အရှေ့လေစီးကြောင်းများအရှိန်ကြောင့် မြန်မာနိုင်ငံအနှံ့ မိုးရွာသွန်းမှုများ ဆက်ရှိနေဦးမည်

တောင်တရုတ်ပင်လယ်ဘက်က ဝင်လာတဲ့ တိမ်တွေ၊ အရှေ့လေစီးကြောင်းတွေကြောင့် မြန်မာတစ် နိုင်ငံလုံးမှာ မိုးရွာသွန်းမှုတွေ ဆက်ရှိနေဦးမယ်လို့ နိုင်ငံတကာမိုးလေဝသ ထုတ်ပြန်ချက်တွေကို ကိုးကားခန့်မှန်းသူ ဦးဝင်းနိုင်က ကြိုတင်ခန့်မှန်းပါတယ်။ 

ဘင်္ဂလားပင်လယ်အော်အနောက်တောင်ပိုင်းမှာ ဖြစ်နေတဲ့ အထက်လေဝဲစီးကြောင်းတစ်ခုနဲ့ ဖိလစ်ပိုင် အရှေ့ဘက်မှာဖြစ်နေတဲ့ INVEST 98 W တို့ရဲ့ အရှိန်တွေကနေတစ်ဆင့် တောင်တရုတ်ပင်လယ်မှာ ဒီလေစီးကြောင်းတွေ အားကောင်းစေတာဖြစ်တယ်လို့ ဦးဝင်းနိုင်က ဆိုပါတယ်။

ဒီအရှိန်တွေက မြန်မာနိုင်ငံကို ဘယ်လောက်ထိ သက်ရောက်နိုင်သလဲ၊ ဘယ်ဒေသတွေမှာ မိုးတွေ ရွာစေနိုင်သလဲ၊ ဘယ်အချိန်ထိ မိုးတွေ ဆက်ရွာနေနိုင်သလဲ ဆိုတာတွေကို ဦးဝင်းနိုင်ထံ Green Way က ဆက်သွယ်မေးမြန်းထားတာကို ဖော်ပြပေးလိုက်ပါတယ်။

အထက်လေဝဲစီးကြောင်းနဲ့ INVEST 98 W တို့ရဲ့ လက်ရှိအခြေအနေတွေက ဘယ်လိုဖြစ်နေလဲ..

“ အထက်လေဝဲစီးကြောင်းက သူက အားတော့ သိပ်မကောင်းဘူး။ အခုလောလောဆယ်မှာ အိန္ဒိယတောင်ပိုင်း၊ သီရိလင်္ကာကျွန်းမြောက်ဘက်နားမှာ ဆက်ရှိနေသေးတယ်။ အားမကောင်းဘူး ဆိုပေမဲ့ တစ်ခုရှိတာက သူ့ကြောင့်မို့လို့ အရှေ့လေစီးကြောင်းတွေက လာအိုရယ်၊ ထိုင်းရယ်ကို ဖြတ်ပြီး ကျွန်တော်တို့နိုင်ငံ တောင်ပိုင်းကို ဖြတ်ဝင်တယ်။ အဲ့တော့ ဒီအထက် လေဝဲစီးကြောင်း UACC ကြောင့် ဖြစ်လာတာရယ်၊ နောက်တစ်ခုက အခု ဖိလစ်ပိုင်အရှေ့ဘက်မှာ ဖြစ်နေတဲ့ INVEST 98 W (လေဖိအားနည်းရပ်ဝန်း ဖြစ်လာနိုင်ချေအဆင့်) ရယ် အဲ့ဒီနှစ်ခုရဲ့ ဆွဲတာနဲ့တွန်းတာနှစ်ခုပေါင်းပြီး တောင်တရုတ်ပင်လယ်တစ်လျှောက်လုံးမှာလည်း အရှေ့လေစီးကြောင်း တအား အားကောင်းနေတယ်။ အဲ့တော့ တိမ်တွေက အရှေ့ဘက်က လေစီးကြောင်းရယ်၊ မြောက်လေရယ် ဒီနှစ်ခုပေါင်းလိုက်တဲ့အခါ အထက်က လေအေးစီးကြောင်းနဲ့အတူ တရုတ်ပြည်ဘက်က တိမ်တွေကာ၊ ဗီယက်နမ်မြောက်ပိုင်းက တိမ်တွေကောက ကျွန်တော်တို့ဘက်ကို စီးနေတာတွေရှိတယ်”

“ ဆိုတော့ ကျွန်တော်တို့ဆီမှာကတော့ အခုအချိန်မှာကို ရှမ်းပြည်နယ်အရှေ့ပိုင်းကိုလည်း တိမ်တွေ စဝင်နေတာ တွေ့တယ်။ မြန်မာပြည် အလယ်ပိုင်း နေပြည်တော်၊ မိတ္ထီလာ၊ မန္တလေး၊ မိုးကုတ် စသဖြင့် အဲ့ဒီဘက်ကတိမ်တွေက ဟိုး တန့်ဆည်တို့ မုံရွာတို့ကျော်ပြီး အနောက်ဘက် ချင်းပြည်နယ်အထိ ရွေ့ပြီး ဝင်နေတဲ့ တိမ်တွေရှိတယ်။ ဒီအောက်ဘက်မှာကျတော့ ထားဝယ်ပေါ်နဲ့ မွန်ပြည်နယ်၊ ကရင်ပြည်နယ်ပေါ်တွေမှာလည်း အရှေ့ ဘက်က တိမ်တွေက ခုနပြောတဲ့ အားကောင်းနေတဲ့ လေစီးကြောင်းနဲ့အတူ ရောပြီးတော့ ဝင်နေတာတွေ အများကြီးရှိတယ်။ အဲ့တော့ ၂၄ နာရီအတွင်းမှာကို မိုးရွာနိုင်မယ့်နေရာတွေကို ရှိနေတယ်”  

