စပါးမျိုးစေ့ ဆားရည်စိမ် စိုက်ပျိုးခြင်း

တိုက်ရိုက်မျိုးစေ့ချ စိုက်ပျိုးသည်ဖြစ်စေ၊ ပျိုးထောင်စိုက်ပျိုးသည် ဖြစ်စေ၊ အပင်ပေါက်နှုန်း ကောင်းပြီး မျိုးစေ့ ဆောင်ပိုးမွှားနှင့် ရောဂါကင်းရှင်းသော မျိုးစပါးရရှိနိုင်ရန် မျိုးစပါးကို အညှောင့်မဖေါက်မီ ဆားရည်စိမ်ပါ။

ဆားရည်စိမ်နည်း အဆင့်ဆင့်

- ဆားရည်စိမ်ရန် စည်ပိုင်းပြတ် တစ်ခုထဲသို့ ရေ (၁၀) ဂါလံ ထည့်ပြီး အိမ်သုံးဆား (၅) ပိဿာနှုန်း ထည့်ပြီး သမ အောင် မွှေပေးပါ။ ဆားဖျော်ရည် အလောတော် ဖြစ်မဖြစ်သိရှိနိုင်ရန် ထမင်းလုံးစေ့ (သို့မဟုတ်) ကြက်ဥကို ၎င်း ဖျော်ရည်တွင် ထည့်ပါက ထမင်းလုံးစေ့(သို့) ကြက်ဥသည် ဆားရည်မျက်နှာပြင်ပေါ်တွင် ပေါလောပေါ်လာသည်။ ၎င်းအနေအထားရှိသော ဆားဖျော်ရည်သည် မျိုးစပါးဆားရည်စိမ်ရန် အကောင်းဆုံးဖြစ်သည်။ 

- အထက်ပါဆားရည်တွင် မျိုးစပါး(၈)ပြီထည့်၍ နှံ့စပ်အောင် မွှေပေးပါ။ အဖျင်းအမှော် စပါးစေ့ စသည်များ ဆားရည်မျက်နှာပြင်ပေါ်တွင် တက်လာလိမ့်မည်။ ၎င်းအဖျင်းအမှော်များကို ဆန်ကာဖြင့် ဆယ်၍ ဖယ်ထုတ်ပါ။ 

- အထက်ပါနည်းအတိုင်း တစ်ဧက စိုက်ပျိုးရန် မျိုးစပါး တစ်တင်းခွဲကို တစ်ကြိမ်လျှင်(၈) ပြီနှုန်းဖြင့် (၃) ကြိမ် ခွဲ ၍ စိမ်နိုင်ပါသည်။

- ဆားဖျော်ရည်အောက် နစ်မြုပ်နေသော အောင်မြင်သည့် မျိုးစပါးစေ့များကို ဆားရည်စင်ကြယ်သည့် တိုင်အောင် ရေသန့်ဖြင့် (၃) ကြိမ် ရေဆေးပါ။ ရေဆေးပြီး မျိုးစပါးများကို ရေကောင်းရေသန့်တွင် တစ်ရက်ခွဲ(၃၆)နာရီ ရေစိမ်ပါ။ (၁၂)နာရီလျှင် တစ်ကြိမ် ရေဟောင်းကိုသွန်၍ ရေသန့်ဖြင့် လဲလှယ်ပေးပါ။ 

- အထက်ပါ တစ်ရက်ခွဲကြာ ရေစိမ်ပြီး မျိုးစပါးများကို ဆယ်ယူ၍ ကွပ်ပျစ်ခုံပေါ်တွင် အညှောင့်ဖေါက်ပါ။ အညှောင့်ဖေါက်ရာတွင် ရေဆွတ်ထားသော ဂုန်နီအိတ်(သို့မဟုတ်) ငှက်ပျောရွက်ကို ကွပ်ပျစ်ခုံပေါ်တွင် အစိုဓာတ် ရရန် အောက်ခံအဖြစ် ခင်းပေးပါ။ ၎င်းနောက် ဆယ်ထားသော မျိုးစပါးများအား တစ်မိုက်(သို့မဟုတ်) ၆ လက်မ ခန့် အထူထား၍ ဖြန့်ခင်းပါ။ စပါးစေ့များပေါ်မှ ဂုန်နီအိတ်(သို့မဟုတ်) ငှက်ပျောဖက် ရရာဖြင့် လုံအောင်ဖုံးအုပ်ပါ။ အစိုဓာတ် မပြတ်စေရန် (၁၂) နာရီလျှင် တစ်ကြိမ်ခန့် ရေဖျန်းပေးပါ။ 

- ပြင်ပအပူချိန်နှင့် စပါးစေ့အတွင်း အစိုဓာတ်ရှိမှု အပေါ်မူတည်၍ တစ်ရက်ခွဲ (၃၆) နာရီအတွင်း စာပါးစပ်ကဲ့သို့ အညှောင့်များ ပြူထွက်လာပါမည်။ ထိုအခြေအနေသည် ပျိုးထောင်ရန်ဖြစ်စေ တိုက်ရိုက်မျိုးစေ့ချရန်ဖြစ်စေ အသင့်တော်ဆုံး အချိန်ဖြစ်ပါသည်။ 

အကျိုးကျေးဇူးများ 

- စပါးစေ့တိုင်းမှ စပါးပင်ပေါက်၍ အပင်ပေါက်နှုန်း ကောင်းသောကြောင့် အပင်ပေါက်စုံသည်။ 

- အပင်ပေါက် ညီညာသည်။ 

- စပါးစေ့တွင် ကပ်ပါလာသော မျိုးစေ့ဆောင် ရောဂါပိုးမွှားများကို သန့်စင်ပြီးဖြစ်စေ၍ ပိုးမွှားရောဂါ ကင်းစေ သည်။ 

- ပေါက်လာသည့် စပါးပင်ကို စပါးပင်ဖျက်တီပိုး(နီမတုတ်) လွယ်ကူစွာ မဖျက်ဆီးနိုင်ပါ။ 

Source : MAS

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်