ယခုအပတ်အတွင်း စျေးနှုန်းအပြောင်းအလဲဖြစ်ပေါ်ခဲ့သည့် သီးနှံများ

(၃၀.၇.၂၀၁၈ မှ ၃.၈.၂၀၁၈)ထိ

ဆန်၊ စပါး

ဒီတစ်ပတ်မှာတော့ ဆန်က အရောင်းအဝယ်အေးတဲ့အတွက် ဆန်ကြမ်းဈေးတွေ ကျဆင်းသွားခဲ့ပြီး ဆန်ချောဈေးကတော့ ငြိမ်နေပါတယ်။ ဆန်ဈေးတွေငြိမ်နေသလို အရောင်းအဝယ်ကလည်း အေးနေပါတယ်။ ပြီးခဲ့တဲ့အပတ်က အတက်အကျ မငြိမ်ပေမယ့် ဒီတစ်ပတ်မှာ အကြမ်းက ဈေးကျဆင်းသွားခဲ့ပါတယ်။ ဆန်အဝင်က တော့ မိုးတွေ ရွာနေပေမယ့် ပုံမှန်ဝင်ရောက်နေတယ်လို့ သိရပါတယ်။ ရန်ကုန်ဈေးကွက်မှာ ဧည့်မထဆန် ၂၅ % က တစ်အိတ်ကို ၂၀၃၀၀ ကနေ ၂၀၅၀၀ ပေါက်ဈေးရှိပြီး တစ်အိတ်ကို ၂၀၀ ကျပ်လောက်ဈေးကျဆင်းသွားခဲ့ပါတယ်။ နွေသီးထပ်ဆန်ရှယ်ကလည်း တစ်အိတ်ကို ၂၁၈၀၀ ကနေ ၂၂၀၀၀ ပေါက်ဈေးရှိပြီး တစ်အိတ်ကို ၅၀၀ ဈေးကျဆင်းသွားခဲ့ပါတယ်။ ရက် ၉၀ ဆန်ကလည်း တစ်အိတ်ကို ၂၂၅၀၀ ကနေ ၂၃၀၀၀ ပေါက်ဈေးရှိပြီး တစ်အိတ်ကို ၅၀၀ ကျပ်ဈေးကျဆင်းသွားခဲ့ပါတယ်။ ကျန် ဆန်တွေကတော့ ဈေးအပြောင်းအလဲမရှိပဲ ငြိမ်နေပါတယ်။

ဇူလိုင်လအစမှာ အပြိုင်အဆိုင်ဈေးတက်ခဲ့ပေမယ့် ဇူလိုင်လကုန်မှာတော့ ဧည့်မထ ၂၅ % ဆန်က တစ်အိတ်ကို ၅၀၀ ကျပ်၊နွေသီးထပ်က တစ်အိတ်ကို ၁၅၀၀ ကျပ် နဲ့ ရက် ၉၀ ဆန်ကတော့ တစ်အိတ်ကို ၁၀၀၀ ကျပ်ဈေးကျဆင်းသွားခဲ့ပါတယ်။ ရန်ကုန်ဈေးကွက်မှာ ဆန်ကြမ်းဈေးတွေ ကျဆင်းခဲ့ပေမယ့် ပုသိမ်ဈေးကွက်မှာတော့ ဒုတိယတန်းစားစပါးရော ဆန်ကြမ်းပါ ဈေးငြိမ်နေတာကို တွေ့ရပါတယ်။ရွှေသွယ်လေးစပါးက တင်း ၁၀၀ ကို ၈၀၉၆၀၀ ရှိပြီး ဆန်ကတော့ တစ်တင်းခွဲကို ၃၄၀၀၀ ရှိပါတယ်။ ဧရာမင်းကတော့ တင်း ၁၀၀ ကို ၈၀၀၄၀၀ ရှိပြီး ဆန်ကတော့ တစ်တင်းခွဲကို ၃၄၀၀၀ ရှိပါတယ်။ မနောသုခကတော့ တင်း ၁၀၀ ကို ၆၄၄၀၀၀ ရှိပြီး ဆန်ကတော့ တစ်တင်းခွဲ ကို ၂၆၀၀၀ ကျပ်၊ မီးကောက်က တင်း ၁၀၀ ကို ၆၉၀၀၀၀ ရှိပြီး ဆန်ကတော့ တစ်တင်းခွဲကို ၂၉၀၀၀ ကျပ်၊ သီးထပ်ရင်ကတော့ တင်း ၁၀၀ ကို ၅၈၈၈၀၀ ရှိပြီး ဆန်ကတော့ တစ်တင်းခွဲကို ၂၃၀၀၀ ကျပ် အသီးသီးရှိပြီး ဈေးငြိမ်နေခဲ့ပါတယ်။

