စိုက်/မွေးနယ်ပယ်မှာ အမျိုးသမီးများကို အားအပြုရဆုံး နိုင်ငံများ (၁)

စိုက်ပျိုးမွေးမြူရေးဆိုတာက လူသားတွေရဲ့အခြေခံအကျဆုံးလိုအပ်ချက်ဖြစ်တဲ့ စားဝတ်နေရေးကို တိုက်ရိုက်ဖြည့်ဆည်းပေးနေတဲ့နယ်ပယ်ပါ။ မြန်မာနိုင်ငံမှာတော့ စိုက်ပျိုးမွေးမြူရေးနယ်ပယ်လို့ဆိုလိုက်တာနဲ့ အမျိုးသားတွေနဲ့ တွဲမြင်ကြတာများပါတယ်။ တချို့ဒေသတွေမှာတော့ အမျိုးသမီးတွေဦးဆောင်လုပ်နေတာတွေလည်း ရှိပါတယ်။

တကယ်တော့ အမျိုးသမီးတွေအနေနဲ့ ဒီစိုက်/မွေးကဏ္ဍမှာ ထဲထဲဝင်ဝင်ကို ပါဝင် သင့်ပါတယ်။ ဒီလိုပါဝင်ခြင်းအားဖြင့် ဘာတွေအကျိုးရှိစေနိုင်လဲဆိုတော့ ဝင်ငွေနဲ့ အစားအသောက်တွေကို ကိုယ်တိုင်ဖန်တီးရယူနိုင်မှာဖြစ်ပါတယ်။ နောက်ဆက်တွဲ အနေနဲ့ စားနပ်ရိက္ခာဖူလုံစေသလို ဝင်ငွေတိုးအောင် ဖန်တီးနိုင်မှာလည်း ဖြစ်ပါတယ်။

စိတ်မကောင်းစရာကောင်းတာက စိုက်ပျိုးမွေးမြူရေးနယ်ပယ်မှာ အမျိုးသမီးတွေ အများဆုံးပါဝင်လုပ်ကိုင်နေတာက ဖွံ့ဖြိုးမှုအနည်းဆုံးတိုင်းပြည်တွေမှာ ဖြစ်နေတာပါ။ လေ့လာမှုတွေအဆိုအရတော့ စိုက်ပျိုးမွေးမြူရေးနယ်ပယ်ဟာ အမျိုးသမီးတွေအတွက် စီးပွားရေးနဲ့ လူမှုရေးပိုင်းမှာ အရမ်းအရေးကြီးပါတယ်တဲ့။

အမျိုးသမီးတွေအနေနဲ့ ကိုယ်ပိုင်စိုက်ခင်းတွေ၊ ကိုယ်ပိုင်မွေးမြူရေးခြံတွေ ပိုင်ဆိုင်မယ်ဆိုရင် နည်းပညာပိုင်းတွေပိုမြင်လာမယ်၊ ကိုယ့်ဝင်ငွေနဲ့ကိုယ်ရပ်တည်လာနိုင်မယ်၊ အမှီအခိုကင်းကင်းနဲ့ မိသားစုတွေကို ကျွေးမွေးစောင့်ရှောက်လာနိုင်မယ်၊ ဆင်းရဲမွဲတေမှုကနေ ရုန်းထွက်နိုင်တဲ့အခွင့်အလမ်းတွေ ပိုရလာမယ် စသဖြင့် အကျိုးကျေးဇူးတွေ အများကြီးရနိုင်ပါတယ်။ ဒီလို မိသားစုတနိုင်တပိုင်ကနေတဆင့် အဖွဲ့အစည်းကြီးတစ်ခုလုံးအထိ အကျိုးပြုမှုတွေက ကျယ်ပြန့်သွားနိုင်မှာပါ။

ဆိုတော့ ကမ္ဘာပေါ်မှာ စိုက်ပျိုးမွေးမြူရေးနယ်ပယ်မှာ အမျိုးသမီးတွေ အများဆုံး ပါဝင်လုပ်ကိုင်နေတဲ့ နိုင်ငံ (၅) နိုင်ငံကို ကြည့်လိုက်ကြရအောင်..။

(၁) ပါကစ္စတန်

ပါကစ္စတန်နိုင်ငံကတော့ စိုက်ပျိုးရေးကိုအဓိကထားရပ်တည်နေတဲ့ နိုင်ငံတစ်နိုင်ငံပါ။ ကမ္ဘာလုံးဆိုင်ရာ ပထဝီအနေအထား၊ သဘာဝပတ်ဝန်းကျင်နဲ့ လက်ရှိအခြေအနေတွေကို ဖော်ပြပေးနေတဲ့ Worldatlas ဝက်ဘ်ဆိုဒ်ရဲ့အဆိုအရတော့ ပါကစ္စတန်ရဲ့ စိုက်ပျိုးမွေးမြူရေးနယ်ပယ်မှာ လုပ်ကိုင်နေသူအားလုံးရဲ့ ၇၄ ရာခိုင်နှုန်းက အမျိုးသမီးတွေပါတဲ့။

