ကျိုက်မေရာမြို့ရှိ လယ်ဧက ၁၀၀ ကျော်ကို ကန်ထရိုက်လယ်ယာစနစ်ဖြင့် ဆောင်ရွက်နိုင်ရန် တရုတ်နှင့်ဆွေးနွေးနေ

မွန်ပြည်နယ်၊ ကျိုက်မေရာမြို့နယ်ရှိ လယ်ဧက ၁၀၀ ကျော်တွင် ကန်ထရိုက်လယ်ယာစနစ်ဖြင့် ဆောင်ရွက်နိုင်ရန် တရုတ်နှင့် ဆွေးနွေးညှိနှိုင်းမှုများပြုလုပ်နေကြောင်း မြန်မာနိုင်ငံ ဆန်စပါးစိုက်ပျိုးထုတ်လုပ်သူများအသင်းမှ သိရသည်။ 

လွန်ခဲ့သော ၆ လခန့်က မွန်ပြည်နယ် ဝန်ကြီးချုပ်၏ ဖိတ်ခေါ်မှုအရ ကျိုက်မရောမြို့နယ်ရှိ မြေလွတ်(ပလပ်မြေ) နေရာများတွင် ဆန်စပါးစိုက်ပျိုးထုတ်လုပ်ခြင်းကို မြန်မာနိုင်ငံ ဆန်စပါးစိုက်ထုတ်သူများအသင်းမှ ဗဟိုအလုပ်အမှုဆောင်များမှ လယ်ဧက ၁၀၀ ကျော်တွင် စမ်းသပ်စိုက်ပျိုးရာ၌ အခက်အခဲများစွာရှိကြောင်း သိရသည်။ 

"ပြီးခဲ့တဲ့ ၆ လလောက်က ဝန်ကြီးချုပ်ကိုယ်တိုင် ကျွန်တော်တို့အဖွဲ့နဲ့တွေ့ပြီးတော့ သူရဲ့ မြေဧကတွေကိုအသုံးချပေးဖို့ ဆွေးနွေးခဲ့ပါတယ်။ ကျွန်တော်တို့အသင်းဖွဲ့က ဗဟိုအလုပ်မှုဆောင်က မြေဧက ၁၀၀ ကျော်ကို ရယူပြီးတော့ စမ်းသပ်စိုက်ပျိုးကြည့်ပါတယ်။ တရုတ်ပညာရှင်တွေရဲ့ အကူအညီနဲ့ စိုက်ပျိုးတဲ့အခါမှာ အခက်အခဲတွေ့ပါတယ်။ တကယ်လည်း မြေအနေအထားအရ စီးပွားဖြစ် မဖြစ်သေးဘူး။ အဲ့ဒီမှာ ဆည်မြောင်းကနေ ရေပေးဖို့လုပ်နေတဲ့အနေအထားတွေ ကွင်းဆင်းတွေ့ရှိရပါတယ်။ အဲ့ဒီမြေတွေကို အသုံးချနိုင်ဖို့အတွက်လည်း ကျွန်တော်တို့ အသင်းတစ်ခုထဲနဲ့တော့ အားမရှိဘူးပေါ့။" ဟု မြန်မာနိုင်ငံ ဆန်စပါးစိုက်ပျိုးထုတ်လုပ်သူများအသင်း ဥက္ကဋ္ဌ ဦးစိန်ဝင်းလှိုင်က ပြောသည်။ 

လက်ရှိတွင် ကျိုက်မရောမြို့နယ်၌ တရုတ်ပညာရှင်များ၏ အကူအညီဖြင့် ဆန်စပါး စမ်းသပ်စိုက်ပျိုးရာတွင် ရေငန်ဒေသဖြစ်ခြင်း၊ ရေလုံလောက်စွာရရှိမှုမရှိခြင်း၊ ရာသီသီးနှံ တစ်ရာသီတည်း စိုက်ပျိုးနိုင်ခြင်း အစရှိသည့် အခက်အခဲများ ကြုံတွေ့ရကြောင်း သိရသည်။ 

ယင်းမြေလွတ်သည် ဒေသခံပြည်သူများမှ နည်းပညာနှင့် မျိုးစပါး ကောင်းမွန်စွာမရရှိခြင်း၊ လယ်ယာလုပ်သားရှားပါးခြင်း၊ ချေးငွေလုံလောက်စွာမရရှိခြင်းတို့ကြောင့် ဆန်စပါးစိုက်ပျိုးထုတ်လုပ်နိုင်မှုမရှိခြင်းဖြစ်ကြောင်း သိရသည်။ 

"ကျွန်တော်တို့က ဖိတ်ခေါ်ဆွေးနွေးပါတယ်။ တရုတ်ကိုလည်း သွားဆွေးနွေးသလို တရုတ်အဖွဲ့ကလည်း လာပါတယ်။ အခုဆွေးနွေးနေတော့ သူတို့တွေက ကွင်းဆင်းကြည့်တာရှိပါတယ်။ ကျွန်တော်တို့ အသင်းကိုယ်စားလည်း စမ်းသပ်ပြီးတော့ တစ်ရာသီစိုက်ပါတယ်။ နည်းနည်လေးတော့ အားမရဘူးပေါ့။ အဲ့ဒီမြေကို ဆက်လက်စိုက်ပျိုးနိုင်ဖို့ ကြိုးစားသွားမှာပါ။ တရုတ်နဲ့ ဖြစ်စေ၊ ကျွန်တော်တို့အသင်းက စုပေါင်းပြီးတော့ဖြစ်စေပေါ့။ အခုစိုက်တာကတော့ ကန်ထရိုက်လယ်စနစ် မဟုတ်သေးပါဘူး။ ဒီမှာရှိတဲ့ တရုတ်ပညာရှင်တွေက ဝိုင်းဝန်းပြီးတော့ နည်းပညာအနေနဲ့ ကူညီပံ့ပိုးပေးတာပါ။" ဟု ဦးစိန်ဝင်းလှိုင်က ပြောသည်။ 

မြန်မာနိုင်ငံ ဆန်စပါးစိုက်ပျိုးထုတ်လုပ်သူများအသင်းမှ ဗဟိုအလုပ်အမှုဆောင်များ စမ်းသပ်စိုက်ပျိုးလျက်ရှိသည့် သီးနှံမှာ မိုးစပါးသီးနှံဖြစ်ကြောင်း သိရသည်။ 

မြန်မာတစ်နိုင်ငံလုံးတွင် မျိုးစပါးပေါင်း ၁၃၄ မျိုး စိုက်ပျိုးလျက်ရှိပြီး မိုးစပါးစိုက်ဧက ၁၅ သန်း၊ နွေစပါးစိုက်ဧက ၂ သန်းကျော်၊ စုစုပေါင်း စပါးစိုက်ဧက ၁၇ သန်းကျော် စိုက် ပျိုးထုတ်လုပ်လျက်ရှိကြောင်း သိရသည်။

အေးအေးမြင့်(ABM)

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်