အစိမ်းရောင်လမ်း
Greenovator
စိုက်ပျိုးရေးဌာနရဲ့ ခွင့်ပြုချက်မရှိဘဲ ရောင်းချနေတဲ့ စိုက်ပျိုးရေးဆေးဆိုင်တွေကို ပိုးသတ်ဆေးဥပဒေအရ ထိရောက်စွာ အရေးယူမယ်လို့ စိုက်ပျိုးရေးဌာန တာဝန်ရှိသူတဦးက ပြောပါတယ်။
ရောင်းချခွင့်လိုင်စင်မရှိဘဲ စိုက်ပျိုးရေးဆေးပစ္စည်း ရောင်းချနေတဲ့ ဆိုင်တွေကို စိုက်ပျိုးရေးဦးစီးဌာနက လိုက်လံစစ်ဆေးပြီး ၂၀၁၆ ခုနှစ် ဇန်နဝါရီလက ပြည်ထောင်စုလွှတ်တော်မှာ အတည်ပြုပြဋ္ဌာန်းလိုက်တဲ့ ပိုးသတ်ဆေးဥပဒေအရ အရေးယူ ဆောင်ရွက်သွားမယ်လို့ စစ်ကိုင်းတိုင်း၊ စိုက်ပျိုးရေးဦးစီးဌာန သီးနှံကာကွယ်ရေး တာဝန်ခံ ဒေါ်စန်းစန်းမြင့်က ပြောပါတယ်။
“ပိုးသတ်ဆေး အရောင်းဆိုင်တွေကို တရားဝင်မှတ်ပုံတင်ထားတဲ့ ဆေးကို ရောင်းချဖို့ ပညာပေးနေပါတယ်။ တောင်သူတွေကိုလည်း တရားဝင်ဆေးတွေ ဝယ်သုံးဖို့ ပညာပေးတဲ့ လုပ်ငန်းတွေကို စဉ်ဆက်မပြတ်ပေါ့နော်။ အန်တီတို့ တိုင်းတာဝန်ခံတွေရော၊ ခရိုင်တာဝန်ခံတွေရော မြို့နယ်က စိုက်ပျိုးရေးဝန်ထမ်းတွေရော ပူးပေါင်းပြီးတော့ တောင်သူတွေကိုလည်း စဉ်ဆက်မပြတ် ပညာပေးနေပါတယ်။ ဒီ ၂၀၁၆-၂၀၁၇ မှာတော့ သုံးဆိုင်လောက် တရားမဝင်တဲ့ဆေး တရုတ်ဆေး၊ ထိုင်းဆေးပေါ့နော်။ သုံးဆိုင်လောက်တော့ တွေ့ပါတယ်။ လောလောဆယ်အခြေအနေအထိကတော့ အရေးယူတာ မဟုတ်သေးဘဲနဲ့ သူတို့ကို ခံဝန်ကတိထိုးပြီးတော့ ပစ္စည်းကို နမူနာယူပြီး သိမ်းထားတာ ရှိပါတယ်။ ဒါပေမယ့် ကျမတို့ ပိုးသတ်ဆေးဥပဒေကလေ ၂၀၁၆၊ ဇန်နဝါရီ ၂၀ ကတည်းက အသစ်ထုတ်ခဲ့တာ ဖြစ်တဲ့အတွက် အခုချိန်ကနေစပြီး နောင်ဆိုရင်တော့ တပုလင်းတွေ့တွေ့၊ တထုပ်တွေ့တွေ့ အရေးယူဆောင်ရွက်သွားဖို့ ရှိပါတယ်။”
စစ်ကိုင်းတိုင်းဒေသကြီးအတွင်း မြို့နယ်ပေါင်း ၃၃ မြို့နယ်မှာ စိုက်ပျိုးရေးပစ္စည်းအရောင်းဆိုင် ၄၂၅ ဆိုင်ရှိပြီး မုံရွာမြို့မှာတင် ဆိုင်ပေါင်း ၃၀ ကျော် ရှိပါတယ်။
ပိုးသတ်ဆေး အရောင်းဆိုင်တွေအနေနဲ့ ရောင်းချခွင့်လိုင်စင်၊ ပိုးသတ်ဆေး ကိုင်တွယ်ခွင့်လိုင်စင်ရှိမှ ပိုးသတ်ဆေး ရောင်းလို့ရမှာပါ။
တောင်သူတွေရဲ့ သုံးစွဲမှုက ပိုများလာတဲ့အတွက် ပိုးသတ်ဆေး အရောင်းဆိုင်တွေကလည်း တနှစ်ထက်တနှစ် ပိုများလာပါတယ်။
