ပဲပုစွန်သီးစိုက်ပျိုးနည်း

30/12/2021 13:30 PM တွင် အစိမ်းရောင်လမ်း အစိမ်းရောင်လမ်း မှ ရေးသား

ပဲပုစွန်သီးကို လူတိုင်းနှစ်ခြိုက်စွာစားသုံးလေ့ရှိကြပြီး နူးညံ့သောပဲတစ်မျိုးဖြစ်သည်။ ပဲသီးနုနုများကို အရည်သောက် ရေနွေးဖျော၍ပြုတ်စား ကြော်စားလေ့ရှိကြသည်။ အိမ်တွင်တစ်နိုင်တစ်ပိုင်စိုက်ပါကလည်း လွယ်ကူစွာစိုက်ပျိုးဖြစ်ထွန်းသည်။ စင်ထောင်၍သော်လည်းကောင်း ခြံစည်းရိုးများတွင် ကပ်၍သော်လည်းကောင်း စိုက်ပျိုးနိုင်သည်။

ပဲပုစွန်သီးကိုရာသီမရွေးစိုက်ပျိုးနိုင်သော်လည်း မိုးရာသီကုန်ဆုံးသောအချိန် သီတင်းကျွတ်လနှင့် တန်ဆောင်းမုန်းလများသည် စိုက်ပျိုးလို့ကောင်းသောအချိန်ဖြစ်သည်။

စိုက်ပျိုးခြင်း

အရှည် ၃ ပေ၊ အကျယ်၁ပေခွဲရှိသောကျင်းများကို ၁ပေခန့်နက်အောင်တူးရမည်။ မြေဆွေးနှင့် အပေါ်ယံမြေသား ဆတူရော၍ ကျင်းထဲသို့ထည့်ပေးပါ။ ကျင်းအလယ်တွင် ၄-၅ စေ့ခန့်ကို ၄ လက်မအနက်ချပြီး မြေပြန်ဖုံးစိုက်ပေးပါ။ ရေနေ့စဉ်မှန်မှန်လောင်းပေးဖို့လိုမည်။

အပင်ငယ်များ ၁ ပေခန့်ရှိပါက စင်ထိုး၍ အပင်တက်ရန်တိုင်များခပ်ကျဲကျဲထောင်ပေးပါ။ နှမ်းဖတ်/ပဲဖတ်ပုပ်ရည် ငါးအမိုင်နိုများ လောင်းပေးခြင်းဖြင့် အပင်ပြုစုနိုင်သည်။ စုပ်စားပိုးမကျရောက်အောင် ကင်းထောက်ပြီး သတိပြုရမည်။ စုပ်စားပိုးတွေ့လျှင် ဆပ်ပြာပိုးသတ်ဆေး တမာပိုးသတ်ဆေး ဆေးရွက်ကြီးစိမ်ရည်တို့ကို ဖျန်းပေးခြင်းဖြင့် နှိမ်နင်းနိုင်သည်။

ခူးဆွတ်ချိန်

ဆောင်းရာသီစိုက်ပျိုးသောအပင်များသည် ရက်ပေါင်း ၉၀ တွင် အသီးစတင်သီးသည်။ ၄၅ ရက်ခန့်ဆက်တိုက်သီးသည်။ နွေရာသီစိုက်ပျိုးသောအပင်မှာ အသီးလှီကင်းသည်။ တစ်ပတ်လျှင် ၅ ပိဿာခန့်ဆွတ်ခူးနိုင်သည်။

နည်းပညာများကို အောင်ဝင်းထွဋ်၏ “ပဲမျိုးစုံစိုက်ပျိုးနည်း” စာအုပ်မှကောက်နုတ်ဖော်ပြပါသည်။


East West Seed Myanmar ကြော်ငြာ

စိုက်ပျိုးထုတ်လုပ်သူ တောင်သူဦးကြီးများခင်ဗျာ...မိမိတို့စိုက်ပျိုးထုတ်လုပ်လိုက်တဲ့ သီးနှံက အရည်အသွေးပြည့်ဝပြီး စျေးကွက်မှာမျက်နှာလှဖို့ ဆိုရင် အဓိက အရေးကြီးတဲ့ မျိုး မှန်ကန်ဖို့လိုအပ်ပါတယ်...ဦးကြီးတို့ စိုက်ပျိုးမယ်ဆို ကျနော်တို့က မျိုး မှန်ကန်မှုကို တာဝန်ယူပါတယ်...East-West Seed (မြားနီ မျိုးစေ့)ဆိုတာ အရည်အသွေးပြည့်ဝတဲ့ မျိုးစေ့များကို သုတေသနပြု စမ်းသပ်ပြီးမှ ထုတ်လုပ်ရောင်းချနေသော ကုမ္ပဏီတစ်ခုဖြစ်ပါတယ်...ဒီတစ်ခါတော့ မြားနီ မျိုးစေ့ အနေနဲ့ အောက်ပါ အရည်အသွေးမြင့်မျိုးစေ့များနဲ့ မိတ်ဆက်ပေးလိုက်ပါတယ် ခင်ဗျာ....
Read more Facebook page သို့သွားရန်

ဆွေးနွေးချက်များ

ဆွေးနွေးရန်