ထုံးမှုန့်လား..ကျောက်မှုန့်လားနဲ့ တစ်ပတ်အတွင်းစိတ်ဝင်စားစရာအမေးအဖြေများ

မင်္ဂလာပါရှင့်

ဒီတစ်ပတ်မေးခွန်းတွေကလည်း စိတ်ဝင်စားစရာတွေအပြည့်နဲ့ပါ။ အမြဲတမ်းလည်း သတိပေးနေကြ၊ ရောတဲ့သူတွေကလည်း ရောနေကြပေါ့။

မေးခွန်းနံပါတ် (၁) မှာဆို ထုံးနဲ့ ကျောက်မှုန့် (Gypsum) ပြဿနာပေါ့လေ။ ထုံးနဲ့ကျောက်မှုန့်က မြေပြုပြင်ရေးပစ္စည်းအနေနဲ့ မြေခံအဖြစ်သုံးကြတာ။ မြေတိုင်းသုံးလို့မရပါဘူးနော်။ သုံးသင့်တဲ့မြေ မသုံးသင့်မြေဆိုတာရှိပါသေးတယ်။ ဘယ်လိုသိနိုင်မလဲဆိုရင် pH အရင်တိုင်းရမှာပါ။ pH အမှတ် ၀ ကနေ ၁၄ အထိရှိပါတယ်။

ပီအိပ်ချ် ၅.၀ အောက်ဆိုရင်မြေချဥ်လို့မှတ်ပြီး ပီအိပ်ချ် ၇.၅ အထက်ရှိနေရင် မြေငန်လို့သတ်မှတ်ပါတယ်။ ပီအိပ်ချ် ၅.၅ - ၇.၅ အကြားရှိရင်တော့ ကောင်းတဲ့အနေအထားမှာ ရှိနေတဲ့ မြေပါ။ ဒီတော့ ကျောက်မှုန့်ဆိုတာ မြေငန်ရင်ထည့်ရတဲ့ မြေပြုပြင်ပစ္စည်းပါလို့။

၁။ မေး ( Soe Min Htun) - မိုးတွင်းစပါးကို မြေခံထည့်ချင်လို့ ကျောက်မှုန့်နဲထုံး ဘယ်ဟာ ပိုကောင်းမလဲခဗျာ... မြေခံကို ဘယ်ချိန်လောက်ထည့်ရမလဲ။

ဖြေ ( ဒို့ဦးလေး) - ကျောက်မှုန့် ထည့်ရမလား၊ ထုံးထည့်သင့်သလား..ဆိုတာ.. မိတ်ဆွေ လယ်မြေရဲ့ ပီအိပ်ချ် အနည်းအများပေါ်မူတည်တာပါ။ တိုင်းကြည့်လို့ ပီအိပ်ချ် ၅.၅ အောက်ရောက်နေရင် ထုံးထည့်သင့်ပြီး ၅.၅ ကျော်ရင်တော့ ဒိုလိုမိုက်အသုံးပြုပါ။

၂။ မေး (ဇာကြီး) - ပုရွက်ဆိတ်တက်လို့ ဂေါ်ဇီလာခြင်ဆေးတော့နည်းနည်း ဖြန်းမိတယ် အရွက်ကနည်းနည်းခြောက်ပြီး အသီးအပွင့်သိပ်မတင်ဘူး။

ကဲ...လာပါပြီဗျာ...လူစားမဲ့အပင်ကို ခြင်ဆေးတွေဖြန်းထားလို့။ ဒါတွေကိုသာ စားမိရင် မတွေးရဲစရာပါ။ ချက်ချင်းလည်း အာနိသင်ပြသွားနိုင်သလို နှစ်ပေါင်းများစွာ အသံတိတ်လူသတ်သမားအဖြစ်နဲ့လည်း ရှိနေနိုင်တယ်။ ဒါ့ကြောင့်လည်း တချို့ဆေးဘူးခွံတွေမှာဆိုရင် စားစရာမဟုတ်တို့၊ ကလေးတွေလက်လှမ်းမမီနိုင်တဲ့ နေရာထားထားပါလို့ ပြောကြတာပေါ့။

ဆရာကြီးတစ်ယောက်ပြောတာကိုတောင်သွားသတိရမိတယ်။ ဆရာကတော့ ဈေးထဲမှာ အရွက်ဝယ်ရင် အပေါက်များတဲ့ အစီးကိုပဲ ရွေးဝယ်တယ်တဲ့။ ပိုးသတ်ဆေးမမိထားလို့ ပိုးတွေစိတ်ကြိုက်စားသောက်ထားတဲ့ အရွက်ကို ပြောချင်တာ။ ဈေးသည်ကတော့ ပြန်ပြောလိုက်ပါရဲ့...အဲ့တာ ဆေးကို မနိုင်တော့လို့...ရုပ်ပျက်ဆင်းပျက် ဖြစ်နေတာ ဆရာရေတဲ့။ ဒီလိုတွေလည်း ဖြစ်နေဦးမယ်နော် အမျိုးတို့။

ဖြေ (ဒို့ဦးလေး) - ပုရွက်ဆိတ်တက်တာ၊ ပျရှိလို့ပါ။ ခြင်ဆေးတွေ မဖျန်းရဘူးနော်။ ဖျန်းချင်ရင်..ဆေးရွက်ကြီး ရေစိမ်ဖျန်းပါ။

