ရော်ဘာစျေးနှုန်းမတည်ငြိမ်သော်လည်း မြိတ်မြို့ရော်ဘာစျေးကွက် အရည်အသွေးမီ ထုတ်လုပ်နေ

13/02/2020 10:00 AM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား ပြီး Greenovator Greenovator မှ ပေးပို့ထားပါသည်။

ရော်ဘာစျေးနှုန်းမတည်ငြိမ်သော်လည်း မြိတ်မြို့ရှိ ရော်ဘာထုတ်လုပ်သူများအနေဖြင့် အရည်အသွေးမီအောင် ထုတ်လုပ်ပြီး စျေးကွက်ထိန်းချုပ်နေဆဲဖြစ်ကြောင်း စိုက်ပျိုးရေးကျွမ်းကျင်သူများက ပြောသည်။

မှိုင်းခံရော်ဘာ RSS သည် အရည်အသွေးကောင်းပါက စျေးနှုန်းမြင့်သဖြင့် မြိတ်မြို့ရှိ ရော်ဘာခြံများအနက် မှိုင်းခံရော်ဘာ RSS ကိုသာ ထုတ်လုပ်နေသည့် ခြံများလည်း ရှိကြောင်း သိရသည်။

ဒီဒေသက ရော်ဘာထုတ်လုပ်သူတွေက RSS ကို အဓိက ထုတ်လုပ်တယ်။ ဈေးပိုရတဲ့ဝယ်လက်ကိုသာ သူတို့ရောင်းကြတယ်။ RSS က ထားသိုလို့ရတယ်လေ။ ဈေးတက်လာချိန်အထိ သိမ်းထားလို့ရလို့ RSS ကိုသာ အများစုထုတ်လုပ်ကြတာပါ။ အရည်အသွေးကောင်းတဲ့ရော်ဘာက နိုင်ငံတကာမှာ ဈေးပိုရတာ ထုံးစံပါ။

ဟု စိုက်ပျိုးရေးဦးစီးဌာန မြိတ်ခရိုင်ဦးစီးမှူး ဦးဝင်းဇော်က ပြောသည်။

ရော်ဘာစျေးနှုန်းများကျဆင်းခြင်း မြင့်တက်ခြင်းမှာ ဒေသတစ်ခုနှင့်တစ်ခု တူညီမှုမရှိပဲ သက်ဆိုင်ရာစျေးကွက်နှင့် ထုတ်လုပ်သည့် ရော်ဘာအရည်အသွေးအပေါ် များစွာမူတည်နေသည်။ 

ဈေးကွက်အရပေါ့။ တခြားဒေသတွေမှာက အရည်အသွေးပိုင်းအားနည်းတာကိုဝယ်တဲ့ ဈေးကွက်ပဲရှိတာလည်း ဖြစ်နိုင်ပါတယ်။ အရည်အသွေးပိုင်းအားနည်းတာကိုဝယ်ပြီး ပြုပြင်ပြီး အမြတ်တင်ရောင်းတဲ့ ဈေးကွက်ဆိုပါတော့။

ဟု ဦးဝင်းဇော်က ဆက်လက် ပြောသည်။

ထရပ်ကားတာယာ၊ လေယာဉ်ပျံတာယာ အစရှိသည့် အရည်အသွေးကောင်းတာယာများကို အဆင့်မြင့် RSS ရော်ဘာဖြင့် ထုတ်လုပ်ခြင်းဖြစ်ပြီး RSS အဆင့်မြင့်ရော်ဘာကို ရန်ကုန်တိုင်းရှိ တာယာစက်ရုံများနှင့် အိန္ဒိယနိုင်ငံ၊ မလေးရှားနိုင်ငံ၊ ဂျပန်နိုင်ငံတို့ရှိ တာယာစက်ရုံများမှ ဝယ်ယူနေသည်။

နန်းထက်ထက်ချစ်(ABM)