ဝင်ငွေကောင်းအလုပ်ကိုစွန့်လို့ ဖရဲတောင်သူမယ်လုပ်ပြီး ပျော်ရွှင်မှုကိုရှာဖွေသူ

တရုတ်အမျိုးသမီးတစ်ဦးဟာ ပြီးခဲ့တဲ့ အောက်တိုဘာလထဲမှာ လစာကောင်းတဲ့ ကုမ္ပဏီအလုပ်ကို စွန့်လွှတ်ခဲ့ပြီး သူမ အတောင့်တဆုံး အလုပ်အကိုင်တစ်ခုဖြစ်တဲ့ ဖရဲသီးတောင်သူဘဝကို ရွေးချယ်ဖို့ ဆုံးဖြတ်ချက်ချမှတ်ခဲ့ပါတယ်။

တရုတ်အရှေ့ပိုင်း ရှန်ဒေါင်ပြည်နယ်ထဲက Doudou (သို့သို့)လို့ ခေါ်တဲ့ ဒီအမျိုးသမီးဟာ နာမည်ကျော်တက္ကသိုလ်တစ်ခုကနေ မဟာဘွဲ့ကို ရရှိထားပြီး အရင်ကတော့ အွန်လိုင်းဂိမ်းကုမ္ပဏီတွေမှာ လစာမြင့်တဲ့ ဈေးကွက်ချဲ့ထွင်ရေး မားကတ်တင်းရာထူးတာဝန်အမျိုးမျိုး လုပ်ကိုင်ခဲ့ပါတယ်။

ဒါပေမဲ့ သူမဟာ မားကတ်တင်းရာထူးနဲ့ တစ်ခါလာ မဲပြာပုဆိုး လုပ်နေရတာတွေအပေါ် ငြီးငွေ့ပြီး ပြီးခဲ့တဲ့ ငါးနှစ်အတွင်း ကုမ္ပဏီအလုပ် သုံးခုအထိ ပြောင်းလဲခဲ့ပါတယ်။

"ပရောဂျက်တစ်ခု ဒါမှမဟုတ် အလုပ်တစ်ခုကို အချိန်အကြာကြီး လုပ်လာရတဲ့အခါ ငြီးငွေ့လာပါတယ်။ ဒါကြောင့် ကျွန်မ အလုပ်က ထွက်ခဲ့ပြီး ဆန်းသစ်တဲ့အရာတစ်ခုခုလုပ်ဖို့ မျှော်လင့်ထားတာပါ" လို့ သူမ ရှင်းပြပါတယ်။

Doudou ရဲ့ အရင်းနှီးဆုံးသူငယ်ချင်း Sansan ကလည်း သင်တန်းကျောင်းဆရာမအလုပ်ကနေ ထွက်ချင်နေခဲ့ပြီး စိုက်ပျိုးရေးထဲကို ခြေစုံပစ်ဝင်ဖို့ ရွေးချယ်ခဲ့ပါတယ်။

ဒီလိုနဲ့ သူတို့သူငယ်ချင်းနှစ်ယောက် ပြီးခဲ့တဲ့ နိုဝင်ဘာလမှာ အလုပ်စပ်တူ စတင်ခဲ့ကြပါတယ်။ သူတို့ဟာ ရှန်ဒေါင်ပြည်နယ်ရဲ့ မြို့တော် ဂျီနန်အနီးမှာ ဖန်လုံအိမ်စိုက်ခင်းဟောင်းတစ်ခုကို ငှားရမ်းပြီး မွမ်းမံပြင်ဆင်ခဲ့ကြပါတယ်။

နေရာငှားရမ်းခ၊ မွမ်းမံပြင်ဆင်ခနဲ့ လုပ်ငန်းအတွက် လိုအပ်တဲ့ ပစ္စည်းပစ္စယဖိုးတွေ အားလုံးပေါင်းရင် ယွမ်ငွေတစ်သိန်း (၁၄၅၀၀ ဒေါ်လာ) လောက် ကုန်ကျလိမ့်မယ်လို့ Doudou က ခန့်မှန်းပါတယ်။