မတ်ပဲ (FAQ/RC)

မတ်ပဲကတော့ ပြီးခဲ့တဲ့တစ်လလုံး အကျဈေးနဲ့ပဲ ရှိခဲ့ပေမယ့် ဇူလိုင်လ နောက်ဆုံးပတ်နဲ့ သြဂုတ်လပထမဆုံးအပတ်မှာတော့ ဈေးအနည်းငယ်ပြန်တက်လာခဲ့ပါတယ်။ အိန္ဒိယက အဝယ်အနည်းငယ်ရှိလာတဲ့အတွက် ဈေးကတက်လာတာဖြစ်ပြီး အချို့ ကုန်စည်ဒိုင်တွေမှာတော့ လက်ကျန်ပဲတွေ မရှိတော့တဲ့အတွက် ဈေးက တက်လာတာလို့လည်း သိရပါတယ်။ တစ်ချို့ကုန်စည်ဒိုင်တွေမှာတော့ ရောင်းချတဲ့သူ ရှိပေမယ့် ပဲအဝင်နည်းတဲ့အတွက်ဈေးက တက်လာတာလို့သိရပါတယ်။ ဒါပေမယ့် ပဲလက်ကျန်များနေတဲ့ နယ်တွေများတဲ့အတွက် စိုးရိမ်စိတ်ဖြင့် ဈေးလျော့ရောင်းချတာတွေမလုပ်ရအောင် ကုန်သည်တွေ ညှိုနှိုင်းဆောင်ရွက်နေတယ်လို့သိရပါတယ်။

ရန်ကုန်ဈေးကွက်မှာတော့ မတ်ပဲ FAQ/RC က ၂၀၁၇ အပြင် ၂၀၁၈ ပါ ဒီတစ်ပတ်မှာ အရောင်းအဝယ်ဖြစ်နေပြီး အသစ်က ဈေးပိုရနေတာကိုလည်း တွေ့ရပါတယ်။ လက်ရှိငွေဈေးတက်နေတာကလည်း မတ်ပဲကို ယခုထက် ဈေးမကျစေပဲ တန့်နေတဲ့အခြေအနေပါ။ နယ်ကုန်စည်ဒိုင်တွေဖြစ်တဲ့ မုံရွာကုန်စည်ဒိုင်မှာတော့ မတ်ပဲက တစ်တင်းကို ၁၄၅၀၀ နဲ့ တစ်တင်းကို ၁၀၀၀ကျပ် ဈေးတက်လာပါတယ်။နေပြည်တော်ကုန်စည်ဒိုင်မှာတော့ တစ်တင်းကို ၁၃၃၀၀ နဲ့ တစ်တင်းကို ၇၀၀ နီးပါး ဈေးတက်လာပါတယ်။ ပြည်ကုန်စည်ဒိုင်မှာလည်း တစ်တင်းကို ၁၄၆၀၀ ရှိပြီး တစ်တင်းကို ၈၀၀ ကျပ်ဈေးတက်လာပါတယ်။

ရန်ကုန်ဈေးကွက်မှာတော့ ဒီတစ်ပတ် မတ်ပဲက တစ်တန်ကို ၄၂၀၀၀၀ ကျော်ကနေ ၄၃၅၀၀၀ အထိ ဈေးတက်လာခဲ့ပြီး ပြီးခဲ့တဲ့အပတ်နဲ့ နှိုင်းယှဉ်ရင် တစ်သောင်းကျပ်လောက်ဈေးတက်လာခဲ့ပါတယ်။