(ဦးသက်လွင်) - ခြင်ဆေးသည် ပိုးသတ်ဆေးမဟုတ်၍ ဆိုးကျိုးကိုသာ ဖြစ်စေမှာပါ

၃။ မေး (သူရိန်) - ဘားအံမှာနွေရာသီ မုန်ညင်း ဆလပ်စိုက်လို့ဖြစ်လား ခဗျ။

ဖြေ (ဆုမြတ်နိုး) - မုန်ညင်းနဲ့ ဆလပ်ကအေးမြတဲ့ဆောင်းရာသီမှာပဲစိုက်ပျိုးဖြစ်ထွန်းပါတယ်။

ဒီမေးခွန်းလေးနဲ့ ဆက်စပ်ပြီး နွေရာသီမှာ စိုက်ပျိုးနိုင်တဲ့ ဟင်းသီးဟင်းရွက်အပင်လေးတွေကို ဖော်ပြပေးလိုက်ပါတယ်။ ရုံးပတီ၊ ရွှေဖရုံ၊ ဘူး၊ သခွား၊ ဟင်းနုနွယ်၊ ခရမ်းချဉ်၊ ခရမ်း၊ ငရုတ်၊ ကြက်ဟင်းခါး၊ ခဝဲ တွေစိုက်နိုင်ပါတယ်။

စိုက်နည်းတွေကိုတော့ ဆောင်းပါးများကဏ္ဍက စိုက်ပျိုးနည်းမှာ ဝင်ရောက်ဖတ်ရှုနိုင်ပါတယ်ရှင့်။

၄။ မေး (အောင်ကိုထွန်း) - အပင်စိုက်ထားတာ စိပ်သွားလားမသိဘူးဗျ။ ရွက်ဖြန်းအားဆေးဘယ်ဟာကိုသုံးရင်ကောင်းမလဲ။ အပင်ကို ဘယ်လိုပြုစုရမလဲဗျ။

ဖြေ (ဒို့ဦးလေး) - နည်းနည်းစိပ်တယ်။ အီးအမ်နဲ့ ငါးအမိုင်နိုကို နည်းနည်းချင်းနဲ့ ၇ -၁၀ ရက်ခြားဖြန်းပါ။

(ဦးသက်လွင်) - စိပ်လွန်းတယ်လို့ဆိုရမှာဖြစ်ပြီး ထိုအတိုင်းဆက်ထားလို့လဲ အဆင်မပြေနိုင်သဖြင့် လိုအပ်သည်ထက် ပိုနေသောအပင်များအား ပြန်နှုတ်ပြီး ဘောင်အသစ်တွင် စိုက်ပါလို့ အကြံပြုအပ်ပါတယ် ထိုအတိုင်းဆက်ထားပါက ကောင်းကျိုးမရှိ၍ဖြစ်ပါတယ်။

ဒီမေးခွန်းလေးနဲ့ ဆက်စပ်ပြီး ပင်ခြားတန်းကြားက ဘာကြောင့် အရေးကြီးဆိုတာကို ဆရာထွန်းဝင်းကျော်ရဲ့ ဆောင်းပါးလေးနဲ့ ဖော်ပြပေးလိုက်ပါတယ်ရှင့်။

ဆောင်းပါးလင့်ခ်>>> https://bit.ly/3M5aHQs

နောက်ဆုံးမေးခွန်းလေးကတော့ ခရမ်းချဉ်မှာ အဖြစ်များတဲ့ ဘက်တီးရီးယားရောဂါ ကာကွယ်နှိမ်နင်းကို ဆရာဒို့ဦးလေးရဲ့ ဖြေကြားချက်နဲ့အတူ အဆုံးသတ်လိုက်ပါတယ်ရှင့်။

၅။ မေး (အောင်မျိုး) - ခရမ်းချဥ် မှာအဖြစ်များတဲ့ဘတ်တီးရီးယားရောဂါများကျရောက်ပုံလေးအကြောင်းနားလည်အောင်ရှင်းပြပေးပါလားကာကွယ်နိုင်အောင်လို့ပါဆရာတို့။

ဖြေ (ဒို့ဦးလေး)- ခရမ်းချဥ်မှာ ဘက်တီးရီး စိမ်းညှိုး ရောဂါနဲ့ ဘက်တီးရီးယားရွက်ပြောက်/အစက်ပြောက်ရောဂါ အဖြစ်များပါတယ်။ ဘက်တီးရီးယားရောဂါသည်၊ နေဒဏ်/လေဒဏ်/ပိုး/ရောဂါ/ထိခိုက်ရှနာ စတဲ့ ဒဏ်တွေကတဆင့် ဝင်ရောက်တာဖြစ်ပါတယ်။ (ကိုယ်တိုင်ထိုးဖောက်ဝင်ရောက်နိုင်စွမ်းမရှိပါ) ဒါကြောင့် ကာကွယ်လိုပါက..ဒဏ်ရာအနာတရမဖြစ်အောင်ထိန်းသိမ်းခြင်း။ ခံနိုင်ရည်ရှိအောင် ရေနဲ့အစာကို မျှတစွာပေးခြင်း။ ကော့ပါး၊ကာဆူကာမိုင်စင် ကြိုတင်ကာကွယ်ခြင်း လုပ်ဆောင်ရပါတယ်။

ဆောင်ပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...