ဆိုတော့..လာမယ့် ၂၄ နာရီကနေ ၃ ရက်အတွင်း ဘယ်ဒေသတွေမှာ မိုးရွာ၊ မိုးများနိုင်လဲ...

" လာမယ့် ၂၄ နာရီအတွင်းဆိုရင် မြန်မာပြည်မြောက်ပိုင်းတစ်ခြမ်းလုံး၊ နေပြည်တော်ကနေစပြီး အထက်ဘက်တစ်ခုလုံး၊ နောက်ပြီးတော့ ရန်ကုန်တိုင်း၊ ဧရာဝတီတိုင်း၊ မွန်၊ ကရင်၊ တနင်္သာရီ ဒီနေရာ တွေအကုန်လုံးမှာ မိုးရွာမယ်။ တစ်ခုပဲ။ ပဲခူးတိုင်း အနောက်ခြမ်းကတော့ နည်းနည်းလွတ်တယ်။ ရခိုင်ပြည်နယ်တောင်ခြမ်းလည်း လွတ်တယ်။ ဒါက လာမယ့် ၂၄ နာရီအတွင်းဆိုရင်ပြောတာ။ ၂၄ နာရီ ကျော်သွားပြီးရင်တော့ တစ်နိုင်ငံလုံးအနှံ့ မိုးရွာနိုင်ချေရှိတယ်။ ခုနပြောတဲ့ ရန်ကုန်၊ ဧရာဝတီ၊ ပဲခူး နောက်ပြီးတော့မှ မန္တလေးတိုင်း၊ စစ်ကိုင်းတိုင်းအထက်ပိုင်းနဲ့ ကချင်ပြည်နယ်၊ ရှမ်းပြည်နယ်မြောက်ပိုင်း၊ တနင်္သာရီတိုင်း ဒီနေရာတွေမှာဆိုရင် နောက်လာမယ့် ၃ ရက်အတွင်းမှာ မိုးများနိုင်တယ်။ တအားကြီးများမယ့်အနေအထားမျိုးတော့မဟုတ်ဘူး။ တအားကြီးများနိုင်တာဆိုရင် တော့ တနိုင်းနဲ့ မြစ်ကြီးနားအထက် နောင်မွန်းအထက်လောက်မှာပဲ များမယ်" 

အရှေ့လေစီးကြောင်းတွေက ဘယ်အချိန်ထိ ဆက်ရှိနိုင်၊ သက်ရောက်နေနိုင်လဲ..

" ဆက်ရှိနေဦးမှာ။ နောက်တစ်ခုက ခုန ကျွန်တော်ပြောတဲ့ 98W က လေဖိအားနည်းရပ်ဝန်းထိလောက် ဖြစ်နေပြီ။ သူကလည်း အနောက်ဘက်ကို ဆက်ပြီးရွေ့တယ်။ ဖိလစ်ပိုင်နိုင်ငံပေါ်က ဖြတ်ပြီးတော့ တောင်တရုတ်ပင်လယ်ထဲကို ၁၁ ရက်နေ့လောက်ဆိုရင် ရောက်လာနိုင်တယ်။ ဒါ့အပြင် သူ့အနောက်က နောက်တစ်လုံးထပ်ပြီး လိုက်လာနိုင်ချေရှိတာက ၁၅ ရက်၊ ၁၆ ရက်လောက်ကျရင် ဖိလစ်ပိုင်မြောက်ခြမ်းကနေဖြတ်ပြီးတော့ ဟောင်ကောင်ဘက်ကို ဦးတည်ပြီးသွားမယ့် တစ်လုံးတွေ့ နေတယ်။ အဲ့တော့ ၁၆ ရက်ကနေ ၁၇ ရက် ၁၈ ရက်လောက်ထိ ကတော့ တောင်တရုတ်ဘက်က လေထု မငြိမ်မသက်ဖြစ်တဲ့ဟာတွေ၊ လေပွေလှိုင်းတွေ က ထိုင်းပင်လယ်ကွေ့ထိ ဖြစ်လာနိုင်တယ်။ ဆိုတော့ ခြုံပြောရရင်တော့ မြန်မာပြည်တစ်ပြည်လုံး မိုးရွာနိုင်တဲ့အခြေအနေကတော့ ၁၈ ရက်နောက်ပိုင်း လကုန်ထိကို ရှိနေနိုင်တယ်" 

( ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

Photos Crd_ U Win Naing

 (မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။ 

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်