ပြည်ပသို့ စပါးတင်ပို့ရောင်းချရာတွင် သေချာစွာ စာချုပ်ချုပ်ဆိုရောင်းဝယ်ရန် ဆန်စပါးအသင်းချုပ် အသိပေး

ရန်ကုန်၊ အောင်တိုဘာ ၂၄ ရက်။ 

   ပြည်ပသို့ စပါးတင်ပို့ရောင်းချရာတွင် ဝယ်သူနှင့် သေချာစွာစာချုပ်ချုပ်ဆိုရောင်းဝယ်ရန် မြန်မာနိုင်ငံဆန်စပါးအသင်းချုပ်က အသိပေးထုတ်ပြန်ထားသည်။

   အောက်တိုဘာလ ၂၂ ရက်က ပြုလုပ်ခဲ့သည့် မြန်မာနိုင်ငံဆန်စပါးအသင်းချုပ် စီမံခန့်ခွဲရေးကော်မတီ၊ ဗဟိုအလုပ်အမှုဆောင်ကော်မတီတို့၏ ပူးတွဲအစည်းအဝေး ဆုံးဖြတ်ချက်များအနက်မှ ကောက်နုတ်ချက်များကို ယခုလ ၂၃ ရက်က ထုတ်ပြန်သည့် အသိပေး ထုတ်ပြန်ချက်တွင် ဖော်ပြထားသည်။

   နယ်စပ်ကုန်သွယ်မှုလမ်းကြောင်းမှ တရုတ်နိုင်ငံ၊ ဘင်္ဂလားဒေ့ရှ်နိုင်ငံများသို့ စပါးတင်ပို့ရောင်းချလိုသူများနှင့် ပင်လယ်ရေကြောင်းမှ အခြားနိုင်ငံများထံသို့ စပါးရောင်းချလိုသူများအနေဖြင့် ဝယ်သူနှင့် သေချာစွာ စာချုပ်ချုပ်ဆို ရောင်းဝယ်ရန်နှင့် ပို့ကုန်လိုင်စင်အတွက် သက်ဆိုင်ရာဝန်ကြီးဌာနများထံ တင်ပြညှိနှိုင်းဆောင်ရွက်ရန် အသိပေးထုတ်ပြန် ထားသည်။

   လာမည့် နိုဝင်ဘာလနှင့် ဒီဇင်ဘာလများအတွင်း ပြည်ပနိုင်ငံများသို့ ဆန်ဈေးကွက် ရှာဖွေရေးအတွက် တရုတ်၊ ဖိလစ်ပိုင်နှင့် အာဖရိကနိုင်ငံများသို့ အဖွဲ့များခွဲ၍ သွားရောက်ရန် စီစဉ်ဆောင်ရွက်ထားကြောင်းသိရသည်။

   အဆိုပါ အစည်းအဝေးတွင် တောင်သူလယ်သမား အခွင့်အရေးကာကွယ်ရေးနှင့် အကျိုးစီးပွားမြှင့်တင်ရေး ဦးဆောင်အဖွဲ့က ထုတ်ပြန်ကြေညာခဲ့သည့် အခြေခံရည်ညွှန်းစပါးဈေးနှုန်းကိစ္စရပ်၊ အသင်းချုပ်၏ ဒေသကော်မတီများ ဖွဲ့စည်းရေးကိစ္စရပ်၊ ပြည်ပဈေးကွက်မြှင့်တင်ရေးခရီးစဉ်များ သွားရောက်ရေးကိစ္စ၊ စပါးပြည်ပတင်ပို့ခြင်းဆိုင်ရာ ကိစ္စရပ်များနှင့် မြန်မာနိုင်ငံဆန်စပါးအသင်းချုပ် (MRF) ၊ မြန်မာနိုင်ငံ လယ်ယာစီးပွားရေးအများပိုင် ကုမ္ပဏီလီမိတက် (MAPCO)နှင့် (CITIC) တို့အကြား Cooperation Agreement ရေးထိုးရေးအား မှတ်တမ်းတင်ရန် စသည့် ကိစ္စရပ်များအပေါ်  ဆွေးနွေးညှိနှိုင်းခဲ့ကြကြောင်းသိရသည်။

   အခြေခံရည်ညွှန်းစပါးဈေးနှုန်း ထုတ်ပြန်ကြေညာခြင်းသည် တောင်သူလယ်သမား အခွင့်အရေးကာကွယ်ရေးနှင့် အကျိုးစီးပွားမြှင့်တင်ရေးဦးဆောင်အဖွဲ့ က ထုတ်ပြန်ခြင်းဖြစ်သဖြင့် ဆန်စက်လုပ်ငန်းရှင်များအပါအဝင် နိုင်ငံအတွင်းရှိ စပါးဝယ်ယူသူအားလုံးသည် အဆိုပါထုတ်ပြန်ချက်တွင်ပါဝင်သည့် အခြေခံရည်ညွန်းစပါးစျေးနှုန်း/ စံချိန်စံညွှန်းများအတိုင်း တိကျစွာ လိုက်နာဆောင်ရွက်ပြီး ဝယ်ယူခြင်းပြုလုပ်ပေးရေးရန် ကိစ္စရပ်များကို ဆွေးနွေးခဲ့ကြသည်။

   ထို့ပြင် မြန်မာနိုင်ငံဆန်စပါးအသင်းချုပ်၏ ဒေသကော်မတီများဖွဲ့စည်းရေးကို ဧရာ၀တီတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီးတို့တွင် လာမည့် နို၀င်ဘာလ၊ ဒီဇင်ဘာလများအတွင်း ပြီးပြတ်အောင်ဆောင်ရွက်ရန်နှင့် စစ်ကိုင်းတိုင်းဒေသကြီးနှင့် ရခိုင်ပြည်နယ်တို့တွင် ဆက်လက်ဆောင်ရွက်နိုင်ရေးကို ဦးစားပေး စီစဉ်သွားရန် ဆုံးဖြတ်ခဲ့ကြောင်း သိရသည်။ 

အေးအေးမြင့်(ABM)

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်