မိုးရာသီခေါ်လာပေးမယ့် မုတ်သုံစဝင်နေပါပြီ...

မြန်မာနိုင်ငံထဲကို မိုးရာသီခေါ်ဆောင်လာပေးမယ့် မုတ်သုံရာသီဥတုဟာ မြန်မာနိုင်ငံတောင်ပိုင်းဒေသတွေကို စဝင်နေပြီဖြစ်ပါတယ်။ ဆိုတော့ မုတ်သုံမိုးတွေဟာလည်း အဲ့ဒီဒေသတွမှာ စတင်ရွာသွန်းနေပြီဖြစ်ပါတယ်။

ဒီမုတ်သုံမိုးတွေဟာ တဖြည်းဖြည်းနဲ့ မြန်မာနိုင်ငံအပေါ်ပိုင်းတွေကို တက်လာမှာဖြစ်ပြီး လာမယ့် ဇွန်လဆန်းမှာတော့ တစ်နိုင်ငံလုံးအတိုင်းအတာနဲ့ မိုးရာသီစတင်တော့မှာဖြစ်တယ်လို့ နိုင်ငံတကာမိုးလေဝသထုတ်ပြန်ချက်တွေကို ကိုးကားပြီး မိုးလေဝသခန့်မှန်းပေးနေသူ ဦးဝင်းနိုင်က ပြောပါတယ်။

“ ထိုင်းကထုတ်တဲ့ မိုးလေဝသ Chart ပုံတွေအရဆိုရင် မြန်မာနိုင်ငံတောင်ပိုင်းကို ဝင်ပြီလို့ပြောလို့ရတယ်။ အိန္ဒိယကလည်း မေလ ၁၉ ရက်ကနေ ၂၁ ရက်အတွင်း မြန်မာနိုင်ငံတောင်ပိုင်းကို ဝင်မယ်လို့ပြောထားပါတယ်။ ဆိုတော့ မုတ်သုံက မေလ ၁၉ ရက်ကနေ ၂၁ ရက်အတွင်းမှာ တောင်ပိုင်းဒေသတွေဖြစ်တဲ့ မွန်ပြည်နယ်၊ ကရင် ပြည်နယ်၊ တနင်္သာရီကို မုတ်သုန်က ဝင်ခဲ့ပြီ။ အောက်က မြိတ်တို့၊ ထားဝယ်တို့ဆို မိုးတွေရွာနေပြီ။ ရန်ကုန်ကို လည်း ၂၃ ရက်နောက်ပိုင်းဆို တိမ်ပါးပါးကျနေပြီ။ Temperature - dew point (အပူချိန် - ငွေ့ရည်ဖွဲ့မှတ်) လည်း ကိုက်နေပြီ။ တိမ်သာဝင်လာလို့ရှိရင် ရွာမယ်လို့ပြောလို့ရတယ်။ ၂၃၊ ၂၄၊ ၂၅၊ ၂၆ ရက်နောက်ပိုင်းတွေမှာ ဆိုရင် တိမ် အနိမ့်တွေကဆက်တိုက်ဝင်လာမှာ။ တကယ်များများရွာမှာကတော့ ၂၈ နောက်ပိုင်း ၃၀၊ ၃၁ ဆို မိုးဆက်သွားပြီ”

တစ်နိုင်ငံလုံးအတိုင်းအတာအရ မုတ်သုံဝင် မိုးဦးကျစေမယ့်အချိန်ကတော့ လာမည့် ဇွန်လဆန်းပိုင်းလောက်မှာ ဖြစ်မယ်လို့ ဦးဝင်းနိုင်က ခန့်မှန်းပါတယ်။

“ တစ်နိုင်ငံလုံးအတိုင်းအတာအနေနဲ့ကတော့ အိန္ဒိယက ကြိုတင်ခန့်မှန်းချက်ပုံအရဆို ဇွန်လ ၁ ရက်ကနေ ၅ ရက် ကြားဆို မုတ်သုံဝင်မယ်ဆိုပြီး ခန့်မှန်းထားတယ်။ ကျွန်တော်တို့ အဲ့ရက်နားရောက်တဲ့အခါ တစ်ချက်စောင့်ကြည့် ဖို့တော့လိုမယ်။ အိန္ဒိယမိုးလေဝသရဲ့ ကြိုတင်ခန့်မှန်းချက်တစ်ခုအရဆိုရင်တော့ မေလ ၁၉ ရက်နေ့နဲ့ ၂၁ ရက်ကြား မွန်၊ ကရင်၊ တနင်္သာရီတောင်ပိုင်းဒေသကို ဝင်မယ်။ မေလ ၂၂ ရက်နေ့နဲ့ ၂၆ ရက်ကြားမှာ ဧရာဝတီ၊ ရန်ကုန်၊ ပဲခူး၊ ရှမ်းပြည်နယ် အရှေ့ပိုင်းနဲ့တောင်ပိုင်းကို မုတ်သုံဝင်မယ်။ မေလ ၂၇ ရက်ကနေပြီးတော့ ဇွန်လ ၁ ရက်နေ့အထိက စစ်ကိုင်း၊ မန္တလေး၊ မကွေး၊ ရှမ်းပြည်နယ်တစ်ခုလုံး၊ ကချင်ပြည်နယ်၊ ချင်းပြည်နယ်တွေကို ဝင်မယ်။ ဇွန်လ ၁ ရက်နေ့ကနေ ၅ ရက်နေ့အတွင်း မြန်မာနိုင်ငံရဲ့ ကျန်တဲ့နေရာတွေကို ဝင်မယ်”

