ့ကစတွက်ရင် အနိမ့်ဆုံးဖြစ်တဲ့ ၁၇၁ ယန်းဈေးကို ရောက်သွားတယ်။ အကြောင်းက အာရှဘက်မှာ ရော်ဘာအထွက်တွေ များလာခြင်းနဲ့ အရန်ရော်ဘာတွေ များနေခြင်းကြောင့်ပါ။

"အခြေခံအားဖြင့် ဈေးကွက်က အားနည်းနေပုံရတယ်။ တရုတ်ရဲ့ အရန်ရော်ဘာများနေသလို TOCOM ရဲ့ စတော့ ကလည်း များနေလို့ပါပဲ" တဲ့ ယုတက ရှိုးဂျိမှ ဈေးကွက်ဆန်းစစ်သူ Jiong Gu ကပြောပြပါတယ်။

"ဒါပေမယ့် ရော်ဘာဈေး ပြန်ခုန်တက်ကောင်း တက်နိုင်တယ်။ short position ကိုတည်ဆောက်နေတဲ့ ဈေးကစားသူ အရေအတွက်က များလာနေတာကိုး" လို့သူကပြောပြပါတယ်။

သူ့စကားမှာပါတဲ့ short position ဆိုတဲ့ သဘောကိုပြောပြရဦးမယ်။ လွန်ခဲ့တဲ့ တစ်လခွဲလောက်ကဈေးက အခု ဈေးထက်မြင့်နေသေးတယ်။ အဲဒီအချိန်က ကုန်သည်တွေက ရော်ဘာဈေးဟာ ကျဦးမယ်လို့ ယူဆထားတယ်။ ဒါနဲ့ ဒီဈေး အကျမှာ အမြတ်ရအောင်လုပ်တဲ့နည်းဖြစ်တဲ့ Short position ကိုလုပ်ကြတယ်။ လုပ်တဲ့နည်းက ဈေးကစားမယ့် ကုန်သည်ပွဲစားဟာ ရော်ဘာစတော့တွေ ကိုင်ထားတဲ့သူတစ်ဦးစီက သူလိုသလောက် ခနချေးလိုက်တယ်။ ချေးလိုက်တဲ့ ကန်ထရိုက်စာချုပ်ကို ချက်ချင်း သူရောင်းချလိုက်တယ်။ ဆိုပါတော့ အဲဒီတုန်းက ၁ ကီလိုကို ၁၈၁ ယန်းဈေးနဲ့ ရောင်း လိုက်တယ်။ ဒီရောင်းရငွေကို ကိုင်ထားပြီး ဈေးထပ်အကျကို စောင့်နေတော့တယ်။ အဲ... ခုလိုဒီအပတ်အစ တနင်္လာနေ့မှာ သူမှန်းထားတဲ့ဈေး ၁၇၁ ယန်းဈေးကို ကျလာတော့တယ်။ ဒီတော့မှ သူချေးထားတဲ့ ပမာဏအတိုင်း ၁၇၁ ယန်းဈေးနဲ့ ပြန်ဝယ်ပြီး အကြွေးဆပ်လိုက်တယ်။ သူက ၁ ကီလိုကို ၁၀ ယန်း မြတ်သွားပြီပေါ့။

ယုတက မှန်းတဲ့ ပြန်တက်မယ်ဆိုတာ Short သမားတွေ ပြန်ဝယ်တဲ့အချိန်ရောက်လို့ပဲ။ သူတို့က သူတို့ဈေးကြိုက်တဲ့ အချိန်ကို ချက်ချင်းဝယ်မှ။ နို့မဟုတ်ပဲ ဈေးတက်သွားရင် ရှုံးမှာကိုး။ အဲလို short သမားအများအပြားက စုပြုံဝယ်တဲ့အခါ ဈေးပြန်လိုက်ပြီး ပြန်တက်ပါတယ်။

