ပဲပုပ်မျိုးစေ့အမျိုးမျိုးရဲ့ အရည်အသွေးကို ဓါတ်ခွဲစစ်ဆေးနိုင်တော့မည်

24/07/2019 19:30 PM တွင် အစိမ်းရောင်လမ်း အစိမ်းရောင်လမ်း မှ ရေးသား ပြီး Greenovator Greenovator မှ ပေးပို့ထားပါသည်။

ယခုနှစ်အတွင်း ပဲပုပ်မျိုးစေ့အမျိုးမျိုးရဲ့ အရည်အသွေးကို ဓါတ်ခွဲစစ်ဆေးနိုင်တော့မှာဖြစ်ကြောင်း စိုက်ပျိုးရေး သုတေသနဦးစီးဌာနမှသိရပါတယ်။  

ပဲပုပ်မျိုးစေ့ရဲ့အရည်အသွေးကို သိရှိစေနိုင်ဖို့အတွက် ပဲပုပ်မျိုးစေ့များကို Mininfra Smart Whole Grain & Flour Analyser စက်ဖြင့် သုတေသနပြုလုပ်သွားမှာဖြစ်တယ်လို့ စိုက်ပျိုးရေးသုတေသနဦးစီးဌာနမှ ဒုတိယညွှန်ကြားရေးမှူးချုပ် ဦးသန့်လွင်ဦး ကပြောပါတယ်။

“ အဓိကက ပဲပုပ်မျိုးစေ့များရဲ့ အရည်အသွေးတွေကို ဓါတ်ခွဲစစ်ဆေးနိုင်တော့မှာပါ။ အခုဌာနအနေနဲ့ အရင်သုတေသနပြုလုပ်ဆောင်ရွက်မယ်။ပြီးရင်တော့ တောင်သူတွေလည်း ပဲပုပ်မျိုးစေ့အရည်အသွေး သိချင်ရင်လာရောက်စစ်ဆေးနိုင်ပါတယ်”

Mininfra SmarT Whole Grain & Flour Analyser စက်မှာ ပဲပုပ်မျိုးစေ့ရဲ့ အစိုဓါတ်၊ ပရိုတင်းဓါတ်၊ ကစီဓါတ်၊ အိုးလီရစ်အက်ဆစ်နဲ့ ဆီပါဝင်မှုနှုန်းတို့ကို တိကျစွာသိရှိစေနိုင်မှာဖြစ်ကြောင်း အဆိုပါဌာနမှသိရပါတယ်။

အဆိုပါပဲပုပ်မျိုးစေ့ စစ်ဆေးခြင်း Mininfra SmarT Whole Grain & Flour Analyser စက်ကို ကိုရီးယား အပြည်ပြည်ဆိုင်ရာပူးပေါင်းဆောင်ရွက်ရေးအဖွဲ့ (KOPIA) မှ စိုက်ပျိုးရေးသုတေသနဦးစီးဌာနကို လှူဒါန်းခဲ့တာဖြစ်ကြောင်း အဆိုပါဌာနမှ သိရပါတယ်။ 

တိုးတိုးခိုင်(ABM)