ဟင်းခတ်အမွှေးအကြိုင် ကုဆိုင်

အင်္ဂလိပ်အမည် - Chive

ရုက္ခဗေဒအမည် - Allium schoenoprasum

ကုဆိုင်ဟာ ကြက်သွန်အမျိုးအနွယ်ထဲမှာ ပါဝင်ပြီး နှစ်ရှည်ပင်အမျိုးအစား ဖြစ်ပါတယ်။

အကြော်အလှော်တွေနဲ့ ပတ်သက်တဲ့ အစားအစာတွေထဲမှာ ကုဆိုင်ကို ထည့်သွင်းအသုံးပြုကြလေ့ရှိပါတယ်။ အများသိတဲ့ထဲကဆိုရင်တော့ ကိုရီးယားဂင်မ်ချီတွေလုပ်ရင် ထည့်သွင်းအသုံးပြုရတဲ့ထဲမှာ ပါပါတယ်..။ ရနံ့ သင်းပြီး စားကောင်းတဲ့အတွက် စားသုံးတဲ့သူတွေလည်း နှစ်သက်ကြတဲ့ ဟင်းခတ်အမွှေးအကြိုင် အပင်တစ်မျိုး ဖြစ်ပါတယ်။

ကုဆိုင်ရဲ့ မူရင်းဒေသတွေကတော့ ဥရောပ၊ အာရှနဲ့ မြောက်အမေရိကဒေသတွေပဲ ဖြစ်ပါတယ်။ အရသာအားဖြင့် အနည်းငယ်စပ်တဲ့ အနေအထားရှိပြီး အထူးသဖြင့် ဥရောပနိုင်ငံတွေရဲ့ အစားအစာတွေမှာ ထည့်သွင်း စားသုံးလေ့ ရှိကြပါတယ်။

ကုဆိုင်ကို ဟင်းခတ်အမွှေးအကြိုင်အနေနဲ့ စားရုံသာမက ဥယျာဉ်ခြံမြေတွေမှာဆိုရင်  ပိုးမွှားကာကွယ် နှိမ်နင်းဖို့အတွက်လည်း အသုံးပြုကြလေ့ရှိပါတယ်။ ကုဆိုင်ဟာ အပင်အမြင့်အားဖြင့် ၁ ပေကနေ ၁.၆ ပေ လောက်အထိ ရှည်လျားနိုင်ပါတယ်။ ဘေးဘက်ကိုတော့ ၁ ပေကနေ ၂ ပေလောက်အထိ ဖြန့်ကျက်ကြီးထွား နိုင်ပါတယ်။ ကျောက်သားပေါများတဲ့ စားကျက်မြက်ခင်းတွေနဲ့ စိုစွတ်တဲ့ မြက်ခင်းပြင်တွေမှာ ပေါက်ရောက်လေ့ ရှိပါတယ်။

မြေဆီလွှာအနေနဲ့ဆိုရင် သမမျှတပြီး အက်စစ်ဓာတ်အနည်းငယ်ဆန်တဲ့ အနေအထားကို ကြိုက်နှစ်သက်ပါတယ်။ သူ့ရဲ့ ပန်းပွင့်အရောင်တွေကတော့ ပန်းရောင်၊ ခရမ်းရောင်၊ အနီရောင်နဲ့ အဖြူရောင်ဆိုပြီး ရှိကာ နွေရာသီမှာ ပန်းပွင့်လေ့ရှိပါတယ်။ ကုဆိုင်ပင်ရဲ့ နောက်ထပ်ထူးခြားတဲ့အချက်ကတော့ လိပ်ပြာနဲ့ ငှက်တွေကို ဆွဲဆောင်နိုင် တာပဲ ဖြစ်ပါတယ်။

မျိုးစေ့ကနေစိုက်ပျိုးမယ်ဆိုရင် အညှောင်ပေါက်ဖို့ ရက်သတ္တပတ်အနည်းအထိ အချိန်ပေးရတတ်ပါတယ်။ မျိုးစေ့အညှောက်ပေါက်ပြီး အပင် ကြီးထွားရှင်သန်နိုင်ဖို့အတွက် မြေဆီလွှာရဲ့ အသင့်တော်ဆုံး အပူချိန်ကတော့ ၁၅ ဒီဂရီစင်တီဂရိတ် ကနေ ၂၁ ဒီဂရီစင်တီဂရိတ်အတွင်း ဖြစ်ပါတယ်။ ကုဆိုင်ပင်ဟာ နေရောင်ခြည်ကောင်းစွာ ရရှိတဲ့နေရာကို ကြိုက်နှစ်သက်ပါတယ်။ အစိုဓာတ်ကောင်းကောင်းရှိပြီး မြေဆီကြွယ်ဝကာ ရေစိမ့်ဝင်မှုကောင်းတဲ့ မြေကိုနှစ်သက်ပါတယ်။

