ဆန်၊ စပါး၊ ပဲမျိုးစုံ၊ ပြောင်း တစ်ပတ်အတွင်း ဈေးနှုန်းအတက်အကျ

ဆန်၊စပါး

ရန်ကုန်ဈေးကွက်မှာတော့ ဆန်ဈေးက တစ်လနီးပါးငြိမ်နေပါတယ်။ ဆန်အဝင်ကတော့ ပုံမှန်ရှိနေပြီး အရောင်း အဝယ်ကတော့ အေးနေပါတယ်။ ဧရာဝတီတိုင်းဈေးကွက်မှာတော့ စပါးလက်ကျန်တွေ မရှိတော့ဘဲ ဈေးကောင်းပေးဝယ်နေတဲ့အတွက်ဈေးက ဆက်တက်နေပါတယ်။

ဧရာဝတီတိုင်း ပုသိမ်ဈေးကွက်မှာ ပုသိမ်ပေါ်ဆန်းစပါးက တင်း ၁၀၀ ကို ၁၂၆၄၀၀၀ ပေါက်ဈေးရှိနေပြီး တင်း ၁၀၀ ကို ၃၇၀၀၀ ကျပ် ဈေးတက်လာပြီး ဆန်ကတော့ တစ်အိတ်ကို ၅ သောင်းနဲ့ ဈေးငြိမ်နေပါတယ်။ ပုသိမ်ဧည့်မထ(မိုး)စပါးကတော့ တင်း ၁၀၀ ကို ၈၇၄၀၀၀ ပေါက်ဈေးရှိပြီး ၁၈၀၀၀ ကျပ်၊ ဧည့်မထ(နွေ)စပါးကတော့ တင်း ၁၀၀ ကို ၈၅၆၀၀၀ ပေါက်ဈေးရှိပြီး တင်း ၁၀၀ ကို ၄၆၀၀၀ ကျပ် ဈေးတက်လာပါတယ်။ ဆန်ကတော့ တစ်အိတ်ကို ၃၁၀၀၀ ပေါက်ဈေးရှိပြီး ၅၀၀ ကျပ်ဈေးတက်လာပါတယ်။

မြောင်းမြပေါ်ဆန်းစပါးကတော့ ဈေးငြိမ်ပါတယ်။ မြောင်းမြ ဧည့်မထ(နွေ) နှင့် (မိုး)စပါးတွေကတော့ တင်း ၁၀၀ ကို ၈၈၃၀၀၀ ကနေ ၉၂၉၀၀၀ ပေါက်ဈေးရှိပြီး တင်း ၁၀၀ ကို ၁၈၀၀၀ ကနေ ၁၉၀၀၀ ကြားဈေးထပ် တက်လာပါတယ်။ ဆန်ကတော့ ငြိမ်ပါတယ်။

မြန်မာနိုင်ငံဆန်စပါးအသင်းရဲ့ ထုတ်ပြန်ချက်စာရင်းအရ ပြီးခဲ့တဲ့ သုံးလအတွင်း ပြည်ပကို ဆန် နဲ့ ဆန်ကွဲ တန် ၅ သိန်းခွဲကျော် တင်ပို့ရောင်းချနိုင်ခဲ့တယ်လို့သိရပါတယ်။ တရုတ်တင်ပို့မှု နည်းတဲ့အတွက် ပြီးခဲ့တဲ့ နှစ်တွေနဲ့ ယှဉ်ရင်တော့ လျော့ကျသွားပါတယ်။

မတ်ပဲ

ရန်ကုန်ဈေးကွက်မှာတော့ မတ်ပဲ(FAQ/RC - 2022) ဟာ ဒီတစ်ပတ်အဖွင့်ဈေးမှာ တစ်တန်ကို ကျပ် ၁၇ သိန်းကျော်အထိ ဈေးတက်ခဲ့ရာကနေ အပိတ်ဈေးမှာတော့ တစ်တန်ကို ၁၆၂၇၅၀၀ ထိ ဈေးကျသွားပြီး လေးရက်အတွင်း ၈၀၀၀၀ ကျသွားတာပါ။

မတ်ပဲ(SQ/RC - 2021) ကတော့ အကျပိုကြမ်းပါတယ်။ ဒီတစ်ပတ်အဖွင့်ဈေးမှာ တစ်တန်ကို ကျပ် ၁၉၃၇၅၀၀ ထိ ဈေးတက်ခဲ့ရာကနေ အပိတ်ဈေးမှာတော့ တစ်တန်ကို ၁၈၄၇၅၀၀ ထိ ဈေးကျသွားပြီး လေးရက်အတွင်း ၉၀၀၀၀ ကျသွားတာပါ။

