ဆည်ရေမရ၊ မိုးမရွာသဖြင့် ဝက်လက်နယ်တောင်သူများအခက်ကြုံနေ

    သဖန်းဆိပ်ဆည်မှ ဆည်ရေကို အလုံအလောက်မရှိသည့်အပြင် မိုးရွာသွန်းမှုလည်းမရှိသဖြင့် စစ်ကိုင်းတိုင်း၊ ဝက်လက်မြို့နယ်အတွင်းရှိ တောင်သူများ အခက်ကြုံနေရကြောင်း သိရသည်။

    မိုးစပါးစတင်စိုက်ပျိုးပြီးနောက်ပိုင်း မိုးရွာသွန်းမှုမရှိသည့်အပြင်၊ ပုံမှန်ရရှိနေကြ ဆည်ရေကိုပါ အချိန်မှန်မရရှိသဖြင့် အခက်အခဲများနှင့် ကြုံတွေ့ခံစားနေရခြင်းဖြစ်သည်။ 

ဆည်ရေပြတ်နေတော့ စပါးခင်းထဲမှာ ရေပြတ်ပြီး၊ ပေါင်းတွေလိုက်လာတယ်။ ပေါင်းနှုတ်ခတွေ ထပ်ကုန်ပါတယ်။ အခုက စပါးစိုက်ထားကြတဲ့အချိန်ပါ။ ရွှေဘိုဘေးကြားတို့ ဧရာပဒေသာတို့ စိုက်ကြတာပါ။ မိုးစပါးပေါ့။ တချို့လည်း အခြောက်ခင်းတွေအတွက် နှမ်းကြဲနေတာလည်း ရှိပါတယ်။ ခါတိုင်းဆို ဆည်ရေက အမြဲတမ်းလွှတ်နေတာ။ အခုကျတော့ ဘယ်လိုဖြစ်မှန်းကိုမသိဘူး။ ဆည်ထဲမှာလည်း ရေရှိသေးတယ်တော့ပြောတယ်။ ဆည်မြောင်းကိုမေးတော့လည်း သုံးရက်တစ်ခါ အလှည့်နဲ့ပေးတယ်ပြောတယ်။ အဲ့ဒါကလည်း ရေလာတဲ့အခါ စက်နဲ့စုပ်တင်ရတာမို့ ရေတင်ခပိုက်ဆံက ထပ်ကုန်သေးတယ်။ မိုးမရွာတာက တစ်လကျော်လာပြီ။ ဒီနှစ်မိုးက တစ်မိုးတည်း ကောင်းကောင်းကျခဲ့တယ်။ နောက်ပိုင်း ဆက်ကိုမရွာတော့ဘူး။

ဟု စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ ရေထွက်ကျေးရွာမှ ဦးလှဝင်းဆွေ က ပြောသည်။

    ယခုကဲ့သို့ ရေပြတ်လပ်မှုများ ကြုံတွေ့နေရသည့်အတွက် စပါးအထွက်နှုန်းနှင့် အရည်အသွေးများကို ထိခိုက်မှုရှိလာနိုင်ကြောင်း တောင်သူများက ဆိုသည်။

ဒီနှစ် စပါးကတော့ အရည်အသွေးရော၊ ထွက်နှုန်းပါ မကောင်းလောက်တော့ဘူး။ စိုက်ပျိုးကုန်ကျစရိတ်တွေနဲ့ ပြန်ရလာမယ့် စပါးရောင်းရငွေနဲ့ တွက်ချေမကိုက်လောက်တော့ တောင်သူတွေ ဒီနှစ် အရှုံးပေါ်နိုင်ပါတယ်။ ဘာဖြစ်လို့လဲဆိုရင် အခုပဲ ပေါင်းလိုက်ခတွေ ကုန်ကျနေပြီ။ ရေတင်တော့လည်း ရေစုပ်တင်ခ စက်ဖိုးတွေ ထပ်ပေးရပြန်တယ်။ ပုံမှန် စပါးစိုက်ပျိုးခအပြင် အပိုတွေထပ်ကုန်လာတာပါ။ ရေကောင်းကောင်းမရလို့ စပါးကလည်း အရည်အသွေးသိပ်မကောင်းလောက်တော့ဘူးလေ။ တချို့အခင်းတွေဆို ရေပေးချိန် ရေမပေးနိုင်လို့ မြေပက်ကြားအက်လာတာတွေတောင် ကြုံနေရပါတယ်။

ဟု ဦးလှဝင်းဆွေက ဆက်လက်ပြောသည်။

    အဆိုပါ သဖန်းဆိပ်ဆည်မှ ဆည်ရေများကို ဝက်လက်မြို့နယ် အနီးတဝိုက်အပါအဝင် စစ်ကိုင်းတိုင်း၊ ရွှေဘို၊ ခင်ဦး၊ ရေဦး အစရှိသည့် ဒေသအသီးသီးသို့ အလှည့်ကျစနစ်ဖြင့် ဖြန့်ဝေပေးနေခြင်းဖြစ်ကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်