ရေပေါ်လှောင်အိမ်စနစ်ဖြင့် တီလားပီးယားငါး မွေးမြူနည်း(၆)

၁၀။ ပိုက်လှောင်အိမ် ထိန်းသိမ်းမှု

(က) စစ်ဆေးခြင်း

စစ်ဆေးခြင်းလုပ်ငန်းကို စီမံခန့်ခွဲသူများက ခိုင်ခိုင်မာမာ တာဝန်ယူလုပ်ဆောင်ရမည် ဖြစ်ပါသည်။ဘေးအန္တရာယ်ကင်းမှုကို စောင့်ကြည့်စစ်ဆေးရန်နှင့် လှောင်အိမ်ဖြင့်မွေးမြုခြင်း ပြီးပြည့်စုံအောင်မြင်ရေးအတွက် ပိုက်လှောင်အိမ်များ မပေါက်ပြဲစေရန်နှင့် ငါးများလွတ်ထွက်မသွားစေရန် သတိပြုထိန်းသိမ်းရပါမည်။

ငါးများ၏လှုပ်ရှားမှုများကို စောင့်ကြည့်လေ့လာခြင်းနှင့် အစာကျန်များဖယ်ရှားခြင်းကိုပြုလုပ်ရန် လှောင်အိမ်အား လှည့်ပတ်ကြည့်ရှုစစ်ဆေးခြင်း ပြုလုပ်ရပါမည်။ လှောင်အိမ်ပိုက်ကွက်များ ပိတ်ဆို့ခြင်းအားရှောင်ရှားနိုင်ရန် လှောင်အိမ်ကို ငြိတွယ်လာသောအမှိုက်သရိုက်များနှင့် အခြားသောအရာ များကို ဖယ်ရှားပစ်ရပါမည်။

ရောဂါကျနေသောငါး (သို့မဟုတ်) ငါးအသေများကို ဖြစ်နိုင်သမျှ ဆောလျင်စွာ ဖယ်ရှားပစ်ရပါမည်။ ငါးများသေဆုံးရသည့်အကြောင်းရင်းကို ဆန်းစစ်ရမည်ဖြစ်ပြီး ရောဂါကာကွယ်ခြင်းနှင့် ကုသခြင်းအစီအမံများ ပြုလုပ်ရပါမည်။ အထူးသဖြင့် ရေအတက်အကျများသောကာလများဖြစ်သည့် လေပြင်းတိုက်သောရာသီနှင့် မိုးများသောရာသီကာလများတွင်ဝန်ထမ်းများနှင့် လုပ်သားများကို နေ့ဆိုင်း၊ ညဆိုင်းခွဲ၍ တာဝန်ပေး ချထားရပါမည်။

လှောင်အိမ်များသောင်တင်ခြင်းနှင့် နစ်မြုပ်ခြင်းတို့အား ရှောင်ရှားနိုင်ရန် လှောင်အိမ်များကို ခိုင်မြဲစွာချည်နှောင်ထားရပါမည်။ မုန်တိုင်းမတိုက်မီနှင့် တိုက်ပြီးနောက်လည်း လှောင်အိမ်၏ အမျိုးမျိုးသော အစိတ်အပိုင်းများ ကောင်းစွာခိုင်မြဲမှု ရှိ/မရှိကို စစ်ဆေးရပါမည်။

(ခ) သန့်ရှင်းခြင်း

လှောင်အိမ်အား (၅) ရက်မှ (၇) ရက်ကြာတိုင်း သန့်ရှင်းရေး ပြုလုပ်ပေးရပါမည်။

(ဂ) ရောဂါကျခြင်းနှင့် အခြားသောပြဿနာများ

လှောင်အိမ်ဖြင့်မွေးမြူခြင်းသည် ရှုပ်ထွေးသော ရေသတ္တဝါမွေးမြူနည်းပုံစံတစ်ရပ် ဖြစ်ပါသည်။ ငါးများကို ကျပ်တည်းစွာထည့်သွင်းမွေးမြူထားသဖြင့် အမျိုးမျိုးသော ရောဂါများကျရောက်နိုင်ပါသည်။ အကယ်၍ ရောဂါတစ်မျိုးကျရောက်သည်ကို တွေ့ရှိရပါက ငါးများအားကုသရန် ဆေး ထည့်ဖော်စပ်ထားသောအစာဖြင့်ကျွေးခြင်း (သို့မဟုတ်) ဓာတုဆေးဝါးများဖြင့် စိမ်ပေးခြင်းတို့ကို ပြုလုပ်ရပါမည်။

ထိုကဲ့သို့ပြုလုပ်ရာတွင် ကုန်ကျစရိတ်များခြင်း၊ အချိန်ကုန်ခြင်းနှင့် တစ်ခါတရံ မထိရောက်ခြင်းများဖြစ်နိုင်ပါသည်။ ရောဂါကျရောက်ခြင်းမှ ရှောင်ရှားရန် အကောင်းဆုံးနည်းလမ်းတစ်ရပ်မှာ မွေးမြူထားသောငါးနှင့် ပတ်ဝန်းကျင်ရေကို ကောင်းစွာ ဂရုပြုစီမံခန့်ခွဲမှုလုပ်ဆောင်ခြင်း ဖြစ်ပါသည်။

အကယ်၍ ပျော်ဝင်အောက်စီဂျင်နှင့် အမိုးနီးယားပမာဏများ လက်မခံနိုင်လောက်သော အနေအထားသို့ရောက်ပါက ရေအရည်အသွေးကို အခြေခံအားဖြင့် ပုံမှန်စောင့်ကြည့်စစ်ဆေးခြင်းနှင့် လုပ်ဆောင်ရမည့်အဆင့်များကို အရေးတယူ ဆောင်ရွက်သွားရမည်ဖြစ်ပါသည်။