မုံရွာမြို့၊ ဇာနည်ဟိန်း စိုက်ပျိုးရေးသုံးဆေးပစ္စည်း အရောင်းဆိုင်ပိုင်ရှင် ဦးဝင်းသိန်းက “အရောင်းကတော့ ၉ လပိုင်းနောက်ပိုင်းကနေပြီးတော့ ဖေဖော်ဝါရီလကုန်လောက်ထိ အများဆုံး ရောင်းရတာပေါ့နော်။ မိုးရာသီမှာတော့ ၄ လပိုင်းလောက်ကနေစပြီးတော့ စရောင်းရတယ်။ ၈ လပိုင်းကုန်လောက်ထိပေါ့။ အဲဒါ မိုးအရောင်း ခေါ်တာပေါ့နော်။ ၉ လပိုင်း နောက်ပိုင်းကိုတော့ ဆောင်းအရောင်း ခေါ်တာပေါ့။ မိုးအရောင်းထက်စာရင်တော့ ဆောင်းအရောင်းက နှစ်ဆလောက်ပိုတယ်။ အမှန်က တောင်သူက ဆေးသုံးတတ်လာတာလည်း ပါတယ်ပေါ့နော်။ ကုမ္ပဏီတွေကလည်း ဟောပြောပွဲတွေဆင်းပြီး ရွာတွေမှာ လုပ်တာကိုး။ လုပ်တော့ သူတို့က ဆေးကို သုံးတတ်လာတယ်။ နောက်တခါ ဆေးသုံးရင် အထွက်ကလည်း ပိုရတယ်။ ဝယ်ရတာတော့ တော်တော်များများ ဒီဆေးကို သုံးလာတာပေါ့။ တောင်သူသုံးလာတာလည်း ပါတယ်။ ဒီလိုသုံးတတ်အောင်လည်း ကုမ္ပဏီက လိုက်သင်ပေးတာပေါ့နော်။ တနှစ်တနှစ် များလာတာပေါ့နော် ရောင်းအားကတော့။ စျေးကွက်က နည်းနည်းကြီးလာတာကိုး။ စိုက်ပျိုးရေးစျေးကွက် ကြီးလာတယ်” လို့ ပြောပါတယ်။
ပိုးသတ်ဆေးဥပဒေအရ လိုင်စင်မရှိဘဲ သို့မဟုတ် တရားမဝင် ဆေးဝါးတွေကို ရောင်းချနေတာနဲ့ပတ်သက်ပြီး သက်ဆိုင်ရာက စစ်ဆေးတွေ့ရှိပါက ရောင်းချမှုအပေါ် မူတည်ပြီး အနည်းဆုံး ထောင်ဒဏ် ၆ လကနေ ၅ နှစ်အထိ ဖြစ်စေ၊ ဒဏ်ငွေအားဖြင့် ၃ သိန်းကနေ ၁၀ သိန်းအထိဖြစ်စေ၊ ဒဏ်နှစ်ရပ်လုံးဖြစ်စေ အရေးယူ ဆောင်ရွက်သွားမယ်လို့ သိရပါတယ်။
လက်ရှိမှာ စိုက်ပျိုးရေးဌာနမှ စိုက်ပျိုးရေးသုံး ပိုးသတ်ဆေး ရောင်းဝယ်မှုနဲ့ ပတ်သက်ပြီး ပညာပေးကာလကို ဆောင်ရွက်လျက်ရှိပါတယ်။
စစ်ကိုင်းတိုင်းဒေသကြီးအတွင်းရှိ ခရိုင် ၈ ခရိုင်မှာ ပိုးသတ်ဆေးဥပဒေ၊ ပိုးသတ်ဆေးကို ထိရောက်စွာနဲ့ အန္တရာယ်ကင်းစွာ သုံးစွဲနည်း ပညာပေးဆွေးနွေးပွဲတွေကို ၂၀၁၆ ခုနှစ်အတွင်း ၉၆ ကြိမ် ပြုလုပ်ပြီးဖြစ်ပါတယ်။
ဗွေဆော်ဦး ကြော်ငြာ
Aqua ဘူစတာ
Aqua ကယ်လဆီယမ်
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ comment.comment }}
{{ question.title }}