မုန်တိုင်းငယ် ထိုင်းဘက်သို့ဖြတ်ထွက်နေပြီဖြစ်သော်လည်း ယင်းအရှိန်ကြောင့် မွန်/တနင်္သာရီ၊ ဧရာဝတီကမ်းရိုးတန်းများ လေ၊ မိုး သည်းထန်နိုင်သေး

ကပ္ပလီပင်လယ်ပြင်မြောက်ပိုင်း(မုတ္တမကမ်းလွန်အနီး)မှာ ဖြစ်ပေါ်နေတဲ့ အားကောင်းသောလေဖိအားနည်းရပ်ဝန်း (Invest 93 B/ မုန်တိုင်းငယ်) ဟာ ဒီနေ့မှာ ကရင်ပြည်နယ်ဘက်ကနေ ထိုင်းဘက်သို့ဖြတ်ထွက်နေပြီဖြစ်ပေမယ့် သူ့အရှိန်ကြောင့် မွန်/တနင်္သာရီ၊ ဧရာဝတီကမ်းရိုးတန်းများ လေ၊ မိုး သည်းထန်နိုင်သေးတယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင်က သတိပေးထားပါတယ်။

“ အခု Invest - 93B ရဲ့ ဘားအံကိုကျော်သွားပြီ။ ဖြတ်သွားတဲ့လမ်းကြောင်းက ဖားကပ်တို့၊ ဘားအံတို့ ကိုကျော်ပြီးတော့ လှိုင်းဘွဲ့ဘက်ကို ဦးတည်ပြီးသွားတာပေါ့။ အဲ့ဒီကနေ ထိုင်းနယ်စပ်ကို ဖြတ်မယ်။ ပြီးရင် ထိုင်းမြောက်ပိုင်းကိုဖြတ်ပြီး လာအို၊ ဗီယက်နမ်အထိ သူကဆက်သွားမှာ။ ဒီနေ့ထွက်သွားမှာ” လို့ ဦးဝင်းနိုင်က Green Way ကို ဒီနေ့ မေ ၂၀ ရက် မွန်းလွဲ ၃ နာရီခွဲခန့်က ပြောပါတယ်။

ကမ္ဘာလုံးဆိုင်ရာ မိုးလေဝသခန့်မှန်းဝက်ဘ်ဆိုဒ်ဖြစ်တဲ့ ECMWF ရဲ့ ကြိုတင်ခန့်မှန်းချက်အရဆိုရင်တော့ ၂၁ ရက်နေ့ မနက်စောစောမှာ ထိုင်းနယ်စပ် သာချောင်းယန်ဆိုတာကို ဖြတ်ပြီး အပြင်ထွက်သွားတော့မှာဖြစ်တယ်လို့ ဦးဝင်းနိုင်က ဆိုပါတယ်။

အဲ့ဒီမုန်တိုင်းငယ်က ထွက်သွားမှာဖြစ်ပေမယ့် သူ့ရဲ့အရှိန်ကြောင့် တချို့ ကမ်းနီးရေလုပ်ငန်း လုပ်ကွက်တွေဘက်မှာ လေ၊မိုး သည်းထန်နိုင်တယ်လို့လည်း ဦးဝင်းနိုင်က သတိပေးပါတယ်။

“ အရှိန်ကတော့ မုန်တိုင်းအမြီးကျန်တာပေါ့။ မုန်တိုင်းညာဘက်ခြမ်းမှာရှိနေတဲ့ တနင်္သာရီ ကမ်းရိုးတန်းတစ်လျှောက်လုံး၊ နောက် ပင်လယ်ထဲမှာရှိနေတဲ့ မြစ်ဝကျွန်းပေါ်ကမ်းရိုးတန်း ကမ်းနီးရေလုပ်ငန်းလုပ်ကွက်ရယ်၊ နောက် တနင်္သာရီ ကမ်းရိုးတန်း ရေးရဲ့အနောက်ဘက် ကမ်းနီးရေလုပ်ငန်းလုပ်ကွက် အဲ့ဒီနေရာတွေမှာ လေပြင်းတိုက်မယ့်အခြေအနေတွေက ပြင်းပြီး ကျန်နေဦးမယ်”

မေလ ၂၃ ရက် ညနေပိုင်းအချိန်ခန့်မှာလည်း ပုသိမ်မြို့အနောက်ဘက် ဘင်္ဂလားပင်လယ်အော်အရှေ့အလယ်ပိုင်းပင်လယ်ပြင်မှာ နောက်ထပ် INVEST တစ်လုံး စတင်ဖြစ်‌ပေါ်လာနိုင်မယ့်အခြေအနေကိုလည်း ဆက်လက်စောင့်ကြည့်ရမယ်လို့ ဦးဝင်းနိုင်က သတိပေးထားပါတယ်။