စိုက်ပျိုးမယ့်မြေနေရာ ရွေးချယ်ထားပြီးပြီဆိုရင် သဘာဝမြေဆွေးတွေကို မြေအနက် ၄ လက်မကနေ ၆ လက်မလောက်အထိ  နှံ့စပ်သွားအောင် ရောပေးထားသင့်ပါတယ်။ မျိုးစေ့ကနေ စိုက်ပျိုးမယ်ဆိုရင် ၂ လက်မ အကွာအဝေးခြားကာ မြေအနက်အားဖြင့် ၁ လက်မရဲ့ ၄ ပုံ ၁ ပုံ အနက်လောက်မှာထားပြီး စိုက်သင့်ပါတယ်။ ပြီးရင်တော့ အပေါ်ယံကနေ မြေသားခပ်ပါးပါးပြန်ဖုံးပေးထားရပါမယ်။ ကုဆိုင်ဟာ ရေငတ်ဒဏ်ကို ကောင်းကောင်းခံနိုင်ရည်ရှိပြီး ပြုစုစောင့်ရှောက်ရမှုလည်းနည်းပါတယ်။ သို့ပေမယ့် အထွက်နှုန်းကောင်းကောင်း ရဖို့အတွက်ဆိုရင်တော့ စိုက်ပျိုးရာသီတစ်လျှောက်လုံး ရေကို တသမတ်တည်းလောင်းပေးဖို့ လိုအပ်ပါတယ်။

 ရေလောင်းတဲ့အခါမှာလည်း မြေဆီလွှာကို ကောင်းစွာစိုစွတ်တဲ့အထိ လောင်းပေးသင့်ပါတယ်။ အပင်ငယ်စဥ်မှာတော့ ပေါင်းမြက်ကင်းဝေးစေဖို့ အပင်ခြေရင်းမှာ မြေဖုံးပေးထားတာမျိုးတွေ ပြုလုပ်သင့်ပါတယ်။ မိမိစိုက်ပျိုးတဲ့မြေနေရာဟာ အာဟာရဓာတ်မကြွယ်ဝဘူးဆိုရင် နွေနှောင်းပိုင်း (သို့မဟုတ်) နွေရာသီအစောပိုင်းမှာ နိုက်ထရိုဂျင်ဓာတ် ကြွယ်ဝတဲ့ မြေဩဇာတွေကျွေးပေးသင့်ပါတယ်။

ကုဆိုင်ပင်တွေကို ရွှေ့ပြောင်းစိုက်ပြီး ရက် ၃၀ ခန့်မှာ အရွက်တွေကို ခူးဆွတ်ရိတ်သိမ်းနိုင်ပါတယ်။ အစေ့တိုက်ရိုက် စိုက်ပျိုးထားတယ်ဆိုရင်တော့ ချစိုက်ပြီး ရက်ပေါင်း ၆၀ ခန့်အကြာမှာ ရိတ်သိမ်းနိုင်ပါတယ်။ ရိတ်တဲ့အခါမှာ မြေပြင်ကနေ ၁ လက်မ (သို့မဟုတ်) ၂ လက်မ ခန့်ခွာပြီးရိတ်သိမ်းနိုင်ပါတယ်။ စိုက်ပျိုးတဲ့ ပထမနှစ်အတွင်းမှာဆိုရင် ၃ ကြိမ်မှ ၄ ကြိမ်အထိ ရိတ်နိုင်ပါတယ်။

ကုဆိုင်ပင်ရဲ့ပန်းပွင့်တွေကိုလည်း စားသုံးနိုင်ပြီး အရသာအားဖြင့်လည်း ကောင်းပါတယ်။ စီးပွားဖြစ်စိုက်ပျိုးပြီး သိုလှောင်မယ်ဆိုရင်တော့ လေအလုံပိတ်ထားပြီး အေးခဲနေတဲ့ အိတ်တွေ၊ အခန်းတွေထဲမှာ သိုလှောင်တာက ပိုပြီး သင့်တော်ပါတယ်။ ဘာလို့လဲဆိုတော့ ကုဆိုင်ကို အခြောက်ခံထားပြီးမှ သိုလှောင်မယ်ဆိုရင် သူ့ရဲ့ အနံ့အရသာ တွေကို လျော့နည်းသွားစေနိုင်တာကြောင့် ဖြစ်ပါတယ်။

ဇင်ထူးနိုင်

References

-        http://www.almanac.com/

-        http://www.picturethisai.com/

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်