အမျိုးသမီးတွေကို အတင်းအကျပ်အလုပ်ခိုင်းစေမှုတွေ လျော့ကျလာတာတောင်မှ ပါကစ္စတန်ရဲ့စိုက်ပျိုးမွေးမြူရေးနယ်ပယ်မှာလုပ်ကိုင်နေသူတွေက အမျိုးသမီးတွေ ပိုများနေဆဲပါပဲ။

အားပိုစိုက်ရတဲ့ မြေပြင်တာမျိုးတွေဆို အမျိုးသားတွေကလုပ်နေတာပေမယ့် အပင်စိုက်တာ၊ ပေါင်းရှင်းတာမျိုးတွေမှာတော့ အမျိုးသမီးတွေပဲ အများစုလုပ်နေတာပါ။ ပါကစ္စတန်ဟာ ကမ္ဘာ့ဝါကုန်ကြမ်းထုတ်လုပ်မှုအများဆုံးနိုင်ငံထဲပါနေပြီး ဝါဆွတ်တဲ့ နေရာမှာတော့ အမျိုးသမီးအများစုက လုပ်ပါတယ်။

ဒီလိုလုပ်တဲ့အချိန်မှာတော့ နေလောင်ဒဏ်ခံရတာ၊ မြွေကိုက်ခံရတာ၊ ပိုးမွှားတွေကိုက်ခံရတာ၊ ဝါသီးတွေက လက်ကိုရှတာ စတဲ့ဒဏ်တွေကို ခံရတာရှိပါတယ်။

ကမ္ဘာကြီးအတွက် လိုအပ်တဲ့ အဝတ်အစားတွေ၊ စက်မှုထုတ်ကုန်တွေအတွက် သူတို့အဲ့ဒီလို ပေးဆပ်နေပေမယ့် သူတို့ရတဲ့လုပ်အားခကတော့ အနည်းငယ်သာရှိနေတာကတော့ မဖြစ်သင့်တဲ့အချက်တစ်ခု ဖြစ်နေဆဲပါပဲ။

(၂) တန်ဇန်းနီးယား

အရှေ့အာဖရိကနိုင်ငံတစ်နိုင်ငံဖြစ်တဲ့ တန်ဇန်းနီးယားရဲ့ စားဝတ်နေရေးဟာလည်းစိုက်ပျိုးမွေးမြူရေးအပေါ်မှာ အခြေခံထားပြီး နိုင်ငံလူဦးရေရဲ့ သုံးပုံနှစ်ပုံလောက် ပါဝင်ပတ်သက်နေတာပါ။ အဲ့ဒီသုံးပုံနှစ်ပုံထဲမှာမှ ၇၀ ရာခိုင်နှုန်းက အမျိုးသမီးတွေပါ။

ဝါရှင်တန်တက္ကသိုလ်ရဲ့ ၂၀၁၁ တုန်းက လေ့လာမှုတစ်ခုရဲ့ အဆိုအရ စိုက်/မွေးနယ်ပယ်မှာ အမျိုးသမီးပါဝင်တဲ့ရာခိုင်နှုန်းဟာ ဘယ်ဆာဟာရတစ်ပိုင်းနိုင်ငံတွေထက်မဆို တန်ဇန်းနီးယားက ပိုများပါတယ်တဲ့။ အဲ့ဒီမှာ အမျိုးသမီးလူဦးရေစုစုပေါင်းရဲ့ ၈၁ ရာခိုင်နှုန်းက စိုက်ပျိုးမွေးမြူရေးအလုပ်တွေလုပ်ကြတာဖြစ်ပြီး တခြား ဆာဟာရတစ်ပိုင်း နိုင်ငံတွေမှာတော့ အများဆုံး ၅၅ ရာခိုင်နှုန်းပဲရှိပါတယ်။  

တန်ဇန်းနီးယားလယ်သမားအများစုဟာ တစ်ပိုင်တစ်နိုင် မိသားစုပိုင်လယ်ယာတွေမှာ လုပ်ကိုင်ကြတာဖြစ်ပြီး အများစုက ၂ ဟက်တာ( ၅ ဧကခန့်) အောက်သာ ပိုင်ကြ တာပါ။ ဒီလိုအမျိုးသမီးတွေက လယ်သမားဖြစ်နေကြပေမယ့် တန်ဇန်းနီးယားရဲ့ မြေယာဥပဒေအရ အမျိုးသမီးတွေမြေယာပိုင်ဆိုင်ခွင့်ကို တားမြစ်ထားတာကတော့ စိန်ခေါ်မှုတစ်ရပ် ဖြစ်နေဆဲပါပဲ။

အမျိုးသမီးတွေကို စိုက်ပျိုးမွေးမြူရေးနယ်ပယ်မှာ အများဆုံးအားပြုနေရတဲ့ နောက်ထပ် နိုင်ငံ (၃) နိုင်ငံရဲ့အကြောင်းကိုတော့ အပိုင်း (၂) မှာ ဖော်ပြပေးသွားပါ့မယ်။

Ref; https://www.globalcitizen.org/en/content/women-in-agriculture-around-the-world/

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်