တောင်သူကြီးများ အွန်လိုင်းမှဈေးဝယ်ခြင်း

“ခေတ်မီတောင်သူဖြစ်ဖို့ ဒစ်ဂျစ်တယ်နည်းပညာလေ့လာစို့” အစီစဥ်လေးကနေ ကြိုဆိုလိုက်ပါတယ်ခင်ဗျ။

ယခင်တစ်ပတ်ကတော့ ဖုန်းဆော့ဝဲလ်တွေကိုဘာနဲ့ဒေါင်းလုဒ်ဆွဲကြမလဲ မျှဝေပေးခဲ့တာ မှတ်မိမယ်ထင်ပါတယ် ခင်ဗျ။ ယခုတစ်ပတ်မှာတော့ အွန်လိုင်းကနေ ဈေးဝယ်ခြင်း ဆိုတဲ့ အကြောင်းအရာလေးကို ပြန်လည်မျှဝေပေးသွားမှာဖြစ်ပါတယ် ခင်ဗျ။

တောင်သူ ဦးလေး ဒေါ်လေးတို့ ယနေ့ခေတ်မှာ အွန်လိုင်း အင်တာနက်ပေါ်ကနေ ဈေးဝယ်ကြတယ်ဆိုတာ ကြားဖူးကြမယ် ထင်ပါတယ်ခင်ဗျ။ ပိုပြီးနားလည်အောင်ရှင်းပြရရင် ရောင်းတဲ့သူက အင်တာနက် ဆက်သွယ်မှု ရရှိနိုင်တဲ့ ဆက်သွယ်ရေးကိရိယာ တစ်ခုခုကိုသုံးစွဲပြီး သူ့ရဲ့ကုန်ပစ္စည်းကို ဈေးကွက်ပေါ်တင်ပြီး ရောင်းချတယ်။ ဝယ်တဲ့သူကလည်း အင်တာနက်ဆက်သွယ်မှု ရရှိနိုင်တဲ့ဆက်သွယ်ရေးကိရိယာတစ်ခုခုကို သုံးစွဲပြီး ဝယ်ယူတယ်။ ရောင်းသူနဲ့ဝယ်သူ နှစ်ဦးစလုံးဟာ ပြင်ပမှာ ထိတွေ့၊ တွေ့မြင်စရာမလိုပဲ အင်တာနက်ကွန်ရက်-အွန်လိုင်းပေါ်မှာပဲ တွေ့ဆုံကြပြီး အရောင်းအဝယ်ပြုကြတဲ့ ကုန်စည်ရောင်းဝယ်မှု စနစ်ပဲ ဖြစ်ပါတယ်။

လက်ရှိ မြန်မာနိုင်ငံမှာ အင်တာနက်သုံးပြီး ဝက်ဘ်ဆိုက်တွေ၊ ဖုန်းဆော့ဝဲလ် တွေကနေတစ်ဆင့် မိမိလိုချင်တာတွေ ဝယ်ယူနိုင်တဲ့ အနေအထားရောက်ရှိနေပါပြီ။ ယခုလိုမျိုး အွန်လိုင်းကနေ ဈေးဝယ်တယ်ဆိုတာ မြို့ပေါ်မှာနေထိုင်တဲ့သူတွေအတွက်သာ မဟုတ်တော့ပါဘူးခင်ဗျ။ ကျေးလက်ဒေသမှာ နေထိုင်ကြတဲ့ တောင်သူ ဦးလေး ဒေါ်လေးတို့လည်း မိမိတို့ စိုက်ခင်းအတွက် လိုအပ်တဲ့ သွင်းအားစုတွေ အွန်လိုင်းမှာရှာဖွေပြီး စမတ်ကျကျ ဈေးဝယ်လို့ရနေပါပြီနော်။

ဥပမာ အနေနဲ့ ပြောရရင် အစိမ်းရောင်လမ်း ဖုန်းဆော့ဝဲလ်ထဲမှာ ပါဝင်တဲ့ ဈေးတန်းကြီး (Market Place) မှာဆိုရင် စိုက်ပျိုးရေး သွင်းအားစုတွေ လာရောက်ရောင်းချနေတဲ့ ဆိုင်တွေ၊ ကုမ္ပဏီတွေ ရှိပါတယ် ခင်ဗျ။ အဲ့ဒီဆိုင်တွေထဲကို တောင်သူ ဦးလေး ဒေါ်လေးတို့ ဝင်ကြည့်လိုက်မယ်ဆိုရင် ဆိုင်တွေကနေ ရောင်းချပေးနေတဲ့ သွင်းအားစု ပစ္စည်းတွေကို တွေ့ရမှာ ဖြစ်ပါတယ် ခင်ဗျ။ မိမိကြိုက်နှစ်သက်တဲ့ သွင်းအားစု တစ်ခုခုတွေ့ပြီဆိုရင် ပစ္စည်းကိုရွေးချယ်ကာ ငွေပေးချေပြီး မိမိနေထိုင်ရာ ဒေသအရောက် မှာယူနိုင်မှာပဲ ဖြစ်ပါတယ်။ 

အခုလို တောင်သူ ဦးလေး ဒေါ်လေးတို့ အွန်လိုင်းကနေ ဝယ်ယူခြင်အားဖြင့်

၁။ မိမိစိုက်ခင်းထဲမှာ နေပြီး စိုက်ပျိုးရေးဆိုင်ရာ သွင်းအားစုများကို ဖုန်းထဲမှ အလွယ်တကူ မှာယူနိုင်ခြင်း

၂။ ဆိုင်အထိ သွားဝယ်စရာမလိုသောကြောင့် အချိန်ကုန်၊ လူပင်ပန်း သက်သာခြင်း

၃။ မိမိ ဝယ်ယူသုံးစွဲခဲ့သော သွင်းအားစုများကို အလွယ်တကူ မှတ်သားထားနိုင်ခြင်း

၄။ သွားလာ သယ်ယူ ကုန်ကျစရိတ်များ သက်သာခြင်း စတဲ့ အကျိုးကျေးဇူးတွေလည်း ရှိနေပါတယ် ခင်ဗျ။

အွန်လိုင်းကနေ ဈေးဝယ် မှာယူကြမယ့် ခေတ်မီတောင်သူကြီးတွေ ဖြစ်ကြပါစေ ခင်ဗျ။

ယခင်တစ်ပတ်က ဖုန်းဆော့ဝဲလ်တွေကိုဘာနဲ့ဒေါင်းလုဒ်ဆွဲကြမလဲ အကြောင်းဖော်ပြထားတဲ့ ဆောင်းပါးလေးကို ပြန်လည်ဖတ်ရှုချင်ရင်တော့ ဖော်ပြပါလင့်ကနေတစ်ဆင့် ဝင်ရောက်ဖတ်ရှုနိုင်ပါတယ် ခင်ဗျ။

ဖုန်းဆော့ဝဲလ်တွေကို ဘာနဲ့ဒေါင်းလုဒ်ဆွဲကြမလဲ 

စာတန်းလေးကိုနှိပ်ပြီးလေ့လာလို့ရပါတယ်။

(ဆောင်းပါးများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)