ပဲစင်းငုံနီ

ဒီတစ်ပတ်မှာတော့ ပဲစင်းငုံနီကလည်း ဈေးအနည်းငယ်တက်လာပါတယ်။ အိန္ဒိယဝယ်ယူမှု ပိုလာတဲ့အတွက် ဈေးတက်လာတာဖြစ်တယ်လို့လည်းသိရပါတယ်။ သြဂုတ်လမှာ အပြီးတင်သွင်းရမယ်ဆိုတဲ့ ကန့်သတ်ချက်ကြောင့် အဝယ်များပြီး ဈေးအနည်းငယ်တက်လာတယ်လို့သိရပါတယ်။ ထို့ပြင် တစ်ခြားပဲသီးနှံတွေကလည်း ဈေး တက်လာတဲ့အတွက် ပဲစင်းငုံကလည်း ဈေးတက်လာတာဖြစ်နိုင်တယ်လို့လည်း ကုန်သည်တွေက သုံးသပ်ထားပါသေးတယ်။ နယ်ကုန်စည်ဒိုင်တွေ ဖြစ်တဲ့ မုံရွာကုန်စည်ဒိုင်မှာ ပဲစင်းငုံနီက တစ်တင်းကို ၁၂၈၅၀ ရှိပြီး တစ်တင်းကို ၂၀၀ လောက်ဈေးတက်လာပါတယ်။ မြင်းခြံကုန်စည်ဒိုင်မှာတော့ တစ်တင်းကို ၁၁၁၀၀ နဲ့ ၁၀၀ လောက်ဈေးတက်လာခဲ့ပြီး ပခုက္ကူကုန်စည်ဒိုင်မှာတော့ တစ်တင်းကို ၁၅၂၀၀ နဲ့ တစ်တင်းကို ၄၀၀ လောက်ဈေး တက်လာခဲ့ပါတယ်။ ပြည်ကုန်စည်ဒိုင်မှာလည်း တစ်တင်းကို ၁၃၅၀၀ နဲ့ ၅၀၀ ကျပ်လောက်ဈေး တက်လာပါတယ်။ ရန်ကုန်ဈေးကွက်မှာလည်းပဲစင်းငုံနီက တစ်တန်ကို ၃၂၀၀၀၀ ကျော်လောက်ဈေးတက်လာပြီး အမြင့်ဆုံးဈေး ၅၀၃၀၀၀ ထိ ဒီတစ်ပတ်အတွင်းဈေးမြင့်တက်ခဲ့ပါတယ်။

ထောပတ်ပဲ

ထောပတ်ပဲကလည်း ဒီတစ်ပတ်မှာ ဈေးတက်လာခဲ့ပါတယ်။ ပဲလက်ကျန်တွေ နည်းလာတဲ့အတွက် ဈေးတက်လာတာဖြစ်တယ်လို့လည်းသိရပါတယ်။ ထောပတ်ပဲက ရန်ကုန်ဈေးကွက်မှာ အနည်းငယ်ငြိမ်နေပမယ့် နယ်ကုန်စည်တွေမှာတေ့ာ ဈေးတက်လာခဲ့ပါတယ။ မုံရွာကုန်စည်ဒိုင်မှာ တစ်တင်းကို ၄၀၀၀၀ ကျပ်ရှိပြီး တစ်တင်းကို ၃၀၀၀ ကျပ်၊ မြင်းခြံကုန်စည်ဒိုင်မှာတော့ ၃၇၈၀၀ ရှိပြီး ၄၀၀ ကျပ်လောက်ဈေးတက်လာခဲ့ပါတယ်။ ပြည်ကုန်စည်ဒိုင်မှာ ပြီးခဲ့တဲ့အပတ်က တစ်တင်းကို ၄၂၀၀၀ ရှိပေမယ့် ဒီတစ်ပတ်မှာတော့ ဈေးမဖွင့်ပါဘူး။ ထောပတ်ပဲကလည်း တစ်ခြား ပဲတွေနဲ့နှိုင်းယှဉ်လိုက် ဈေးအများဆုံးရရှိတဲ့ပဲလည်း ဖြစ်ပြီး ပြည်ပ ထက် ပြည်တွင်း ဝယ်လိုအားများတဲ့ ပဲလည်း ဖြစ်ပါတယ်။

ဝတ်ရည်မွန်(AMIA)

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...