နောက်လာမယ့် ၅ ရက်ကနေ ၁၀ ရက်အတွင်း ရွာသွန်းနိုင်မယ့်မိုးရေချိန်လက်မတွေအနေနဲ့တော့ တနင်္သာရီ တိုင်းမှာ ၆ လက်မအထက် ၇ လက်မလောက်အထိ၊ မွန်ပြည်နယ်မှာ ၄ လက်မအထက်၊ ကရင်ပြည်နယ်မှာ ၃ လက်မခွဲကနေ ၄ လက်မခန့်အထိ၊ ပဲခူးတိုင်းမှာ ၂ လက်မကနေ ၃ လက်မအထိ၊ ရန်ကုန်တိုင်းမှာ ၂ လက်မခွဲ၊ ဧရာဝတီတိုင်းမှာ ၃ လက်မကျော်နဲ့ ရခိုင်ပြည်နယ်တောင်ပိုင်းမှာ ၃ လက်မလောက်စီအထိ ရှိနိုင်တယ်လို့ သိရပါတယ်။

ရှမ်း၊ ကချင်၊ ချင်း၊ မကွေး၊ စစ်ကိုင်းနဲ့ မန္တလေးတိုင်းမှာတော့ မိုးကရွာတော့ရွာနိုင်ပေမဲ့ နည်းနေဦးမှာဖြစ်ပြီး ကချင်ပြည်နယ်မြောက်ဖျားပိုင်း ရေခဲတောင်တွေရှိတဲ့ အစွန်းပိုင်းကတော့ မိုးများနိုင်တယ်လို့ ဦးဝင်းနိုင်က ခန့်မှန်းပါတယ်။

တရားဝင်မိုးလေဝသထုတ်ပြန်ချက်တွေအရ မုတ်သုံမိုးတွေဟာ မြန်မာနိုင်ငံတောင်ပိုင်းဒေသတွေကိုသာ ရောက်သေးတယ်ဆိုပေမဲ့ မြန်မာနိုင်ငံဒေသအများစုမှာတော့ နေရာကွက်ကျား မိုးထစ်ချုန်းရွာတာ၊ လေပြင်းတိုက်တာတွေ ရှိနေတာပါ။ မိုးလေဝသနှင့်ဇလဗေဒညွှန်ကြားမှုဦးစီးဌာနရဲ့ ယနေ့ မေ ၂၂ ရက် မနက် ၉ နာရီအချိန်ထိ မိုးလေဝသတိုင်းထွာချက် အကျဉ်းချုပ်ကိုထုတ်ပြန်ထားရာမှာလည်း “ လွန်ခဲ့သော (၂၄)နာရီအတွင်းက တနင်္သာရီ တိုင်းဒေသကြီးတွင် နေရာအနှံ့အပြား၊ မွန်ပြည်နယ်တွင် နေရာစိပ်စိပ်နှင့် နေပြည်တော်၊ စစ်ကိုင်းတိုင်းဒေသကြီး အထက်ပိုင်း၊ ပဲခူး တိုင်းဒေသကြီး၊ ရန်ကုန်တိုင်းဒေသကြီး၊ ကချင်ပြည်နယ်၊ ရှမ်းပြည်နယ်(တောင်ပိုင်း)နှင့် ချင်းပြည်နယ်တို့တွင် နေရာကွက်ကျား မိုးထစ်ချုန်းရွာခဲ့ပြီး ကျန်တိုင်းဒေသကြီးနှင့် ပြည်နယ်တို့တွင် တိမ်အသင့် အတင့် ဖြစ်ထွန်းခဲ့ ပါသည်” လို့ ဆိုထားတာတွေ့ရပါတယ်။

ဒါ့အပြင် မနက်ဖြန်အတွက် တိုင်းဒေသကြီးနှင့် ပြည်နယ်များရှိ မြို့ကြီးများအတွက် မိုးလေဝသခန့်မှန်းချက်ကို ထုတ်ပြန်ထားရာမှာလည်း မန္တလေး၊ မကွေး၊ မုံရွာတို့ကလွဲလို့ တိုင်းဒေသကြီးနှင့် ပြည်နယ်များရှိ မြို့ကြီးဒေသ တွေမှာ နေရာကွက်ကျားမိုးထစ်ချုန်းရွာတာ၊ မိုးအနည်းငယ်ထစ်ချုန်းရွာတာတွေ ရှိနိုင်တယ်လို့ မိုးဇလက ခန့်မှန်းထားပါတယ်။

အခုလို မိုးရွာသွန်းမှုတွေကကော ဘာကြောင့်ဖြစ်နေရတာလဲလို့ ဦးဝင်းနိုင်ကို မေးကြည့်ရာမှာတော့ အခုလို မှတ်ချက်ပြုပါတယ်။

“ အမှန်တော့ မုတ်သုံပဲဗျ။ ထိုင်းမိုးလေဝသဌာနကထုတ်တဲ့ မြေပြင်မိုးလေဝသ chart အရဆိုရင်လည်း အလယ်ပိုင်းဒေသတွေအထိအားကောင်းနေတဲ့ လေစီးကြောင်းကြောင့် အဲ့ဒီလေစီးကြောင်းနဲ့ ပါလာတဲ့ မိုးတိမ်တွေကြောင့် အလယ်ပိုင်းဒေသတွေအထိ မိုးတွေရွာနေတာပါပဲ။ ဆိုတော့ မိုးလေဝသမိုဒယ်တွေအရ ကျွန်တော့်အမြင်သက်သက်ဆို မုတ်သုံလေက မြန်မာနိုင်ငံအလယ်ပိုင်းထိကို ရောက်နေပြီဗျ။ ခက်တာက ဘယ်တရားဝင် မိုးလေဝသဌာနကမှ မုတ်သုံဝင်နေပါတယ်ဆိုပြီး မကြေညာထားတော့ ပြောရခက်နေတာ”

Photos Crd_ U Win Naing, မိုး/ဇလ

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...