Sansan ရဲ့ မိဘတွေဟာ သမီးဖြစ်သူ မြို့ပေါ်အလုပ်ကို ထွက်ပြီး ရွာမှာ စိုက်ခင်းလုပ်ငန်း စလုပ်တဲ့အပေါ် အစောပိုင်းက ဘယ်လိုမှ နားမလည်နိုင်ခဲ့ပါဘူး။ အခုတော့ မိဘတွေဟာ သမီးရဲ့ ဖရဲခြံမှာ ခြံလုပ်သားတွေအဖြစ် ဝင်ကူပေးနေကြပါပြီ။

Doudou ကတော့ အခုချိန်အထိ သူမမိဘတွေကို အကျိုးအကြောင်း မပြောပြရသေးပါဘူး။

"ကျွန်မမိဘတွေဟာ အခု ကျွန်မ ဖရဲတောင်သူဖြစ်နေတာကို မသိကြသေးပါဘူး။ သူတို့က ကျွန်မ ဂိမ်းကုမ္ပဏီမှာ လုပ်နေတုန်းလို့ ထင်ကြတယ်။ ဖရဲသီးတွေ မှည့်ချိန်ရောက်မှပဲ ဖွင့်ပြောဖို့ စီစဉ်ထားတယ်။ သူတို့ကိုလည်း မြည်းကြည့်ခိုင်းရမယ်" လို့ Doudou က ပြောပါတယ်။

လောလောဆယ် ကုမ္ပဏီတုန်းက ရတာရဲ့ ဆယ်ပုံတစ်ပုံသာ ဝင်ငွေရရှိပေမယ့် Doudou တစ်ယောက် ဖရဲတောင်သူဖြစ်နေတဲ့ ပစ္စုပ္ပန်ဘဝကို ရောင့်ရဲတင်းတိမ်ကြောင်း ပြောပြပါတယ်။

"စိုက်ပျိုးရေးအလုပ်ဟာ ကျွန်မ ခံစားနေခဲ့ရတဲ့ အိပ်မပျော်၊ စားမဝင်ရောဂါကို ကုသပေးပါတယ်။ ပြီးခဲ့တဲ့ သုံးလအတွင်း ဝိတ် ၁၁ ပေါင်လောက်တောင် တက်လာတယ်" လို့ Doudou က ပြောပါတယ်။

သူတို့ သူငယ်ချင်းနှစ်ယောက်ရဲ့ သမားရိုးကျမဟုတ်တဲ့ အသက်မွေးဝမ်းကြောင်းရွေးချယ်မှုအပေါ် တရုတ်လူမှုကွန်ရက် Weibo သုံးစွဲသူများစွာက ချီးကျူးစကား ပြောဆိုကြပါတယ်။

"သူမက ရိုးရှင်းတဲ့ဘဝအမြင် ရှိသူလို့ ပြောရမယ်" လို့ တစ်ယောက်က ရေးထားပါတယ်။

နောက်ထပ်တစ်ယောက်ကလည်း ဘဝကို အလားတူ ဖြတ်သန်းချင်တဲ့အကြောင်းကို "ငါလည်း ငါစိတ်တိုင်းကျ ဘဝကို ရွေးချယ်ဖြတ်သန်းခွင့်ရရင်ကောင်းမယ်" လို့ ရေးထားပါတယ်။

အဲဒီလို ချီးကျူးမှုတွေ ရှိနေပေမယ့်လည်း Doudou က ဘဝတစ်ဆစ်ချိုး ပြောင်းလဲစေတဲ့ အဆုံးအဖြတ် ဖြစ်တာကြောင့် မိသားစုနဲ့ တခြားကိစ္စတွေကို အရင်စဉ်းစားပြီးမှ ဆုံးဖြတ်ကြဖို့ အကြံပြုထားပါတယ်။

"သူတို့အခြေအနေနဲ့ ကျွန်မက မတူညီဘူးလေ။ ကျွန်မက အသက်ငယ်ရွယ်တဲ့ လူလွတ်တစ်ယောက်။ ဒီတော့ ဘယ်သွားမလဲ၊ ဘာလုပ်မလဲ ကြိုက်တာ လုပ်လို့ရတယ်" လို့ သူမ ရှင်းပြပါတယ်။

ဝေယံဟိန်း (B.Ag)

Ref: Chinese woman pursues happiness by leaving high-paying job to become watermelon farmer - nextshark.com

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်