အဝယ်တွေကို ပြန်ထိန်းလိုက်တဲ့အတွက် အခုလို ဈေးတွေ ရုတ်တရက် ပြန်ကျဆင်းသွားတာဖြစ်တယ်လို့ ကုန်သည်အချို့က သုံးသပ်ပါတယ်။ ဧရာကုန်သွယ်မှုဗဟိုဌာနကတော့ မတ်ပဲဈေးဟာ ရက်ပိုင်းအတွင်း ပြန်တက်နိုင်ဖွယ်မရှိဘူးလို့ သုံးသပ်ထားပါတယ်။

နယ်ဈေးကွက်တွေမှာတော့ ပစ္စည်းလက်ကျန်လည်း နည်းနေတဲ့အတွက် ဈေးအတက်အကျ အများကြီး မရှိဘူးလို့ သိရပါတယ်။

ပဲစင်းငုံနီ

ပဲစင်းငုံနီကတော့ ပြီးခဲ့တဲ့အပတ်က ဈေးတက်လာပေမယ့် ဒီတစ်ပတ်မှာတော့ ဈေးပြန်ကျဆင်းသွားပါတယ်။ မတ်ပဲလောက် အများကြီး မကျဆင်းပဲ ဈေးက ဖြေးဖြေးကျဆင်းနေတာဖြစ်ပါတယ်။ အိန္ဒိယနိုင်ငံမှာ ပဲစင်းငုံနီ အထွက်နှုန်း လျော့ကျမယ်ဆိုတဲ့ သတင်းတွေကြောင့် ပဲစင်းငုံနီက ဈေးပြန်တက်လာတာဖြစ်တဲ့အတွက် လက်ရှိကျဆင်းသွားပေမယ့် ပြန်တက်နိုင်ဦးမယ်လို့ ကုန်သည်တွေက ခန့်မှန်းထားပါတယ်။

ရန်ကုန်ဈေးကွက်မှာ ပဲစင်းငုံနီ တစ်တန်ကို ကျပ် ၁၄ သိန်း ၇ သောင်းပေါက်ဈေးရှိပြီး ပြီးခဲ့တဲ့အပတ်နဲ့ ယှဉ်ရင်တော့ တစ်တန်ကို ၂ သောင်းကျော်ဈေးကျဆင်းသွားပါတယ်။

မန္တလေးဈေးကွက်မှာတော့ တစ်အိတ်ကို ၁၃၈၀၀၀ ကနေ ၁၄၀၀၀၀ ပေါက်ဈေးရှိပြီး အတက်ဈေးနဲ့ ငြိမ်နေပါတယ်။

ပခုက္ကူဈေးကွက်၊ မုံရွာဈေးကွက်၊ အောင်လံဈေးကွက်တို့မှာတော့ ပဲစင်းငုံနီက တစ်တင်းကို ၄၅၇၀၀ ကနေ ၄၆၀၀၀ ကြား ပေါက်ဈေးရှိပါတယ်။

ကုလားပဲ

ပြီးခဲ့တဲ့အပတ်က အနည်းငယ်ဈေးကျဆင်းသွားတဲ့ ကုလားပဲကတော့ ဒီတစ်ပတ်မှာ ဈေးအနည်းငယ်ပြန် တက်လာပါတယ်။ လက်ကျန်ပဲ လျော့နည်းလာပြီ ဖြစ်တဲ့အတွက် ဈေးက အတက်အကျတည်ငြိမ်မှု မရှိပါဘူး။ လက်ရှိလှောင်ထားသူတွေအနေနဲ့ကတော့ ဈေးကောင်းရရှိနေတဲ့အနေအထားဖြစ်ပြီး ဈေးဆက်တက်နိုင်ခြေ နည်းသွားကာ လက်ရှိ အတက်ဈေးနဲ့ပဲဆက်ရှိသွားမယ့်အခြေအနေဖြစ်တယ်လို့ သုံးသပ်ရပါတယ်။

ပြောင်းဆံ

ပြောင်းဆံကတော့ဈေးတွေ ကျဆင်းနေပါတယ်။ လက်ရှိအချိန်ထိ တင်ပို့မှုနဲ့ပတ်သက်လို့ ဆွေးနွေးမှုတွေ ပြုလုပ်နေပေမယ့် အဆင်မပြေသေးဘူးလို့သိရပါတယ်။ ဈေးတွေက ဆက်ကျဆင်းနေတယ်ဆိုပေမယ့် ဝယ်ယူမှုတွေကတော့ ပုံမှန်ရှိနေလို့ နယ်ဈေးကွက်တွေမှာတော့ အများကြီး ကျဆင်းသွားတာမျိုး မရှိပါဘူး။

(စိုက်ပျိုးရေးဈေးကွက်သတင်းအေဂျင်စီ (AMIA) က ပေးပို့လာသည့် ဈေးနှုန်းများကို အခြေခံ ဖော်ပြခြင်းဖြစ်ပါသည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...