ငါးများကိုသေချာစွာကိုင်တွယ်ခြင်းလုပ်ဆောင်မှုသည်လည်း အထူးအရေးကြီးပါသည်။ ငါးများ သည် ရေထဲ၌အသက်ရှင်နေထိုင်ခြင်းဖြစ်ပြီး ရေ၏ပြင်ပတွင် အချိန်ကြာမြင့်စွာထားခြင်းသည် ၄င်းတို့အားရောဂါဖြစ်စေနိုင်သည့် ဖိအားများဖြစ်စေပါသည်။

၁၁။ မွေးမြူထားသောငါးများ ပြန်လည်ဖမ်းဆီးကုန်ထုတ်ခြင်းနှင့် ကိုင်တွယ်ခြင်း

ငါးများပြန်လည်ဖမ်းဆီးရာတွင် လှောင်အိမ်ကို အပိုင်းလိုက် ရေပေါ်သို့ ဆယ်တင်ဖော်ယူ၍ ငါးများကို ဒိုင်းဝန်းဖြင့်ဖမ်းယူနိုင်ပါသည်။

လှောင်အိမ်ငယ်များမှ ငါးများကို ပြန်လည်ဖမ်းယူခြင်းမှာ လွန်စွာရိုးရှင်းလွယ်ကူသော လုပ်ငန်းစဉ်တစ်ရပ်ဖြစ်ပါသည်။ လှောင်အိမ်၏ တစ်ဖက်စကို ဆွဲတင်မယူလိုက်ခြင်းဖြင့် ငါးများအားလုံးသည် ထောင့်တစ်ဖက်တွင် စုစည်းမိပြီး ခြင်းတောင်းဖြင့်လည်းကောင်း(သို့မဟုတ်)ဒိုင်းဝန်းဖြင့်လည်း ကောင်း ဖမ်းယူနိုင်ပါသည်။ တစ်နည်းအားဖြင့် ဝါးလုံးတစ်လုံးဖြင့် လှောင်အိမ်၏ အောက်တစ်ဖက် တစ်ချက်စီမှ ဆွဲတင်မယူလာပြီး မွေးမြူထားသောငါးများအားလုံးကို ထောင့်တစ်နေရာတွင် စုစည်းထားပြီး ဖမ်းယူနိုင်ပါသည်။

ငါးများ၏ အရေအတွက်ကို ရေတွက်စစ်ဆေးခြင်း၊ ချိန်တွယ်တိုင်းတာခြင်းနှင့် ဆက်လက်မွေးမြူရန် လှောင်အိမ်ထဲသို့ ပြန်ထည့်ခြင်းကိုလည်း ပြုလုပ်ခြင်း(သို့မဟုတ်) ငါးများအားလုံးကို ဖမ်းယူကုန်ထုတ်ခြင်းတို့ ပြုလုပ်နိုင်ပါသည်။ အကယ်၍ အရွယ်တူငါးများရရှိရန် အရေးကြီးပါက အပြီး အစီးဖမ်းယူရန်အတွက် ရက်သတ္တပတ်(၄)ပတ်နှင့်အထက် လိုအပ်ပါမည်။ အကြောင်းမှာ တစ်ချိန်တည်းတွင် ငါးများအားလုံးသည် လိုချင်သောအရွယ်သို့ တစ်ပြိုင်နက်မရောက်ရှိနိုင်သောကြောင့် ဖြစ်ပါသည်။

ငါးများပြန်လည်ဖမ်းဆီးကုန်ဖော်ချိန်သည် ငါးမွေးမြူခြင်းလုပ်ငန်းတွင် များစွာပျော်စရာကောင်း သော အချိန်တစ်ချိန်ဖြစ်ပါသည်။ လှောင်အိမ်ငယ်ဖြင့် မွေးမြူခြင်းလုပ်ဆောင်ရာတွင် ကုန်ဖော်ခြင်းလုပ်ငန်းစဉ်သည် မြေသားကန်၌ ကုန်ဖော်ခြင်းထက် များသောအားဖြင့် ပိုမိုလွယ်ကူပါသည်။ငါးများကို လှောင်အိမ်များထဲတွင် စုစည်းထားပြီးဖြစ်၍ ဒိုင်းဝန်းဖြင့် ဖမ်းယူနိုင်ပါသည်။

လှောင်အိမ်အကြီးများ(သို့မဟုတ်) ယင်းတား စနစ်ဖြင့် မွေးမြူပါက ပြန်လည်ဖမ်းယူကုန်ဖော်သောလုပ်ငန်းမှာ ပို၍ရှုပ်ထွေးပါသည်။ ပြန်လည်ဖမ်းဆီးယူနိုင်ရန် ငါးများကို စုစည်းထားရှိရပါမည်။လှောင်အိမ်များကို အပိုင်းလိုက်ဆယ်တင် မယူခြင်း (သို့မဟုတ်) အချို့သော ဆန်ကာအမျိုးအစားများအသုံးပြုခြင်း(သို့မဟုတ်)လှောင်အိမ်အတွင်းရှိ စုစည်းထားသောငါးများကို အရွယ်ခွဲပြီး စုစည်းထားခြင်းကို လုပ်ဆောင်နိုင်ပါသည်။

Ref; ငါးလုပ်ငန်းဦးစီးဌာန။

(အပိုင်း-၇ တွင် ပိုက်လှောင်အိမ်ဖြင့် ငါးမွေးမြူရာ၌ တွေ့ကြုံနိုင်သော အခက်အခဲများ၊ ငါးရောဂါများကို ဖော်ပြပေးသွားပါမည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...