အဲ့ဒီ INVEST SYSTEM ထပ်ဖြစ်လာတဲ့အခါ အရှေ့ဘက်ကို ကနဦးရွေ့လျားမယ်လို့ ခန့်မှန်းထားပြီး၊ ဧရာဝတီတိုင်းရဲ့ အနောက်ဘက် ကမ်းရိုးတန်းကို ဂေါ်ရင်ဂျီကျွန်းအနီးက မေလ ၂၄ ရက်၊ နေ့လယ်ပိုင်းမှာ ဖြတ်ကျော်ဝင်ရောက်ကာ မြောက်-အရှေ့မြောက်ဘက်ကို ဆက်လက်ရွေ့လျားနိုင်မယ်လို့ ခန့်မှန်းထားကြောင်းနဲ့  ဆက်လက်ရွေ့လျားနေချိန်မှာ SYSTEM ရဲ့ တောင်ဘက်နဲ့ ညာဘက်ခြမ်းဒေသတွေမှာ လေပြင်းကျရောက်ပြီး မိုးသည်းထန်နိုင်တယ်လို့လည်း ဦးဝင်းနိုင်က သူ့ရဲ့ဖေ့စ်ဘုတ်အကောင့်ကနေ သတိပေး ထားပါတယ်။

“ အဲ့ဒီဟာက ဆက်ဖြစ်မယ့်အနေအထား ဆိုရင် ၂၇ ရက်နေ့အထိ အဲ့ဒီရေလုပ်ငန်းလုပ်ကွက်တွေ (ဧရာဝတီနဲ့တနင်္သာရီကမ်းရိုးတန်း ကမ်းနီးရေလုပ်ငန်းလုပ်ကွက်များ) မှာ လှိုင်းကော၊ လေကော၊ မိုးကော ပြင်းပြီး ကျန်နေခဲ့မယ်။ အပြင်းဆုံးဆိုရင် တစ်နာရီ မိုင် ၅၀ လောက်အထိ တိုက်နိုင်တယ်”  

မိုးလေဝသနှင့်ဇလဗေဒညွှန်ကြားမှုဦးစီးဌာနရဲ့ ဒီနေ့ မွန်းလွဲ ၁၂ နာရီခွဲအချိန်တိုင်းထွာချက်ကို ထုတ်ပြန်ရာမှာတော့ “ မုန်တိုင်းငယ်(Depression)၏ အရှိန်ကြောင့် ယနေ့မွန်းလွဲမှ (၂၁.၅.၂၀၂၂) ရက်နေ့အတွင်း ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသ ကြီး၊ တနင်္သာရီတိုင်းဒေသကြီး၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ ဒေသအလိုက် မိုးကြီးခြင်း၊ နေရာကွက်၍ မိုးကြီးခြင်းများ ဖြစ်ပေါ်နိုင်ပါသည်။ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီ ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်း များ ကျရောက်ပြီး လှိုင်းကြီးရာမှ လှိုင်းအလွန်ကြီးနိုင်ပါသည်။ မိုးသက်လေပြင်း ကျစဉ် ရေပြင်/မြေပြင်လေသည် တစ်နာရီလျှင် (၄၅)မိုင်အထိ တိုက်ခတ်နိုင်ပါ သည်။ လှိုင်းအမြင့်မှာ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တို့တွင် (၉)ပေမှ (၁၄)ပေခန့်  ရှိနိုင်ပါသည်” လို့ ထည့်သွင်းဖော်ပြထားပါတယ်။

ဒါ့အပြင် “ မုန်တိုင်းငယ်(Depression)၏အရှိန်ကြောင့် လေပြင်းတိုက်ခတ်ခြင်းနှင့် အတူ ဒေသအလိုက်မိုးကြီးခြင်း၊ နေရာကွက်၍ မိုးကြီးခြင်းများ ဖြစ်ပေါ်နိုင်ပါသဖြင့် ကြိုတင်သတိပြု နေထိုင်ကြပါရန်နှင့် ပြည်တွင်းလေကြောင်း ပျံသန်းရေး၊ မြစ်ဝ ကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ် ပြင်တို့ရှိ ကမ်းနီး၊ ကမ်းဝေး ငါးဖမ်းရေယာဉ်များ၊ သင်္ဘောများအနေဖြင့်လည်း ကြိုတင်သတိပြုနိုင်ပါရန် အသိပေးနှိုးဆော်အပ်ပါသည်”  လို့လည်း အကြံပြုဖော်ပြထားတာတွေ့ရပါတယ်။

Photo Crd_Win Naing FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။ 

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်