ကွမ်းဈေးတက်လာသော်လည်း ယခင်နှစ်များကလောက် ဈေးကွက်အားရမှုမရှိ

ကွမ်းဈေးတက်လာသော်လည်း ယခင်နှစ်များကလောက် ဈေးကွက်အားရမှုမရှိကြောင်း မြန်မာပြည်အောက်ပိုင်း ကွမ်းဈေးကွက်မှ သိရသည်။

ကိုဗစ်နှိပ်စက်တာ အောက်ခြေကလူတွေနဲ့ စိုက်ပျိုးရေးသမားတွေကို အဓိကထိနေတယ်။ ကွမ်းစျေးက မှန်းလို့ကိုမရတော့ဘူး။ သီရိမင်္ဂလာဈေးမှာ အရင် ကိုဗစ်မဖြစ်ခင်တုန်းက စျေးကွက်က မနက်စျေးနဲ့ညစျေးဆိုပြီး နှစ်ခုခွဲထားတာ။ အခုက ညစျေးမရှိတော့ဘူး။ မနက်စျေးမှာပဲ နယ်စုံကကွမ်းတွေကို စုရောင်းနေရတယ်။ ဝယ်လက်က ပစ္စည်းများတော့ ကွမ်းကိုရွေးယူတာပေါ့။

ဟု ဧရာဝတီတိုင်း၊ ကျောင်းကုန်းမြို့နယ်၊ မှော်သေးကျေးရွာမှ ကွမ်းစိုက်တောင်သူ ကိုထွန်းထွန်းက ပြောသည်။

ယခင်က သီရိမင်္ဂလာဈေးသို့ ဧရာဝတီတိုင်း ညောင်တုန်း၊ ပန်းတနော်၊ ကျောင်းကုန်းဒေသများမှ ရောက်ရှိလာသည့်ကွမ်းများကို ည(၈) နာရီဝန်းကျင်မှ မနက်(၄)နာရီခန့်အထိ ညဘက်စျေး၌ ရောင်းချပြီး၊ ရန်ကုန်တိုင်း ကော့မှူး၊ ကွမ်းခြံကုန်း၊ မြစ်တန်းသင်္ဘောဖြင့် ရောက်ရှိလာသည့် ကွမ်းများကို မနက်စျေး (၈)နာရီဝန်းကျင်မှစ၍ မွန့်တည်ပြီးချိန်အထိ ရောင်းချခဲ့ခြင်း ဖြစ်သည်။

အရင်က ကွမ်းမျိုးချင်းအတူတူကို တစ်နေရာထဲ နှစ်ချိန်ခွဲရောင်းတော့ ဝယ်လက်က လုဝယ်ရတဲ့သဘောမို့ စျေးခေါ်လို့ ကောင်းခဲ့တာပေါ့။ အခုကျတော့ ဒိုင်တွေကလည်း ကျလာသမျှ ခြံသမားကွမ်းကို မြန်မြန်ကုန်ရေး ဦးစားပေးရောင်းနေရတော့ သိပ်အိုက်တင်မခံရဲကြဖူးလေ။ အိုက်တင်ခံလိုက်ရင်လည်း နောက်တစ်နေ့မှ ကွမ်းကပြန်ရောင်းရမှာနဲ့ အပင်က ခူးထားတာနဲ့ဆို သုံးရက်ဖြစ်သွားမှာနဲ့ဆိုတော့လည်း အတင်းထိုးရောင်းရတဲ့ အနေအထားတွေ ဖြစ်နေတယ်။ အဓိကကတော့ ကိုဗစ်နှိပ်စက်ထားတာပဲ။

ဟု ကိုထွန်းထွန်းက ဆက်လက်ပြောသည်။

လက်ရှိတွင် မိုးရာသီဖြစ်သဖြင့် ကွမ်းခြံတချို့ ရေနစ်မြှုပ်မှုများ ကြုံတွေ့ရခြင်းကြောင့် ကွမ်းဈေးကွက်မှာ အတက်ဘက်သို့ဦးတည်နေသည်။

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။