ငွေနှင်းမှိုစိုက်ပျိုးမှု များပြားလာပြီး၊ မှိုဈေးနှုန်း အနည်းငယ်အေးနေ

07/01/2022 19:00 PM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား

နေပြည်တော်အနီးတစ်ဝိုက်ဒေသများတွင် ငွေနှင်းမှိုစိုက်ပျိုးမှု များပြားလာပြီး၊ မှိုဈေး အနည်းငယ် အေးနေကြောင်း စီးပွားဖြစ် စိုက်ပျိုးထုတ်လုပ်သူများထံမှ သိရသည်။

"ငွေနှင်းမှိုဈေးက နည်းနည်းအေးနေတယ်။ အရင်ဆို ဒိုင်သွင်းဈေး (တောင်သူများမှ မှိုဒိုင်သို့ သွင်းသည့်ဈေး) က တစ်ပိဿာကို ၂၅၀၀ ကျပ်၊ ဒိုင်ရောင်းဈေး (မှိုဒိုင်မှ ဈေးကွက်သို့ လက်ကားပြန်ရောင်းသည့် ဈေး) က တစ်ပိဿာကို ၃၅၀၀ ကျပ် ရှိခဲ့တယ်။ အခုကျတော့ ဒိုင်သွင်းဈေးက တစ်ပိဿာကို ၂၃၀၀ ကျပ်၊ ဒိုင်ရောင်းဈေးက တစ်ပိဿာကို ၃၀၀၀ ကျပ်ပဲ ဈေးရှိတော့ပါတယ်။ အခုနောက်ပိုင်းနေပြည်တော်အနီးတဝိုက်မှာ ငွေနှင်းမှိုစိုက်ပျိုးမှု အရင်ကထက် ပိုများလာတဲ့အတွက်ကြောင့်လို့ မြင်ပါတယ်။"

ဟု နေပြည်တော်၊ ပျဉ်းမနားမြို့မှ ငွေနှင်းမှို စီးပွားဖြစ်စိုက်ပျိုးရောင်းချသူ ကိုညွှန့်ဝင်းက ပြောသည်။

နေပြည်တော်၊ ပျဉ်းမနားမြို့ရှိ ငွေနှင်းမှို မျိုးထုပ်ဈေးကွက်အတွင်း ၇/၁၂ လက်မအရွယ် ငွေနှင်းမှိုမျိုးထုပ်တစ်ထုပ်လျှင် ၆၀၀ ကျပ်၊ ၇/၁၃ လက်မအရွယ် ငွေနှင်းမှိုမျိုးထုပ်တစ်ထုပ်လျှင် ၆၅၀ ကျပ် ဈေးနှုန်းများဖြင့် လက်ကားရောင်းချနေကြောင်း သိရသည်။

"လတ်တလောမှာ အလုပ်အကိုင် မရှိသေးသူတွေကလည်း မှိုစိုက်ပျိုးရေးကို စိတ်ဝင်စားလာတယ်။ မှိုစိုက်တာက အရင်းအနှီးနည်းတယ်။ ဒါ့အပြင် ငွေနှင်းမှိုကို ကောက်ရိုးမှိုစိုက်ပျိုးတာထက် ပိုပြီးစိတ်ဝင်စားကြတာက ကောက်ရိုးမှိုစိုက်တာက အပူချိန်နဲ့စိုထိုင်းဆတွေ လိုအပ်သလို ထိန်းပေးနိုင်မှလေ၊ စိုထိုင်းဆ အဆင်ပြေရင်တောင် ခုလိုအေးတဲ့ရာသီမှာ အပူချိန်တက်အောင်လုပ်ဖို့က ခက်တယ်၊ စိုက်ပျိုးဖို့အတွက် နည်းစနစ်သေချာသိဖို့လည်း လိုအပ်တယ်၊ ဒါကြောင့် ငွေနှင်းမှိုကိုပဲ အများစုက စိုက်လာကြတာပါ။ ငွေနှင်းမှိုကျတော့ အထုပ်လေးတွေဆိုတော့ အိမ်ရှင်မတွေကအစ တစ်နိုင်တစ်ပိုင် စိုက်ပျိုးလာကြတယ်။"

ဟု ၎င်းက ဆက်လက်ပြောသည်။

ငွေနှင်းမှိုသည် စိုက်ပျိုးနည်းစနစ်အားဖြင့် လွယ်ကူရိုးရှင်းပြီး၊ လေထုနှင့်တိုက်ရိုက်မထိတွေ့စေရန်နှင့် မှိုထုပ်အဟောင်းနှင့်အသစ် ရောထွေးမစိုက်ပျိုးရန် စသည့် အချက်တစ်ချို့ကိုသာ သတိပြုစိုက်ပျိုးရကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။


East West Seed Myanmar ကြော်ငြာ

စိုက်ပျိုးထုတ်လုပ်သူ တောင်သူဦးကြီးများခင်ဗျာ...မိမိတို့စိုက်ပျိုးထုတ်လုပ်လိုက်တဲ့ သီးနှံက အရည်အသွေးပြည့်ဝပြီး စျေးကွက်မှာမျက်နှာလှဖို့ ဆိုရင် အဓိက အရေးကြီးတဲ့ မျိုး မှန်ကန်ဖို့လိုအပ်ပါတယ်...ဦးကြီးတို့ စိုက်ပျိုးမယ်ဆို ကျနော်တို့က မျိုး မှန်ကန်မှုကို တာဝန်ယူပါတယ်...East-West Seed (မြားနီ မျိုးစေ့)ဆိုတာ အရည်အသွေးပြည့်ဝတဲ့ မျိုးစေ့များကို သုတေသနပြု စမ်းသပ်ပြီးမှ ထုတ်လုပ်ရောင်းချနေသော ကုမ္ပဏီတစ်ခုဖြစ်ပါတယ်...ဒီတစ်ခါတော့ မြားနီ မျိုးစေ့ အနေနဲ့ အောက်ပါ အရည်အသွေးမြင့်မျိုးစေ့များနဲ့ မိတ်ဆက်ပေးလိုက်ပါတယ် ခင်ဗျာ....
Read more Facebook page သို့သွားရန်

ဆွေးနွေးချက်များ

ဆွေးနွေးရန်