ဂူးဂဲလ် (Google) ဆိုတာဘာလဲ?

05/10/2020 12:30 PM တွင် အစိမ်းရောင်လမ်း အစိမ်းရောင်လမ်း မှ ရေးသား

“ခေတ်မီတောင်သူဖြစ်ဖို့ ဒစ်ဂျစ်တယ်နည်းပညာ လေ့လာစို့” အစီစဥ်လေးကနေ ပြန်လည်ကြိုဆိုလိုက်ပါတယ် ခင်ဗျ။

ယခင်တစ်ပတ်ကတော့ မီဒီယာနဲ့ သတင်းအချက်အလက်ဆိုင်ရာ သိနားလည်မှု အကြောင်းကို ဖော်ပြပေးခဲ့တာ ဖြစ်ပါတယ်ခင်ဗျ။ ယခုတစ်ပတ်မှာတော့ ဂူးဂဲလ် (Google) ရဲ့ အကြောင်းကို တောင်သူ ဦးလေး/ဒေါ်လေးတို့အတွက် မျှဝေပေးသွားမှာ ဖြစ်ပါတယ် ခင်ဗျ။

သိချင်တာ Google မှာရှာ ဆိုတဲ့ စကားလေးကို ကြားဖူးကြမယ် ထင်ပါတယ်။ အင်တာနက်နဲ့ မကင်းနိုင်သူတိုင်း ဂူးဂဲလ် (Google) နဲ့လည်း မစိမ်းကြပါဘူး။ ဂူးဂဲလ်ဟာ တကယ့်အသိပညာ ဗဟုသုတ လိုချင်ရာရနိုင်တဲ့ဘဏ်တိုက်ကြီး တစ်ခုဖြစ်ပါတယ်။ ဂူးဂဲလ် ဟာ ယနေ့ခေတ်ရဲ့အသုံးဝင်ဆုံးနဲ့ သိချင်တာကို ရှာဖွေနိုင်တဲ့ ရှာဖွေရေး အင်ဂျင် တစ်ခုဖြစ်နေပါတယ်။ ဖုန်းဝယ်ယူစဥ်ကတည်းက ပါရှိတဲ့ G ဆိုတဲ့ ပုံလေးနဲ့ဆော့ဝဲလ်လေး ဖြစ်ပါတယ်။ ဒါပေမဲ့ တရုတ်ကထုတ်တဲ့ဖုန်းတချို့မှာတော့ Google ကိုအသုံးပြုလို့မရပါဘူးခင်ဗျ။

စိုက်ပျိုးရေးပဲဖြစ်ဖြစ် အခြားအကြောင်းအရာပဲဖြစ်ဖြစ် မိမိသိချင်တဲ့ စကားလုံးလေးကို စာလေးရိုက်လိုက်တာနဲ့ ဂူးဂဲလ်က ဖော်ပြပေးမှာ ဖြစ်ပါတယ်။ မိမိရဲ့ဖုန်းထဲကနေ သိချင်တဲ့ အကြောင်းအရာကို အလွယ်တကူ ရှာဖွေနိုင်မှာပဲ ဖြစ်ပါတယ်။ ဂူးဂဲလ်ဟာ တစ်စက္ကန့်တိုင်းမှာ လူတွေရဲ့ ရှာဖွေမှုပေါင်း ၄၀,၀၀၀ ကျော်ကို ရှာဖွေဖော်ပြပေးနေပါတယ်။ တစ်နေ့လုံးဆိုရင်တော့ ရှာဖွေမှု သန်းပေါင်း ၃၅၀၀ ကျော် ရှာပေးနေတာ ဖြစ်ကြောင်း သိရပါတယ်။ 

အခုတော့ ဂူးဂဲလ်ဟာ ရှာဖွေရေးအင်ဂျင် သက်သက်မဟုတ်တော့ပါဘူး၊ ကြော်ငြာတွေတင်တဲ့နေရာ၊ စီးပွားရေး လုပ်ငန်းကြီးတွေနဲ့ လူတွေရဲ့ ပုဂ္ဂလိက ကိုယ်ရေးအချက်အလက်တွေကို ကောက်ယူသိုမှီးနေတဲ့ နေရာကြီးတစ်ခု ဖြစ်နေပါပြီခင်ဗျ။ ဒီလောက်ဆိုရင် ဂူးဂဲလ် အကြောင်းကို သိရှိသွားမယ်လို့ ယုံကြည်ပါတယ် ခင်ဗျ။

ယခင်တစ်ပတ်က ဖော်ပြခဲ့တဲ့ မီဒီယာနဲ့ သတင်းအချက်အလက်ဆိုင်ရာ သိနားလည်မှုဆိုင်ရာ ဆောင်းပါးလေးကို ပြန်လည်ဖတ်ရှုချင်ရင်တော့ ဖော်ပြပါလင့်ကနေ ဝင်ရောက်ဖတ်ရှုနိုင်ပါတယ် ခင်ဗျ။

မီဒီယာနှင့် သတင်းအချက်အလက်ဆိုင်ရာ သိနားလည်မှု

Wikipedia

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။