တစ်ခါ အချို့ကုန်သည်ကလည်း ဈေးအကျကို စောင့်ပြီးဝယ်ကြတာရှိတော့ ၂ ခုပေါင်းပြီး ပိုအဝယ်လိုက်လာတယ်။ ဈေးပို တက်ဖို့အကြောင်းဖြစ်တယ်။ ရေနံဈေးတက်လာတဲ့အကြောင်းကလည်း ကုန်သည်တွေရဲ့ ဝယ်လိုစိတ်ကို နှိုးဆွတယ်။ ရေနံဈေးတက်ရင် ရော်ဘာဈေးလည်း လိုက်တက်မယ်လေ။ ဒါကအခြေခံအချက်ပဲ။ ကျနော်တို့ရော်ဘာကို တိုင်ယာ လုပ်ရာမှာ အဓိကသုံးတယ်။ ထွက်သမျှရော်ဘာရဲ့ ထက်ဝက်ကျော်ဟာ တိုင်ယာထဲရောက်ကုန်တာ။ တိုင်ယာမှာက သဘာဝရော်ဘာချည်း သုံးလို့မရဘူး။ ရော်ဘာတု ရောရတယ်။ သူကတောင် အချိုးများသေးတယ်။ ရော်ဘာတုက ရေနံ ထွက်ပစ္စည်းဖြစ်တယ်။ ရေနံဈေးတက်ရင် ရော်ဘာတုဈေးတက်မယ်။ ဒီတော့ သူနဲ့အတူပါဝင်ဘက်ဖြစ်တဲ့ သဘာဝ ရော်ဘာလည်း ဈေးလိုက်တက်မယ်။

ရေနံဈေးတက်ရတဲ့အကြောင်းတွေက ကနေဒါမှာ ရေနံအထွက်လျော့တယ်။ အမေရိကန်ရဲ့ ရေနံစိမ်းစတော့က နည်းနေ တယ်။ လစ်ဗျားရဲ့ ရေနံအိတ်စပို့က မသေချာဘူး။ ပြီးတော့ ယူအက်စ်က အီရန်ရဲ့ နိုဝင်ဘာကန်ထရိုက်လ ရေနံကို အဝယ် ရပ်ဘို့ သူ့ရဲ့ မဟာမိတ်တွေကို တားထားတယ်။ ဒီတော့ဈေးကွက်မှာ ရေနံရောင်းလိုအားနည်းလာတယ်။ ရောင်းအားနည်း တော့ ဈေးတက်လာတယ်။

ဒါကြောင့်မို့ ဒီအပတ်မှာ TOCOM ဈေးကွက်မှာ အင်္ဂါနေ့ကစလို့ ဈေးတက်လာတာ ၃ ရက်ဆက်တိုက်ပဲ။ ကြာသပတေး နေ့ အထိပဲ။ အင်္ဂါနေ့မှာ ၁၇၂.၅ ယန်း/ကီလိုဂရမ်၊ ဗုဒ္ဓဟူးနေ့မှာ ၁၇၃.၈ ယန်း/ကီလိုဂရမ်၊ ကြာသပတေးနေ့မှာ ၁၇၅.၂ ယန်း/ကီလိုဂရမ် ဈေးနဲ့ အသီးသီးဈေးပိတ်ခဲ့တယ်။ ခုစာရေးနေတုန်း သောကြာနေ့မှာလည်း ၁၇၆.၃ ယန်းနဲ့ ပိတ်တယ်ဆိုတော့ ၄ ရက်ဆက်တိုက် တက်တယ်ဖြစ်သွားပြီပေါ့။

တနင်္လာနေ့က အနိမ့်ဆုံးဈေး ၁၇၁ ယန်းနဲ့ယှဉ်ရင် ၅.၃ ယန်း တက်သွားတာပါ။ ၁ တန်ဆိုရင် ယန်း ၅၃၀၀ ပေါ့။

ညီသွေး

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...